الموضوع: تجربتي لمرسيدس cla 180 بالفيديو

السلام عليكم
العربية كانت مرسيدس CLA 180 موتور 1600 تربو 122 حصان
عجبني فيها
1) تابلوه مميز جدا و شكله هايل و طاره الدركسيون الفينيش بتاعها هايل و احساسها جميل
2)عجبتني الشاشة اللى ما بين العدادين و اللى ممكن تخليها تبينلك السرعة أرقام أو بيانات عن التسارع و الاستهلاك بس ألوانها رائعة
3)عفشة العربية مريحة نسبيا رغم ان الكاوتش كان 17 225/45
4)المساحات جوه مقبولة جدا و الكراسي شكلها هايل و رياضى نص جلد و نص قماش
5)العربية سريعة جدا لدرجة اني ممكن أقول بمنتهى الأمانة انهم مقللين عدد الأحصنة المعلنة لأغراض تجارية...
6)موضوع ان العربية معامل مقاومة الهواء فيها قليل جدا بيقلل ضوضاء الهواء لدرجة مذهلة على السرعات العالية...ممكن تمشي 200 لفترات طويلة و فعلا متحسش بحاجة

ما عجبنيش فيها
1) برضه التابلوه ترتيبه غبي جدا و الزاير كتير و نظام الكوماند بتاع مرسيدس متأخر عن البي ام 5 سنين مستريح
2) تصميم العربية بيخلي زاوية الدخول صعبة خصوصا لركاب الكنبة اللى راسهم بتخبط و هما بيركبوا العربية أو فى مطبات الهواء
3) العربية مش دفع خلفى و مينفعش تقارنها ب C class مثلا...لو بتحب تدخل ملفات بسرعات عالية فدي مش العربية اللى انت عايزها....مرعبة شوية لو دخلت ملف بسرعة و انت فى دماغك انها عربية دفع خلفى

الخلاصة: عربية جميلة جدا شكلا و مضمونا بس لو هتقارنها بالعربيات الألماني الدفع ألأمامي فى نفس نطاق سعرها...سريعة جدا فى الخطوط المستقيمة بس لازم تهدي شوية فى الملفات أو تجيب 316 F30 و لو عايز عربية عيلة فBMW X1 أوسع منها و أعلى بس تجربة مختلفة بالنسبة للتسارعات.

https://www.youtube.com/watch?v=-7JB...A4cYI5bB5K69uA