الموضوع: العربية اتعدل ارتفاعها و استلمتها النهاردة الحمد لله

بسم الله الرحمن الرحيم

رجالة تويوتا ,,, السلام عليكم

استكمالا للموضوع السابق

http://www.nilemotors.net/Nile/423087-a.html

المهندس كلمني امبارح الساعة 5 بالليل و اكدلي ان العربية اتعدلت و تم تجربتها و انها جاهزة للاستلام في اليوم التالي .

الحمد لله رحت النهاردة و استلمت العربية واول ملاحظة ليا انا و مراتي وانا داخل اركب رجلي خبطت في العتبة بتاعتها لأني متعود ادخل علي طول عشان كانت واطية . هههههه

جربتها و اصريت اني اخد المطبات بقوة و الحمد لله محكتش ولا مرة في المطبات اللي كنت بحك فيها .

تم تجربة الثبات بأني اقفل ال ESP وال TRC و مشيت بيها علي سرعة 120 كم/س و قعدت اجيب الدركسيون يمين في شمال جامد محستش بفرق يذكر بالامانة .

مسكتش علي كدة و رحت طلعت الدائري من مطلع الاوتوستراد , اللي يعرف المطلع ده هيفهم اللي بتكلم فيه , مبدئيا المطلع عبارة عن لفة ضيقة قوي و فيها فواصل الكوبري واضحة جدا لما كنت باخده بسرعة بأي عربية كنت بحس انها بتعوم او بترقص من ورا , جربت بالعربية ولا الهوا مفيش اي شئ و الحمد لله زي قبل التعديل

اخر تجربة علي الدائري نفسه جبت 160 و الدنيا كانت فاضية بعكس المعتاد يمكن عشان الانتخابات و اخدت كام غرزة ضيقين و الحمد لله حاسس ان مفيش فرق حتي هذه السرعة .
و بأمانة الطريق مسمحليش اجري اكتر من كدة و انا كنت مشغل ال ESP وال TRC بصراحة عشان ابقي متطمن و انا ماشي

العفشة في النعومية و النشوفية مفرقتش حاجة نهائيا في المطبات و النقر و الطرق الطوالي و الغير ممهدة

سيتب العفشة زي ما هو متغيرش , يعني المساعدين موجودين في الاطراف بزاوية ميل , و السوست في الداخل و ده افضل سيتب في العفشة التورشم بيم زي اللي موجود في الشيفروليه كروز

القاعدة نفسها جوة العربية عليت حبيتين , وده بان اول مركبت لاني بحب انزل الكرسي لتحت و احتجت اني انزله لتحت درجتين عشان ارجع للوضع الاصلي وكمان احتجت تعديل المرايات الجانبية و الداخلية

الشكل الخارجي اكيد ارتفع , بس انا مش شايفه بالسوء اللي كنت متوقعه
صور العربية بعد التعديل و الحكم لكم

في النهاية انا حاسس اني مستريح نفسيا بعد التعديل خصوصا لما جربت الثبات , ومبقاش في خوف من المطبات نهائي و انصح اي حد كان متردد انه يعمل التعديل يتوكل علي الله و ميقلقش.

بعض المعلومات من الموضوع السابق

التعديل تم بتغيير ٤ مساعدين و ٤ سوست و كوبلن مجانا يتحملها التوكيل كاملا و اجمالي سعرهم ١٢٠٠٠ جنيه .
مدة التعديل يوم عمل كامل و احيانا يستلزم مبيت العربية حسب ضغط العمل ، و الاستدعاء بأولوية الاستلام .
تاريخ استلام عربيتي ٢٠١٣/١١/١٠
تاريخ تقديم الشكوي ٢٠١٣/١٢/٣
تاريخ الاستدعاء ٢٠١٣/٥/٢٤
تاريخ استلام العربية معدلة ٢٠١٣/٥/٢٦