الموضوع: النجدة..محتاج تيل وطنابير صني ونسيان مطنشة

اعتقد ان المشكلة انك تمشى بالعربية بالشكل ده ان الفرامل حيبقى اداؤها ضعيف لأن التيل والطنابير متاكلين، فلازم تخلى بالك لو انت مشوارك فيه سفر كتير. واعتقد انه من الافضل انك ما تستخدمهاش لغايه لما يتحل الموضوع ده.
بالنسبه لجهاز حماية المستهلك فالموضوع بياخد عندهم وقت يعنى مش حيسعفوك لحل هذه المشكلة.
الحل السريع بقى حاجه من أتنين : أنك تتابع مع نيسان مصر نفسها برقم الشكوى اللى انت قدمتها وحاول تتصل بيهم فى اوقات غير اللى انت متعود تتصل فيها جايز تكون بتتصل فى وقت الراحة بتاعتهم مثلا، لأن انا كانت ليا تجربة معاهم قبل كده واستجابوا بسرعة والمشكلة اتحلت بعد تدخل نيسان مصر، وفهمهم ان انت ممكن تعمل شكوى جماعية مع الناس اللى عندها مشكال مع تيل الفرامل.
اما الحل التانى انك تروح التوكيل اللى انت متعود تتعامل معاه وتقابل مدير الصيانة هناك وما تتحركش غير لما يصلحوا الفرامل لأن دى مسأله مش سهله وخطر جدا طبعا.
وربنا معاك.... ولو فيه محتاجها مننا اكيد الشباب هنا مش حيتأخروا عنك فى اى حاجه.

اصبر اكيد نيسان هتكلمك دا عن تجربه شخصيه معايا ...اكيد هيكلموووك

للأسف يا جماعة مبقتش لاقي حل......مودرن موتورز بيلعبوا بيا وكل شوية يقولولي هنكلمك الإسبوع الجاي ومحدش يتكلم ونيسان ربنا يجازيهم محاولوش انهم يتصلوا بيا ولو مرة واحدة مع إني كلمتهم مالا يقل عن عشر مرات وكل شوية يقولولي هنكلمك ونحل المشكلة وجهاز حماية المستهلك شكله نايم في الذرة ومش سائل......الرحمة من عندك يا رب.....هوا معني انك تكون مصري ان ملكش اي حقوق وإنك تخبط دماغك في الحيط.....نيسان وتوكيلها مودرن موتورز لو كانوا شايفين دولة قوية واقفالهم مكنوش عملوا كل ده معانا......لكن احنا رخاص اوي جوة بلدنا وبراها.......اشكوا اليك يا رب

ماتروح السبع ولا أوتو أيجيبت تجرب تشوف ليهم حل ولا أية

المشاركة الأصلية كتبت بواسطة ramymoharram

النجدة..محتاج تيل وطنابير صني ونسيان مطنشة

أرفع شكواي في البداية إلي الله سبحانه وتعالي فهو مدبر الأمر كله.

عاوز يا جماعة نصيحتكم......وأنا بعمل صيانة ال 20 ألف لعربيتي نيسان صني الشكل الجديد التوكيل
(مودرن موتورز أبو رواش) قالي إني محتاج تيل وطنابير أمامي لأنهم متاكلين ( المشكلة الشائعة) وإنهم علي الضمان بس هما مش موجودين دلوقتي وإنهم هيكلموني في خلال إسبوع علشان أجي أغيرهم. إستنيت الإسبوع ومحدش كلمني رحت مكلمهم وقالولي إن الطنابير موجودة بس التيل لا ومينفعش نركب التنابير لوحدها بس هنحجزهالك لغاية ميجي التيل.....أسبوع كمان وكلمتهم قالولي هوا التيل موجود بس التنابير خلصت؟؟؟؟؟؟؟.........إزاي يا جماعة إنتوا مش قايلين إنكم هتحجزوها......قالولي ايوة بس حصل غلط ومتحجزتش......فضلت علي الحوار ده لمدة شهر والتوكيل بيلعب بيا......أخر مزهقت روحت مكلم نيسان نفسها وإدوني رقم شكوي 6498 وقالولي متقلقش هنكلمك في خلال ثلاثة أيام ونقولك تروح تركب الحاجة دي فين......قولت يا واد أصبر مفيش مشكلة.......اسبوع عدا ولا حس ولا خبر......روحت مكلمهم .....راحوا لاطعني يجي عشر دقايق وفي الأخر يقولولي مفيش حد يرد علي الشكوي دلوقتي ويقفلوا السكة......فضلت علي الوضع ده ثلاث أيام وفي الأخر روحت متصل مهزقهم وقدمت شكوي في جهاز حماية المستهلك برقم i-38712 وبرضه لغاية دلوقتي محدش رد عليا.

محتاج بقا رأيكم في الأتي:
1- أعمل ايه تاني لأني حاسس إن الحيل اللي في ايدي خلصت.
2- هل هناك ضرر من سيري بالعربية؟.....أنا دلوقتي ماشي بيها حوالي 3000 كيلو بعد الموضوع ده ومش عارف اعمل ايه العربية هي الوسيلة اللي بروح بيها الشغل وبخلص بيها مشاوير اسرتي وحياتي هتقف لو وقفتها.

أفيدوني أفادكم الله

السلام عليكم ورحمة الله وبركاته
بص ياباشا
اكتب البيانات والمعلومات الي انت قلتها دي في رساله والافضل انك تترجمهاى الي الانجليزيه
واكتب فيها الي عملوه معاك وتخلفهم وعن المواعيد وعدم مصدقيتهم وابعت الكلام دا الي المكتب الاقليمي لنيسان في الشرق الاوس ط ومكانه في دبي واعملهم قلق دا حقك ما تسكتش علي حقك
ودا الميل بتاعهمcustomercare@nissan-me.ae
وهما الي هايجروا وراك وعن تجربه

وطمني عملت ايه