سؤال لعتاولة الفولكس - لمبة الايرباج - جولف 4

**windows9x** · 22-05-2014 05:26 PM

السلام عليكم،

صاحب العربيه اللى انا شاريها قاللى انه كان مشتريها من واحد فاصل لمبه الايرباج، طب ليه ياعم؟ بيقولى علشان غير الطاره علشان كان فيها حاجه مقطوعه

المهم انا فحصت العربيه كويس، وحسيت ان ده ممكن يكون السبب فعلا خاصة ان مفيش اى علامات الحمد لله من سمكره او كهرباء او كده ان العربيه كانت فى حادثه والايرباج فتحت

المهم كنت عند رشاد فى الحرفيين بعمل حاجه وقلتله ان لمبه الايراج طافيه خالص ومعرفش مفصوله ولا ايه .. قاللى غالباً هى فتحت وهو غيرها بطاره جديده والكمبيوتر عايز يترست وده ب 250 .. ممكن بعدها تشتغل او ممكن يكون فيه مشكله فى العداد فنغيره!!

انا مش مقتنع بالكلام ده، وعندى شوية اسئله:

1- ازاى بالظبط اعرف حالة الايرباج؟ يعنى هى مفصوله عمداً من الكمبيوتر؟ ولا مفصوله بسبب انها ضربت واللى عرفته انها لما تضرب الكمبيوتر بيفصلها اوتوماتيك ومبيشغلهاش تانى؟

2- لو هى مفصوله عشان عيب، اعرفه ازاى؟ واشغلها تانى فعلا زى ما قال كده ولا الكلام ده هرى

شكراً

**windows9x** · 26-05-2014 09:34 PM

مفيش حد عارف ولا الموضوع كبير والرد السريع ميكفيش

**Ahmed Saad** · 27-05-2014 07:46 AM

بص بالنسبه للايرباج علشان تعرف اذا كان مفتوح ولا لا بيتعرف ببرنامج أعطال الفاج بتاع العربيه بيخش على كنترول الايرباج ويشوف اذا كان مفتوح ولا لا ولا فيه مشكله برنامج الأعطال هو اللى بيبين وبرضه ببرنامج الأعطال بيخش على العدادات ويشوف لو فيه عطل عموما الموضوع ده يحلوهولك واحد كهربائي فولكس وعنده كابل أعطال وان شاء الله خير

**windows9x** · 27-05-2014 12:38 PM

شكراً لرد حضرتك

انا فعلاً عارف ان برامج الاعطال بتطلع العطل، بس المشكله انى رحت لاتنين بتوع فولكس وكشفوا قالولى ان الايرباج مفصوله .. اجى اسألهم ليه يقولو مش باين، فا هنفتح ونشوف وبتاع

حسيت انهم عايزين ياكلوا عيش .. وبصراحه قلقان منهم ..

لما عملت سيرش لقيت ان فيه بعض العربيات بتحفظ حاجه اسمها "الكراش داتا" لو الايرباج فتحت، واعتقد ان برامج الكشف هتطلعها، بس برضه مش عارف ليه الاتنين اللى رحتلهم معملوش كده

عندك فكره عن حد كويس ومضمون ولا اروح التوكيل اكشف بس وخلاص؟

**Ahmed Saad** · 27-05-2014 12:48 PM

المشاركة الأصلية كتبت بواسطة windows9x

شكراً لرد حضرتك

انا فعلاً عارف ان برامج الاعطال بتطلع العطل، بس المشكله انى رحت لاتنين بتوع فولكس وكشفوا قالولى ان الايرباج مفصوله .. اجى اسألهم ليه يقولو مش باين، فا هنفتح ونشوف وبتاع

حسيت انهم عايزين ياكلوا عيش .. وبصراحه قلقان منهم ..

لما عملت سيرش لقيت ان فيه بعض العربيات بتحفظ حاجه اسمها "الكراش داتا" لو الايرباج فتحت، واعتقد ان برامج الكشف هتطلعها، بس برضه مش عارف ليه الاتنين اللى رحتلهم معملوش كده

عندك فكره عن حد كويس ومضمون ولا اروح التوكيل اكشف بس وخلاص؟

بص يا باشا والله ماعرفش حد للكشف لاني معايا كابل الفاج بتاعي وانا بشتغل بيه وباصلح بنفسي بس عموما فيه ميكانيكى كويس في مدينه نصر عند الواحه ورا صقر قريش اسمه مهندس خالد ده راجل محترم وبيفهم وشغال سكودا وفولكس وراجل آمين جدا روحله وان شاء الله يظبطلك الدنيا