تقرير صيانة 60 الف للوجان 2010

**georgedada82** · 30-05-2014 03:24 PM

العربية عاملة في حدود 36 الف كيلو ... ماشية 4 سنين و 8 شهور مغيرتش سيور ولا مرة ... حالة السيور اللي طالعة من العربية شكلها مفيهوش حاجة بالنظر يعني

ما تم تغيير
1- سير كاتينة( التقسيمة ) بالبلية الحديد من التوكيل سعره شامل الضريبة 544.5
2 - سير دينامو رقمه 1747 من التوكيل سعره 165
3 - زيت زادو xado تخليقي بالكامل هولندي الصنع والتعبئة لزوجته 5w40 اشتريته كتجربة لما قريت عنه انه فيه نانو سيراميك لترميم اجزاء الموتور المتاكلة بيقعد من 12 ل 15 الف كيلو سعره 270 من الوكيل وبيوصلك لحد البيت دليفري مجانا عن طريق شركة الشحن
4 - ثرموستات كوعة نوعها febi الماني سعرها 125
5 - فلتر زيت نوعه رينو تركي سعره 30 بالوردة الخاصة بالطبة
6 - فلتر هوا تركي سعره 50 جنيه
7 - بوجيهات NGK بلاتينيوم الكود المناسب للوجان BKR6EGP كود الموديل 7092 مفروض انه بيقعد في العربية من 40 ل 60 الف كيلو ويقال انه سحبه افضل من العادي وموفر في البنزين حسب المعلومات بتاعته سعره 120
8 - مياه ريدياتير توتال حمرا من اي بنزينة توتال سعر الجركن ال 4 لتر 63 جنيه ... سعر اللتر لو عاوز تجيب لتر واحد ب 18 جنيه العربية حسب الكتالوج الموتور بتاعنا بتاع المانيوال اللي هو موديله K7M 710 بياخد 5.45 لتر
9 - المصنعية ... ودي تمت خارج التوكيل عند محمد ناجي ( البرازيلي ) بمشاركة الحاج ناجي ... وابنه كريم ناجي ... ناس فاهمة شغلها كويس وربنا يبارك لهم

فلتر الزيت وفلتر الهوا والثرموستات والبوجيهات من محل شنك في صلاح الدين الاسكندرية ... افضل محلين في الاسعار وفاهمين شغلهم كويس في صلاح الدين هما محل شنك ومحل الزيني

تكلفة قطع الغيار بالكامل 1399
الاداء كويس جدا مبدئيا من التجربة الاولي ... لكن هيبان اكتر مع التجربة والوقت وبعد ما امشي بيها شوية هبعت لكم تكملة للتقرير

**M.Elwan** · 30-05-2014 07:52 PM

على فكرة البوجية ده مش زى بتاع اللوجان الاصلى
اللى راكب فيها بيكون Dual Electrode
يعنى الشكل ده
دى صورة من على النت للتوضيح

**georgedada82** · 31-05-2014 02:13 AM

حضرتك اللي جايبه ده فعلا بوجيه اتنين شمعة بس عادي
انما اللي انا جايبه ده بوجيه واحد شمعة بلاتينيوم ... وده ادائه افضل من حيث الاستهلاك والحرق والعمر

**the lawyer** · 31-05-2014 10:14 AM

المشاركة الأصلية كتبت بواسطة georgedada82

حضرتك اللي جايبه ده فعلا بوجيه اتنين شمعة بس عادي
انما اللي انا جايبه ده بوجيه واحد شمعة بلاتينيوم ... وده ادائه افضل من حيث الاستهلاك والحرق والعمر

كلام جميل ... كلام مظبوط .. مقدرش اقول حاجة عنه .
منور هنا وفي الجروب يا استاذ / جورج ..
انا من القاهرة .. ممكن تسألي فلتر التكييف بكام عند شنك لأني سألت عليه في التوكيل ب 120 جنيه وبرازيلي معندهوش أو رقم تليفون المحل لو سمحت

**lena jo** · 31-05-2014 02:02 PM

شكرا علي المعلومات المهة.انا زي حضرتك معي موديل 2010 و عملت كيلوات قليلة جدا . العربية شبة مركونة. و المفروض اعمل صيانة ال60 . لو ممكن خارج التوكيل ازاي عرفت اللي محتاج تغيير و هل لو انا رحت لحد بيعمل صيانة اجيب الحاجات دي كلها و لا ممكن هو اللي يجبها و ازاي اعرف انه ركب كل حاجة يعني اقف اشوف معاه. و ممكن اعرف هي العملية دي بتاخد وقت اد ايه؟. سؤال تاني معلش حضرتك تعرف حد في القاهرة قرب المعادي بيعمل صيانة كويس.؟ اسفة اسئلتي كتير.

