أختيار سياره 150 كم يوميا

**kanu** · 15-05-2014 12:56 PM

السلام عليكم يا أهل المنتدى الكرام

أنا عضو معاككم منذ عام 2008 و لاكن بدون مشاركات كتير و حابب اخد اراكم و استشركم في شراء سياره

انا حاليا معايا بونتو 2009 كنت جايبها زيرو و الحمد الله العربيه مقصرتش معايا في يوم واحد في الخمس سنين اللي فاتوا مع العلم انا ساكن بمدينة العبور و شغلي بوسط البلد و لازم كل يوم الصبح أوصل ابنى الحضانه بتاعته في مدينه نصر قبل ما اكمل على شغلي
فا كان مشوار الحمد الله ربنا يدمها صحه على الواحد العربيه دلوقتى عامله 135000 كم

الموضوع ده كله اتشقلب راس على عقب

ربنا رزقنى بشغل تانى بس بمدينة 6 أكتوبر العربيه تمام معايا في المشوار و موفره في البنزين جامد جدا

فكل يوم الصبح بطلع من العبور إلى طريق إسماعلية الصحراوي بعد كده انزل على الطريق الدائري اتجاه شبرا الخيمة و من الدائري على طريق المحور و من المحور على أكتوبر الشوية دوول الصبح عاملين 68 كم و بياخد حوالى من ساعه لساعه و نص سواقه

بعد الظهر بنزل من أكتوبر إلى المحور و من المحور بطلع الطريق الدائري اتجاه المعادي مش شبرا الخيمة لأنه بيكون شبه وااااااااااااقف يوميا و بعد الدائري بنزل محور سعد الدين الشاذلي الجديد ثم العبور الشوية بعد الظهر دوول عاملين 73 كم و بياخد حوالى من ساعتين لي 3 ساعات سواقه

يعنى يوميا = 141 كم
أسبوعيا = 987 كم من غير الجمعة و السبت أجازه
شهريا = 3948 كم
سنويا = 47376 كم

ده من غير خروج أو فسح أو أي مشاوير أضافيه و جانبيه
الحمد لله أنا كل يوم بثبت أن الأرض كرويه

المهم أنا بدور حاليا على عربيه

- تستحمل عدد الكيلومترات الكثير ده و تكون موفره في استهلاك البنزين .

- تكون فيها وسائل امأن لا يستهان بها عشان زي ما نتم عارفين الطريق الدائر زي اااالزفت و القطران كميه حوادث يوميا اغرب من الخيال .

- النقطة المهمة كمان العفشه لان الدائري حوالى 90% مكسر و مدغدغ و حفر و فواصل حديديه شبه الأهرامات .

يا ريت تسعدوني لأنى فعلا محتار و مخنوق مش لاقى حاجه كؤيسه

الميزانية لـ 160000 و ربنا يستر و حد يقدر يساعدني

**sharkass** · 15-05-2014 01:20 PM

بسم الله الرحمن الرحيم
انا مقدر تعبك فعلا و ربنا يوفقك .
شوف حضرتك تويوتا كورولا 2013 الشكل القديم اليابانى انا شيافها هتبقى مناسبة لحضرتك جدا وفى حدود السعر إللى معاك و تتحمل شوارع المحروسة .
و فى انتظار رأى بقية الأعضاء

**Akram.Gamal** · 15-05-2014 01:24 PM

تقدر تبص على سوبارو امبريزا
او بيجو 2008
و كمان ممكن 301 مستعمله و توفر فلوسك

**kanu** · 15-05-2014 01:34 PM

المشاركة الأصلية كتبت بواسطة sharkass

بسم الله الرحمن الرحيم
انا مقدر تعبك فعلا و ربنا يوفقك .
شوف حضرتك تويوتا كورولا 2013 الشكل القديم اليابانى انا شيافها هتبقى مناسبة لحضرتك جدا وفى حدود السعر إللى معاك و تتحمل شوارع المحروسة .
و فى انتظار رأى بقية الأعضاء

مشكور على رايك و مرورك الكريم
هيا يبانى 100% ؟ و كمان أنا بترعب من المستعمل و مش بفهم فيه خالص و ممكن يضحك عليا و بعترف

لو في منها زيرو حاليا يكون بكام ؟
و مواصفات الأمان أيه بالضبط ؟ اهم حاجه و لا يهمني شكل العربية

المشاركة الأصلية كتبت بواسطة Akram.Gamal

تقدر تبص على سوبارو امبريزا
او بيجو 2008
و كمان ممكن 301 مستعمله و توفر فلوسك

مشكور على رايك و مرورك الكريم
بيجو 301 و سترويين اليزيه الناس بتشد شعرها و جيوبها مفلسه من موضوع تيل الفرامل اللى بيتاكل قبل 15000 و اعرف ناس مغيرين طنابير على 25000
و في واحد قريبى مطلعه عينه في البنزين و التكيف لما بيشتغل و على مطلع كوبرى العربيه شبه ميته ( البونتو معملتهاش معايا و 1242 سى سى )

سوبارو امبريزا زيرو

A/T H/L 175,000 ج.م.

بيجو 2008 على ما اظن ده كروس اوفر
1.6 A/T 168,500 ج.م. 1.6 A/T Panorama 188,500 ج.م.