الموضوع: الطربق من القاهرة الى المعمورة بالاسكندرية

بص يا باشا انا حشرحهالك بالبلدي كده علي قد فهمي لاني بعرف امشيها مش بعرف اشرحها
من بعد بوابات اسكندريه ب5 حتكلع كوبري العامريه وتنزل منه وحتلاقي ماكدونالدز علي شمالك ويوتيرن
تفوت اليوتيرن ده وتدخل من اليوتيرن اللي بعده
هو تقريبا بعده بحوالي 300 -500 متر
وتقريبا فيه يافطه مكتوب عليها العجمي الكيلوا 21
اول ما تلف من اليوتيرن حتدخل يمين
واظن انك حتلاقي عربيات كتير داخله معاك علشان كله بيهرب من الصحراوي ويدخل من الطريق ده
بعد 2-3 كيلوا حتلاقي كوبري قاطع الطريق الكوبري ده هو الطريق الساحلي
بس انا مش فاكر حتاخد الطلعه اللي قبل الكوبري ولا اللي بعده
بس برضه اكيد حتلاقي عربيات كتير بتطلع الطلعه المقصوده دي علشان هربانين زيك من الصحراوي
18 كيلوا بالظبط وحتلاقي عربيات بتدخل شمال ودي النزله الوحيده الشمال في الطريق
ودي بتنزلك علي طريق القباري والموقف الجديد تفضل ماشي فيها حوالي
3 كيلوا حتلاقي مطلع كوبري علي شمال الطريق اول ما تطلعه حتلاقي عربيات بتكمله لاخره ودول رايحين علي الطريق الزراعي
وعربيات بتدخل شمال
تدخل معاهم
حوالي 2 او 3 كيلوا طوالي حتلاقي نفسك البحر في وشك
تطلع علي البحر وتاخد شمال 10 كيلوا تقريبا حتلاقي المنتزه قدامك
تخلي سور المنتزه علي يمينك وتفضل ماشي معاه حتلاقي نفق في وشك
تعدي منه وتدخل شمال برضه
3 او 4 كيلوا وحتلاقي سور المنتزه خلص
تدخل شمال
واهلا بيك في المعموره
معلش شرحتلك السكه كلها شمال بس هي دي وصفتها الي اعرفها (:
وعموما انت لو دخلت اي سكه من اللي انا شرحتها غلط مش حتتوه وليها سكه لحد المعموره برضه
بس شرحها يطول شويه
انا شرحت السكه اللي متتوهش او اللي انا اعرفها