سؤال بخصوص سوق سيارات الجمعه

**Badrawy** · 20-05-2014 12:53 PM

السلام عليكم

انا من اسكندريه وكنت عاوز اشتري عربيه وعاوز اروح سوق السيارات المشهور في القاهره

الاسئلة باختصار علشان مطولش عليكم

اولا هل سوق الجمعه هوه نفسه سوق العاشر ؟؟

ثانيا هل السوق بيبقي يوم الجمعه فقط ؟؟ ولو يوم الجمعه فقط ازاي نعمل التوكيل والشهر العقاري اجازة الجمعه ؟؟

ثالثا ما هيه الاجراءات المتعارف عليها للشراء يعنى اخد معايا مبلغ صغير ادفعه عربون ولا بدفع كله ويعمل توكيل ولا ايه الوضع وياريت الاجراءات بالتفصيل لان دي مهمه جدا ؟؟

اسف على الاطاله وجزاكم الله خير وشكرا

في انتظار ردودكم

**moumen_hs** · 20-05-2014 02:17 PM

نعم سوق الجمعة هو سوق العاشر فى مدينة نصر
السوق يوم الجمعة - الاحد بس بيبقى ضعيف جدا بالمقارنة بالجمعة
هناك شهر عقارى موجود فى السوق بيشتغل من الصبح لحد الصلاة ثم لحد الساعة اربعة
ممكن تاخد مبلغ عربون وتكمل الاجراءا تانى يوم مثلا أو كل المبلغ وتسجل فى الشهر العقارى فى يومها زى ماتحب
المهم تشوف الورق يكون سليم وشهادة المخالفات تكون جديدة وممكن لو مش موجودة تدخل على النت برقم العربية وتشوف المخالفات ولو فى تخصم ثمنهم من المبلغ المتفق علية وأفضل لو الشهادة تكون موجودة و الاهم حالة العربية وخد بالك معظم السوق تجار تجار .

**أبومازن333** · 20-05-2014 02:20 PM

خلي بالك معظم اللي في السوق تجار ، يعني لو تشتري من حد تعرفه أحسن من السوق بكتير

**Badrawy** · 20-05-2014 02:23 PM

شكرا على الردود يا جماعه وان شاء الله خير انا ممكن اروح اكتشف الاول واروح مره تاني اشتري او كده

**a7medsh3rawi** · 20-05-2014 02:42 PM

المشاركة الأصلية كتبت بواسطة badrawy

السلام عليكم

انا من اسكندريه وكنت عاوز اشتري عربيه وعاوز اروح سوق السيارات المشهور في القاهره

الاسئلة باختصار علشان مطولش عليكم

اولا هل سوق الجمعه هوه نفسه سوق العاشر ؟؟

ايوه هو نفس السوق علشان موجود فى الحى العاشر فى مدينة نصر

المشاركة الأصلية كتبت بواسطة badrawy

ثانيا هل السوق بيبقي يوم الجمعه فقط ؟؟ ولو يوم الجمعه فقط ازاي نعمل التوكيل والشهر العقاري اجازة الجمعه ؟؟

شغال الجمعه والاحد
وليه شهر عقارى خاص بيه وشغال يوم الجمعه عادى
موجود داخل السوق لو اديت ضهرك للباب الرئيسى هتلاقيه على شمالك فى نهاية السوق

المشاركة الأصلية كتبت بواسطة badrawy

ثالثا ما هيه الاجراءات المتعارف عليها للشراء يعنى اخد معايا مبلغ صغير ادفعه عربون ولا بدفع كله ويعمل توكيل ولا ايه الوضع وياريت الاجراءات بالتفصيل لان دي مهمه جدا ؟؟

هتتفرج على العربيه كويس وتجربها جوه السوق لو أمكن
وتتفق معاه انك تفحصها بره عند اى بنزينه جنب السوق
وتشوف صاحب العربيه شكله ازاى وتعامله ايه
لو تاجر او واحد اخلاقه وحشه او انت مستريحتش نفسيا للراجل
سيبه وامشى حتى لو عربيته مفيش زيها اتنين
سييك من العربيات اللى ليها توكيلين او تلاته او اكتر
بعد كدا تشوف الرخصه (الاسم وتاريخ الانتهاء) وشهادة المخالفات (تاريخها شهر بس)
ما تاخدش معاك فلوس خالص هناك
لو اتفقتوا على السعر خليه يعملك عقد ابتدائى وكل واحد ياخد نسخه
وتروحوا لاى بنك وتسحب من المكنه العربون وتديهوله
وتتفقوا على ميعاد تانى علشان يعملك فيه التوكيل او الاحسن تسجلها باسمك علطول
وتتديله باقى المبلغ

ربنا يوفقك ويكرمك
واى استفسار تحت أمر حضرتك

**محمود سامح** · 20-05-2014 02:42 PM

السهر العقارى شغال يوم الجمعة وكمان فية تجار وناس عادية ودول الاحسن تشترى منهم وسهل تعرفهم من التجار والتجار لهم شكل مميز معاهم شمسية وكراسى ولابسين كابات ودائما تلاقيهم اول السوق وحجزين اماكن مميزة والاهم لاتمسك الفلوس فى يدك او كيس اسود يوجد فى السوق عيال خاطيفة تخطف الشنط وفى ثوانى تختفى شفتهم اكثر من مرة والله معك