الموضوع: موقف حصل لي في البنزينة

طبعا كلنا معرضين لمواقف نصب كتيرة بتحصلنا كل يوم ، وانهارده حصل معايا موقف عايز احكيهلكم ويبقى تحذير في نفس الوقت

انهارده انا كنت في طنطا وكنت مع اهلي بنستعد عشان راجعين القاهرة فرحنا عشان نملى بنزين ، هو اصلا انا عمري ما بملى من طنطا لاني على طول متعود اني املى من بنزينات معينه جنبي في القاهرة عشان عارف ان في غش كتير بيحصل في البنزين

المهم واحنا ماشيين دخلت بنزينة مصر اللي في اول شارع البحر جنب المسرح دي وكان في عربية ماتريكس قدامنا خلص وبعدين عبى جركن كده فانا خدت بالي اوي من موضوع الجركن ده وشفت انه عبى له حوالي 12 لتر في الجركن مش عارف ليه خدت بالي يمكن دي تكون علامة من ربنا ولا حاجة

دخلنا بعد كده ونزلت من العربية قلت له حط ب 50 جنية ويادوب هوا حط المسدس من هنا انا خدت حاجة من العربية في ثانية لاقيت العداد عامل 14 لتر في الثانية دي ، عرفت ساعتها على طول انه مصفرش العداد وانه عايز يضصحك عليا ويسرقني عيني عينك كده

طبعا انا في اللحظة دي معرفتش اتمالك اعصابي ولا نفسي مع اني والله مش بتاع مشاكل لكن اني يتنصب عليا عيني عينك كده فانا مش هسكت ، وساعتها زعقت باعلى صوتي في الحرامي ده لاقيته كش كده وخاف وده طبعا اثبت لي انه فعلا مصفرش العداد وانه بيسرقني طبعا كل العمال اللي في المحطة اتلموا ووقفوا معايا كمان وقلت لهم ده سارقني في 12 لتر لاقيتهم بيقولوا له انت اخرك معانا كده ومش عارف ايه وقلت لهم انا هطلع على القسم واعمل لكم محضر وده اللي خوفهم اكتر لكن عشان اهلي معايا والله واعصابهم اللي اتشدت جدا مرضتش اكبر الموضوع للقسم

الغريبة انه وانا بتخانق معاه وهو مكمل يحط بنزين حط ب 70 جنية بنزين مع ان العربية عمري ما حطيت فيها بنزين بالمبلغ ده لان التنك ميشلش وكمان التنك متفولش للاخر كمان بال 70 دول
وفي الاخر بعد الزعيق الكتير خصمت ال 12 لتر و دفعت 50 جنية ومشيت بعد ما عملت لهم فضيحة والحمد لله اخدت حقي منهم

يا ريت يا جماعة نخلي بالنا من الحرامية اللي في البنزينات دول وده تحذير من بنزينة مصر اللي في اول شارع البحر محدش يتعامل معاهم عشان دول شوية حرامية وكمان انا بلغت عنهم مباحث التموين