صيانة الالف لنيسان صني سوبر صالون 2014

**islamabady1980** · 20-05-2014 11:48 AM

السلام عليكم ورحمة الله وبركاته
الحمدلله استلمت العربيه يوم الخميس 8مايو 2014
وعقبال مارخصت كانت العربيه عامله 1500 كم
المهم اني رحت عملت الصيانه عند احمد مرعي علي طريق اسكندريه القاهره الصحراوي
يوم الاحد 18 مايو 2014
وماشاء الله توكيل زي الزفت واخر اهمال
العربيه عندي كانت بتحدف يمين وبلغتهم
والبويا من عند السوكه الي في العتب لاحظت انها بتتقشر
دي كانت ملحظاتي علي العربيه
غير كدا العربيه ماشاء الله عليها زي الفل
طبعاً العربيه دخلت علي ضبط الزوايا
وراحوا بصوا علي موضوع البويا دا ماحدش علق عليه ولا انا سالتهم بعدها
وكنت طالب اني اركب حساسات خلفيه
اخر همال في شغلهم وكنت متغاظ منهم وانا شايفهم شغالين فيها
وسابو العربيه مفتوحه اكتر من اربع ساعات لغاية ما الحساسات اترشت بلون العربيه
وما غسلوش العربيه واكتفوا انهم مسحوها
ولما استلمت العربيه
سالتهم عن كتاب الصيانه قالولي المره الجايه هاتخده
وبصيت علي الحساسات لقيت البيه الي بيركبها مخربش الاكصدام الخلفي خربشه ظاهره لما جيت اوريها لموظف الاستقبال قالي دي عربيه معرضه لكل حاجه قلتله الكلام دا مع الناس الي برا انما انا هنا في توكيل مش اجبلكم العربيه سليمه تخربشوها عندكم حاجه اخر اهمال
المهم قالي خلاص المره الجايه هاعملهالك
مش عارف انا مدايق من احمد مرعي حاسس انهم مش كفاءه
بس العربيه لما طلعت من الصيانه ماشاء الله عليها حسيت بفرق كبير جداً
حسيت سحبها بقي زي الفل
وبقت ناعمه جداً في المطبات وعلي الطريق
ولسه في حدفه يمين بس اخف من الي قبل كدا
والله هي ماشاء الله عليها عربيه ممتازه بس المشكله عندي في احمد مرعي

**akmm** · 20-05-2014 01:31 PM

الف الف مبروك السياره .... متضايقشى نفسك كل التوكيلات في مصر آخر إهمال المهم استمتع بالعربيه وممكن الزوايا تظبطها عند مركز متخصص ومحترم بس الاول ضبط ضغط الكاوتشات صح وتحياتى .

**blazer** · 20-05-2014 02:00 PM

مبروك و متزعلش نفسك مصر كلها اهمال
بس متعملش حاجه ابدااااا فى العربيه بره الوكيل

**ibrahimsaad** · 20-05-2014 03:44 PM

ربنا يباركلك فيها ويكفيك شرها

**islamabady1980** · 21-05-2014 01:04 AM

المشاركة الأصلية كتبت بواسطة blazer

مبروك و متزعلش نفسك مصر كلها اهمال
بس متعملش حاجه ابدااااا فى العربيه بره الوكيل

انا في قرارت نفسي ناوي اعمل كدا ان شاء الله
بس لما الاقي المستوي دا من الخدمه والاهمال دا الواحد يخاف
وضبط الزوايا لما التوكيل مش عارف يضبطلك العربيه اروح فين يعني بعدها
الواحد مستحمل التكلفه العاليه بتاعته في سبيل ان يعمل حاجه صح وفي مكانها
وفي الاخر يلاقيها بالمستوي دا
دا حتي نظافة الناس الي شغاله مش كويسه بعد ما استلمت العربيه القي صوابعه معلمه علي فبر القايم بطريقه مقرفه
والله الواحد ضغطوا علي من المناظر دي بس كله يهون عشان عزيزه

**islamabady1980** · 21-05-2014 01:05 AM

المشاركة الأصلية كتبت بواسطة ibrahimsaad

ربنا يباركلك فيها ويكفيك شرها

اللهم امين تسلم حبيبي

**islamabady1980** · 21-05-2014 01:10 AM

المشاركة الأصلية كتبت بواسطة akmm

الف الف مبروك السياره .... متضايقشى نفسك كل التوكيلات في مصر آخر إهمال المهم استمتع بالعربيه وممكن الزوايا تظبطها عند مركز متخصص ومحترم بس الاول ضبط ضغط الكاوتشات صح وتحياتى .

الله يبارك فيك حبيبي
انا مضبط الكاوتش 33امامي و30 خلفي نيتروجين
احنا كفايه علينا ان العالم بتعاملنا علي اننا عالم تالت
مش ناقصين ان احنا نعامل نفسنا عالم تالت كمان