**georgedada82** · 31-05-2014 11:56 PM

المشاركة الأصلية كتبت بواسطة the lawyer

كلام جميل ... كلام مظبوط .. مقدرش اقول حاجة عنه .
منور هنا وفي الجروب يا استاذ / جورج ..
انا من القاهرة .. ممكن تسألي فلتر التكييف بكام عند شنك لأني سألت عليه في التوكيل ب 120 جنيه وبرازيلي معندهوش أو رقم تليفون المحل لو سمحت

منور بحضرتك

حاضر هسال لحضرتك اول ما اعرف هبعت لك السعر

**georgedada82** · 01-06-2014 12:05 AM

المشاركة الأصلية كتبت بواسطة lena jo

شكرا علي المعلومات المهة.انا زي حضرتك معي موديل 2010 و عملت كيلوات قليلة جدا . العربية شبة مركونة. و المفروض اعمل صيانة ال60 . لو ممكن خارج التوكيل ازاي عرفت اللي محتاج تغيير و هل لو انا رحت لحد بيعمل صيانة اجيب الحاجات دي كلها و لا ممكن هو اللي يجبها و ازاي اعرف انه ركب كل حاجة يعني اقف اشوف معاه. و ممكن اعرف هي العملية دي بتاخد وقت اد ايه؟. سؤال تاني معلش حضرتك تعرف حد في القاهرة قرب المعادي بيعمل صيانة كويس.؟ اسفة اسئلتي كتير.

بصي حضرتك الحاجات اللي بيغيرها التوكيل في صيانة ال 60 هي نفسها اللي انا اشتريتها وغيرتها بالاضافة اني غيرت ثرموستات الكوعة عشان العربية لما بتمشي علي طريق الحرارة بتنزل لشرطتين وده معناه ان درجة الحرارة مش ثابتة جوه الموتور لان الاساسي ان الحرارة تفضل 4 شرط حر سقعة صيف شتا لازم 4 شرط المسؤول عن الموضوع ده هو ثرموستات الكوعة ... الحاجة انا جايبها بنفسي لاني بصراحة معلش موسوس شوية ... انا بتعامل مع ناس ثقة بس بحب انا اجيب حاجتي خاصة السيور والحاجات المؤثرة دي العملية بتاخد لها في رنج الساعتين او ساعتين ونص ... بتعامل مع ميكانيكي كويس كان شغال في التوكيل وفاهم العربية كويس

اللي انا عملته مختلف عن التوكيل موضوع الثرموستات ده وبالتالي غيرت مياه الريدياتير
جبت زيت تاني بس كويس يعتبر افضل من توتال طبعا
البوجيهات اللي جبتها مفروض ادائها افضل من بتاعة التوكيل كشفنا علي زيت الفتيس وكانت حالته كويسة وحالة تيل الفرامل وكان لسه فيه شوية
يعني المحصلة عملت اللي بيحصل في التوكيل وازيد شوية وبمصنعية اقل بكتير من التوكيل ...

**elsokily** · 02-06-2014 07:54 AM

ربنا يباركلك فيها .... بالنسبه للمصنعيه كانت قد ايه ؟؟

**georgedada82** · 02-06-2014 12:24 PM

المصنعية كانت 250 جنيه

**frhateg** · 03-06-2014 01:45 PM

9 "- المصنعية ... ودي تمت خارج التوكيل عند محمد ناجي ( البرازيلي ) بمشاركة الحاج ناجي ... وابنه كريم ناجي ... ناس فاهمة شغلها كويس وربنا يبارك لهم "
فين العنوان لو سمحت . ﻻني خلاص زهقت من التوكيل . كنت النهار ده في التوكيل بسموحه لصيانه 40000 . من شهر يناير مؤشر الحراره بايظ و كلمتهم عليه قالوا مش موجود و لما يتوفر حنتصل عليك . طبعا . طبعا احلي طناش . النهار ده بكلمهم عليه . قالوا محصلشي لوﻻ اني معايا ورقه الجوده بتاريخ الصيانه 30/1/2014 و مكتوب فيها ان العربيه محتاجه ثرموستات . حتي العربيه لما خلصت من الصيانه مهانش عليهم يغسلوها بالرغم انهم لهفوا 980 جنيه . اتصلت علي الخط الساخن 16202 و اشتكيت . و في انتظار الرد .