128 بالمواصفات دى .... سعرها كام؟؟

**ahmed726** · 31-05-2014 08:10 PM

السلام عليكم ورحمة الله

لو سمحتم معروض عليا عربيه 128 موديل89 ومشدوده عمره موتور كامله وحالتها كويسه وجنط سبور وكاوتش جديد و1300 سى سى تسوى كام ؟؟؟؟؟

**Omar2017** · 31-05-2014 08:59 PM

19 الف جنية

**ahmed726** · 31-05-2014 10:42 PM

مش كتير عليها 19 ياباشا ؟

**asaeed** · 31-05-2014 11:37 PM

بلاااااااااش أحسن... العربية دي مافيهاش أي سيفتي على الطريق
وأعطالها كتيييير
جيب مازدا 323 شدة حيلها شوية أحسن منها
أو لادا أي نعم هي خشنة بس عملية وبتستحمل الطرق المصرية

**J A G U A R** · 31-05-2014 11:44 PM

تجيب 19 الف

**S O P H O S** · 27-06-2014 01:52 PM

السعر الي اتقال غالي عليها فرأي
وبلاش

**م أحمد** · 27-06-2014 08:02 PM

ايه اخبار العفشة ؟ (كبالن ومساعدين و علبة دريكسيون و مقصات و كاوتشات الكبالن الداخلى)

فيها سنتر و انذار؟

فيها مكن رفع زجاج ؟

دورة المياه عاملة ايه (الراديراتير و الوصلات) ؟

الدبرياج لما بتدوس عليه ناعم و لا تقيل و السلك مشدود للآخر (مؤشر لحالة الديسك و الاسطوانة و الفورش)

العربية فابريكة دواخل و لا فيها مشكلة ؟

هل فى بارومة فى نقط معينة فى الشاسيه ؟

علب الشكمان متقفلة كويس و لا فيها مشاكل ؟

العربية بتحدف لجهة معينةعلى السرعات المختلفة ؟

الدهان ؟؟؟؟ الصالون ؟؟؟؟

لو كل دا تمام 100 % يبقى ان شاء الله تساوى 19 و احسن من عربيات كتييييييييييير جدا

Fabrica Italiana Per l'Automobile a Torino

F I A T

(ذكريات ايطالى ثانوية عامة )

سيارة الشعب المسكينة المفترى عليها حمالة الاسية من الناس الاسية

استهلاك بنزين فى الضياع ، قطع غيار فى العبيط ، تصلح مشاكل الكهربا عن الميكانيكى و العفشجى و السروجى و العكس بالعكس و عند الحلاق برده وطبعا فى كل حتة،

حمارتك العارجة تغنيك عن سؤال اللئيم !!!

**eng.m7md.ali** · 27-06-2014 09:10 PM

العربية طبعاً برة مصر متسواش 10 يورو

اما هنا بتعمل مبالغ غريبة .. متستغربش لو صاحب العربية عايز فيها 25 الف مثلا .. ماهو ده بسبب جهل الشعب المصري اولاً ثم جهل الحكومة وفكرة الجمارك اللعينة