الموضوع: التجربة الثانية : تغيير طقم التبريد

مساء الفل يارجالة
التجربة التانية اللي عايز احكي لكم عليها واللي عملتها في العربية هي :
كنت بلاحظ من ساعة ماجبت العربية من 4 سنين ان لما السرعة تتجاوز 120 كم/س الحرارة بتعلى مش بتنزل مع العلم ان المفروض ان الجري في طرق مفتوحة يبرد العربية علشان الهواء اللي داخل من الشبكة الامامية وبيخترق الردياتير حتى ولو كان الجو حر ، ولو مشغل التكييف مؤشر الحرارة بيوصل لحرف L ويفضل ثابت عنده ومش بتنزل نهائيا سواء ماشي جوه البلد او على طريق طوالي.
الموضوع مكنش مضايقني اوي باعتبار اني مش بسافر غير مرة في السنة وبالنسبة للتكييف فأنا مش بستعمل العربية غير يوم الجمعة والسبت وطول الأسبوع بروح الشغل بالمترو.
المهم وعلشان مااطولش عليكم في احد ايام الجمعة من حوالي شهر كنت رايح مشوار في طريق مصر اسكندرية وعلى كوبري اكتوبر لاحظت ان الحرارة بتعلى برغم اني كنت ماشي على 80كم/س تقريبا ، افتكرت ان المروحة مش شغالة مثلا ، بعد مانزلت من على الكوبري فتحت الكابوت لقيت المروحة شغالة !!!!!
المهم كملت يومي لكن مكنتش بزود عن 60 كم/س في طريق مصر اسكندرية علشان الحرارة ماتعلاش ، ولما رجعت روحت للميكانيكي (سيد خليل) قاللي ان السبب ده لايخرج عن واحد من الثلاثة دول :
1- الردياتير مسدود
2- طلمبة الميه مش بتقلب كويس
3- جوان وش سلندر
وقاللي اننا هنبدأهم بالترتيب ، روح الأول اغسل دورة التبريد .... فعلا روحت غسلت الدورة في بنزينة موبيل اللي في مساكن شيراتون والراجل بتاع الغسيل قاللي الطلمبة عندك بتقلب كويس جدا ، وطلعت جربت العربية على الدائري اللي بين شيراتون والماظة وكنت بجري والحرارة كانت فوق النصف بسنة بسيطة وده معناه ان الموضوع موضوع تبريد مش طلمبة ولا جوان والحمد لله ، لكن كنت ملاحظ ان المروحة مش بتفصل وطبعا مع التكييف هيرجع تاني يوصل المؤشر لحرف L
وانا بشتري الكويل من مصطفى بطاح وقابلت عوني هناك قاللي ان عربيته 1300 برضه لكنه مركب فيها ردياتير ومروحة الأسكورت الزيتيك ال 1600 ، فقررت اني اعمل اركب فيها طقم التبريد ده علشان اقطع فرط الموضوع واخلص منه ، فعلا روحت عند مصطفى وشوفت الردياتير والقميص والمروحة والقنطرة اللي بيركبوا عليها (هنزل لكم الصور المقارنة بين طقم التبريد القديم والجديد) ، الراجل كان طالب 800 جنيه في الموضوع ده وخدتهم منه ب 600 جنيه وروحت على عوني وبدأ فك الطقم القديم وركبنا الطقم الجديد ومليت الميه واختبرنا ان مفيش تسريب من اي حتة ومشيت.
تاني يوم جربت العربية الساعة 3 الضهر
النتيجة : المروحة بتشتغل وتفصل عادي جدا حتى لو بجري بسرعة ومعدي 120 او 130 كم/س
مع تشغيل التكييف وبجري الحرارة تحت النصف بسنة بسيطة والحمد لله
اسيبكم مع الصور