خد بالك علشان ما يتنصبش عليك ...

**myself112** · 20-05-2014 03:14 PM

اهم حاجة و انت بتشترى عربية تستعلم عن ملف العربية من المرور التابع لها يعنى تاخد رقم الشاسية والماتور و تكشف عليهم .

لانى كت هشترى عربية باسات 2012 و كل حاجة ماشية تمام جدااا و كتبنا عقد ابتدائى , بس انا لشىء لا يعلمه الا الله كنت قلقان , فكلمت واحد قريبى ضابط بقوله قدامى عربية مرور القنطرة شرق بورسعيد لقيته بيقولى : لأ لأ لأ , ابعد عنها تماما ليه طيب ؟؟!!!
قالى ان معظم عربيات المنطقة دى يا اما متهربة من ليبيا و مضروب لها ورق و نمر يا اما مسروقة و معمول لها نفس الحركة . ممكن تكون العربية دى تمام بس ابعد عن الشبهه .
اديته بيانات العربية و المفاجأة ان ملف العربية فى اسم مختلف خالص و الراجل كان بيقولى فيها رخصة 3 سنين , طلعت سنة واحدة ده غير انها طلعت مرور قنطرة غرب اسماعيلية مش زى ما هو قالى يعنى

و الراجل الى المفروض بيبعلى مجبش سيرة ان العربية فيها توكيلات او اى حاجة و حتى العقد الابتدائى كتبناه باسمه مش بصفته وكيلا عن حد ..
و الحمد لله ربنا يسر الامور و استرديت العربون ..

انا للاسف ما كنتش مركز و كانت العربية واخده عقلى تمام و مش فاكر فعلا الاسم الى كان مكتوب فى الرخصة , بس سواء الراجل ده ظالم او مظلوم , انا حبيت انبه الناس انها تكون مركزة و هى بتشترى و تستفسر عن كل حاجة و لو عرفت تاخد صورة من الرخصة او بيانتها كاملة و تروح تستعلم عنها بدل لا قدر الله ما يكون فى حاجة غلط ..

بس كلمة حق , العربية دى خرافية فعلا من جوه و من بره , و سحبها رهييييييييب و الفتيس ال dsg ده حلو جدااا و مش بتحس بيه تماما
ربنا يبارك للى معاه العربية دى .
و ربنا ييسر لنا الخير ..

**Ahmed.Essam** · 20-05-2014 03:17 PM

فيك شئ لله
الحمدلله لحقت نفسك وربنا يسترها معانا كلنا الواحد لا ضامن زيرو ولا مستعمل

**alrabeh** · 20-05-2014 03:20 PM

شكرا جزيلا على الموضوع القيم

**Ahmed Saad** · 20-05-2014 03:23 PM

فعلا أبعد عن أي عربيه مرور القنطرة شرق لأنه لسه متولع فيه بعد 30/6 وملفات أغلب العربيات متدمره وإصلا المرور ده لسه فاتح من شهر بعد التجديد ففعلا خلي بالك انت ممكن تستعلم عن أي عربيه بطريقه سهله وبنفسك هتخش على موقع النيابة الإدارية للاستعلام عن المخالفات وتدخل رقم العربيه وتشوف المخالفات وممكن تدخل رقم بطاقه صاحب الرخصه تشوف اسمه والمرور التابعة ليه العربيه وبس وان شاء الله تلاقي احسن منها وتكون حاجه مضمونه وشكرا لتحذير أعضاء المنتدى

**myself112** · 20-05-2014 03:39 PM

المشاركة الأصلية كتبت بواسطة hitmangate

فعلا أبعد عن أي عربيه مرور القنطرة شرق لأنه لسه متولع فيه بعد 30/6 وملفات أغلب العربيات متدمره وإصلا المرور ده لسه فاتح من شهر بعد التجديد ففعلا خلي بالك انت ممكن تستعلم عن أي عربيه بطريقه سهله وبنفسك هتخش على موقع النيابة الإدارية للاستعلام عن المخالفات وتدخل رقم العربيه وتشوف المخالفات وممكن تدخل رقم بطاقه صاحب الرخصه تشوف اسمه والمرور التابعة ليه العربيه وبس وان شاء الله تلاقي احسن منها وتكون حاجه مضمونه وشكرا لتحذير أعضاء المنتدى

معلش ممكن حضرتك تفهمنى ازاى ؟ و يا ريت لينك الموقع علشان اجرب فى عربيتى حتى :)