عايز اجيب كروز وخايف

**islamgohar** · 03-06-2014 03:05 AM

السلام عليكم ورحمة الله وبركاته ..

طبعا اول مشاركة ليا ولسة مسجل وفي الحقيقة سعيد بالخبرات الي كنت بقرا ليها في المنتدى هنا

عشان كدا مالقيتش افضل من اني اسال هنا

دلوقتي معايا في حدود ال 100000 او 110000 بالكتير وعايز اشتري مستعمل

والكروز شداني اوي بس لما قعدت اعمل سيرش عن اراء الناس لقيت في حاجات كدا او عيوب متكررة وكذا حد بيتكلم عنها

زي المكيف

زي العربية الي بتفصل ومش بتدور (بس مش عارف دا في الاوتو ولا المانوال )

وحاجة تالتة بقى ايه موضوع موتور الاوبل دا وانه احسن ودا بيكون ابتداء من موديل كام وهل صحيح الكلام الي بيقول ابعد عن موديل 2010 لانه عيوب وكدا وايه احسن موديلات الواحد يبدا يبص عليها

واسعار قطع الغيار وتوفرها
بصراحة اول عربية اجيبها ومبلغ مش هين بالنسبالي وعايز ابقى مطمن جدا

**midooo_119** · 03-06-2014 04:12 AM

العربيه جميله بس هات الموتور 1600 الجديد

**Emad Fathi** · 03-06-2014 05:33 AM

كانت معايا و عمرها مازعلتنى ومشكلتها الوحيده انها مش بتاعه شد وحرق و عايزه واحد بيحب السواقه لانها ممتعه جدا على الطريق وثباتها مش طبيعى والمشاكل كانت فى 2010 المانيوال فقط لانها اول موديل لكن بعد كده ولا الهوا اللى كانت معايا 2011 وزعلان على بيعها لحد دلوقتى وحكايه المكيف دى جديده لان اللى كانت معايا ممتازه يمكن قصدك السحب مع تشغيل المكيف وهو مش بطال زى اى عربيه التكييف بيبقى حمل على الموتور واستخير ودور على كسر زيرو 2011 او 2012 هتكون فى حدود المبلغ اللى مع حضرتك واى سؤال انا تحت امرك

**islamgohar** · 03-06-2014 06:13 AM

المشاركة الأصلية كتبت بواسطة emad fathi

كانت معايا و عمرها مازعلتنى ومشكلتها الوحيده انها مش بتاعه شد وحرق و عايزه واحد بيحب السواقه لانها ممتعه جدا على الطريق وثباتها مش طبيعى والمشاكل كانت فى 2010 المانيوال فقط لانها اول موديل لكن بعد كده ولا الهوا اللى كانت معايا 2011 وزعلان على بيعها لحد دلوقتى وحكايه المكيف دى جديده لان اللى كانت معايا ممتازه يمكن قصدك السحب مع تشغيل المكيف وهو مش بطال زى اى عربيه التكييف بيبقى حمل على الموتور واستخير ودور على كسر زيرو 2011 او 2012 هتكون فى حدود المبلغ اللى مع حضرتك واى سؤال انا تحت امرك

شاكر جدا ردك عليا يا باشا

انا كنت شايف على دوبيزل دكتورة بتبيع كروز 2011 هاي لاين ماشية 60000 بس بحالتها والكياس لسة عالفتيس والكراسي والهاندبريك والاشارات فبريكة يعني وطالبة 115000

ايه رايك في السعر دا

وعامتا كسر الزيرو اخره لحد كام كيلو كدا تقريبا

**Emad Fathi** · 03-06-2014 06:24 AM

لو العربيه فبريكه فده فى رأيى سعر عادل لانها هاى لاين لكن خلى بالك صيانه 60000 الف بتتكلف حوالى 3000 جنيه فلو مش عاملاها تخلص على 110 او 112 بشرط الحاله الممتازه وما تتغرش بالاكياس ممكن تكون محطوطه للتشويش على عيب ما واكشف عليها كويس وكسر الزيرو من 100 كيلو لحد 30000 الف اكتر من كده تبقى مش كسر زيرو وعامه العربيه بعد 100000 كيلو بتبدا تطلب حتى لو بى ام

**islamgohar** · 03-06-2014 06:42 AM

المشاركة الأصلية كتبت بواسطة Emad Fathi

لو العربيه فبريكه فده فى رأيى سعر عادل لانها هاى لاين لكن خلى بالك صيانه 60000 الف بتتكلف حوالى 3000 جنيه فلو مش عاملاها تخلص على 110 او 112 بشرط الحاله الممتازه وما تتغرش بالاكياس ممكن تكون محطوطه للتشويش على عيب ما واكشف عليها كويس وكسر الزيرو من 100 كيلو لحد 30000 الف اكتر من كده تبقى مش كسر زيرو وعامه العربيه بعد 100000 كيلو بتبدا تطلب حتى لو بى ام

تحياتي ليك ياباشا