الموضوع: توكيل كلاكيت ثالث مره...

صباح الخير على الجميع.

إمبارح الصبح بعد ما دورت العربية أترجرجت فاعرفت اللى جاى بعد كده ، فضلت باصص على الشاشه ومستنى تطلعلى الـ ERROR

وما كدبتش خبر فعلا طلع الرسالة بتقولى Engine fault need need a repair والمروحة اشتغلت

قمت نازل زى الباشا شايل كبل البطارية.

30 ثانية بالظبط ورجعته تانى. مفيش إلا الساعه بس اللى اتغيرت فى العربية.

المهم قمت مدور ورحت على التوكيل عدل من غير ما كلمهم ولا ايتوها حاجه. (ابورواش)

قابلنى مهندس محترم جدا أنا مش متذكر أسمه بس هو عجوز شوية ورفيع ولابس نظارة .

وانا لسه بقوله على المشكلة ماستناش حتى أكمل وقام هو مكمل اللى حصل. قلتله عليك نور صلحها بقى. الصراحة أنا كنت بارد أوى.

فطلب منى أدخل معاه العريية. فا ركبت وابتدى يشرحلى ايه اللى حصل بالظبط. طبعا ابتدى بالكلمة الشهيرة (ديه مشكلة بنزين) قمت موقفه قلتله بص.

أنا كل اللى بطلبه منكم أن أنتوا تحترموا عقليتنا. ومانرميش المشكلة على اى حاجه وخلاص. فرد عليا بكل أدب الصراحة وقعد يشرحلى كل حاجه بالتفصيل. وكان واضح جدا أنه فاهم كويس.

انا اتبسط علشان حاجتين انه كان فاهم فعلا . والثانية ان حسيت فعلا انه مهتم.

المهم سبتله العربية ورحت الشغل وعمال اجهز نفسى بقى للخناقه لما يقولى العربية خلصت و الفاتوره بكذا.

ورجعلته تانى على الساعة 12 لقيت العربية لسه خلصانه. يدوبك دخلت قام مسلم عليا وجيه المهندس قعد يدينى شوية تعليمات بخصوص البنزين.

- بلاش تقل عن ربع التنك علشان البنزين وحش.
- حاول تشوف أنضف بنزينه على قد ما تقدر.
- لو ينفع كل فترة تحط المنظف.

و قالى هو جربها و طلب منى أجرب العربية فى الكام يوم اللى جايين ولو فى اى حاجه ارجعلهم تانى.

وقالى اتفضل فى الحسابات، قلت بس الخناقة جاية أهوه.

فى الحسابات لقيته قام مدينى تصريح الخروج ومكتوب عليها فى الضمان انا انشكحت اوى اوى اوى.

سلمت على مهندس الاستقبال وانا خارج وقعدنا ندردش شوية لغاية لما غسلوا العربية ، الصراحة غسله حلوة.

الخلاصة:

تجربة كانت مختلفة عن سابقتها : كنت راضى بنسبه 90% عن اداء التوكيل وخصوصا لما ركبت العربية بعد كده لقيت أدائها اتحسن جدا. معرفش بقى عملوا تحديث سوفتوير ولا ايه.

وصوت الموتور كمان اختلف تماما وديه كانت حاجه مضيقانى اوى كانت عاملة زى عربية موديل 1980

واضح فعلا ان فى تطوير شامل حسيته بوضوح فى التوكيل. وفى الاخر التطوير ده هايصب فى مصلحتهم و مصلحتنا كلنا.

واسف على الاطالة