تقرير صيانة ال1000 الاولي للماروتي في الهايكستيب

**elpilot** · 25-05-2014 06:08 PM

بسم الله الرحمن الرحيم
النهارده عملت صيانة ال1000 للماروتي في الهايكستيب وحبيت اشاركم التجربة
بداية خرجت من البيت الساعه7 والطريق كان واقف اوي في بلبيس ووصلت التوكيل الساعه10 الحمد لله
دخلت الامن قالي سلم العربية للمهندس وانا من الشرقيه من منيا القمح هخلصهالك بسرعه قلت يا فرج الله المهم دخلت وسلمتها للمهندس وقولتله علي المشاكل اللي فيها قالي هنغيرلك زيت شيل5000 والفلتر وقولتله علي حكه الفرامل لما اجي افرمل وقولتله علي جلد الباب اللي بيتخلع من مكانه واقعد اركبة كل شوية وقولتله عايز اظبطها علي بنزين92 قالي المرة الجاية في صيانة ال5000 المهم سلمتهاله وقعدت جوة استنيت كل شوية اسأله خلصت يقولي لما تخلص هنقولك المهم كنت كل شوية اطلع ابص برة لحد ما لقيتها جاية ومركونه دخلت قعدت شوية يمكن لسه بيخلصوا حاجه وهو ولا قالي ولا عادلي اخر ما زهقت قومت والساعه بقت 1 قولتله العربية خلصت اهيه قالي روح ادفع الفلوس في خزنة نيسان
قولتله طيب مش هنجرب العربية واشوف العيوب اتصلحت ولا ايه قالي طالما طلعت هنا يبقي كله تمام وقاعد مبتسم طول الوقت عامل زي وزير الكهرباء بالظبط مبتسم وخلاص
تفاصيل الفلوس كالتالي
غسيل محرك 40جنية
فلتر زيت 45 جنية
زيت محرك xhp 3لتر ب 123جنية
ضريبة مبيعات 20.80جنية
مصروفات اخري 10 جنية
فروق التقريب 0.20 قرش
الاجمالي 239جنية
عايز كام يا خزنة قالي240
المهم اديته240 ورجعت استلم العربية اول حاجه بصيت عليها جلد الباب واذا به زي ماهو ملطوهوش روحت داخل للمهندس تاني قولتله الجلد محدش لطه قالي ابقي عدي علينا مرة تانية اصل السمكري مش موجود النهارده
قولتله اعدي مرة تانية ايه ياعم دانا رازع200كيلو عشان اجيلك اتصرف واعملهالي قام واحد زميله قالي تعالي انا هعملهالك وراح مدخلها في مكانها زي مانا بعمل ومثبتهاش وبيقولي دي طبيعتها كده مبتتلزقش لما تطلع من مكانها دخلها تاني في المجري بتاعها وشبعته بقي كلام قولتله انتوا توكيل مش كويس وعندهم حق الناس اللي علي النت اللي بيشتموكوا دول قالي ادينا فرصة وجرب مش هتخسر حاجه سيبك من اللي علي النت ميعرفش اني جربت فعلا
ملاحظاتي علي الصيانة
العربية تقريبا صوتها علي شوية مش عارف ليه
وانا راجع خدت حبوب جرائة ومشيت علي100 ووصلت ل120 وكانت تمام الحمد لله ومرضيتش اذود عشان الامان
الفرامل حسيت انهم شدوها شوية بقت مشدوده وتقريبا صوت الحكة مسمعتوش وانا جاي
جلد الباب بيتخلع زي ماهو
سألت علي طاسات 12 عندهم قالي مش موجوده
انطباعي عن التوكيل توكيل سئ فعلا زي مالناس بتقول وفي منتهي الاهمال وبينفض عن دماغة
ولو لا قدر الله حصل حاجه في العربية مش هيغيروهالك في الضمان هيشتغلوك
فانا حاليا بصدد اني انفضلهم ومش هقرف نفسي تاني بس المشكله الوحيده اللي هتقابلني هي قطع الغيار الاصلية لو قدرت اوصل لمكان بيبيع قطع الغيار اللي في التوكيل دي يبقي كده تمام اشق طريقي برة واشتري راحة بالي
هجرب العربية برضو الايام اللي جاية واوافيكم بالجديد
تحياتي

**sakr_skoda** · 25-05-2014 06:22 PM

التوكيلات فى مصر عامة بلا ضمير وقطع الغيار احياننا بتكون صينى او سيمانو عادى ***

**lidosasa** · 25-05-2014 06:29 PM

أولاً ألف مبروك على الصيانة
ثانياً كل التجارب تؤكد إن التوكيلات فى مصر عامة أى كلام وده موضوع نسبى يفرق من توكسل للتانى ومن عربية للتانية لكن مفيش خلاف إن توكيل السوزوكى أسواءهم
ثالثاً حضرتك قولت إنهم قالولك حنغير زيت شيل 5000 لكن لما قريت الأسعار لقيتك كاتب زيت xhp يعنى زيت موبيل مش شيل وأنا حبيت بس أنبهك للنقطة دى