الموضوع: عملت صيانة ال٥٠٠٠ عقبالكم يا رجالة

بسم الله الرحمن الرحيم

رجالة تويوتا ، النهاردة الحمد لله عدي ٤٦٠٠ كم علي عربيتي و احتفلت بيها في التوكيل بتغيير زيت الفابريكة لزيت موبيل ١٠٠٠٠ كما هو موصي بيه من الوكيل.

ميعادي كان ١١ كنت هناك ١١ الا خمسة المهندس استلم و عاين العربية كانت مرفوعة و شغالين فيها ١١:١٠ بالثانية و المهندس قالي ساعتين هتكون جاهزة.

روحت اتفرج في المعرض علي تويوتا اوريس هاي لاين و فوجئت ان فيه سخانات كراسي و التابلوه كله جلد في جلد بخياطة دبل بيضا ما شاء الله ، بالصدفة قابلت الدكتور الفاضل احمد خليفة بيعمل صيانة ٥٠٠٠ برضو و ما شاء الله السبويلر مغير شكل العربية تماما.

تغير زيت ، تربيط عفشة ، تشيك كمبيوتر ، تشيك علي جميع السوائل ، تغير فلتر ، تنظيف فلتر الهوا ، غسيل العربية من الداخل و الخارج دفعت اجمالي ٥٨٤ جنيه .
بالمناسبة مراتي كانت بتعمل صيانة ال ٥٠٠٠ برضو لاكسنت ار بي و تغيير زيت و فلتر و دفعت ٦٠٠ جنيه يعني اغلي من كورولا!!! و كمان بيصرو ان الصيانة كل ٥٠٠٠ كم مش كل ١٠٠٠٠ كم زي التويوتا.
استلمت العربية الساعة ١:١٥ مغسولة و زي الفل طبعا راضيت الواد اللي بينضف و توكلت علي الله .