تويوتا ياريس 2015 سيدان 1500 سى سى

**أيمن كور** · 04-06-2014 10:22 PM

السلام عليكم اعضاء المنتدى الكرام
الحمد لله بعد لف كل اقسام المنتدى على مدى اكتر من سنة و البحث عن سيارة قررت انى أحجز نيسان صنى سوبر صالون 2014 و الموضوع انتهى و دفعت المقدم و انتظرت ميعاد التسليم
المهم اتصل بيا المندوب من المعرض و قاللى العربية ممكن تتأخر يومين علشان مش لاقى اللون و لون الفرش المهم روحت على المعرض علشان يا يتصرفوا فى عربية أو اسحب فلوسى ( أنا دافع أوفر برايس يا باشا )

المهم اتصرفوا فى عربية هاتيجى على كساحة من القاهرة و خلاص تمام على كده

لقيت عربيات ياريس امام المعرض لسة التريلا بتنزلهم و بسؤال المندوب قاللى دى الياريس 2015 سيدان و المفاجئة انها 1500 سى سى

التمن 145000 ... قولت السعر كتير و دى الفئة الاولى اوتو ..

الحقيقة انا قارنت بين الاوبشن اللى فى النيسان و هو كتير فعلا و و التويوتا تعتبر مافيهاش (الدلع) بتاع النيسان هههههههههه

المهم بعد الموضوع ما خلاص رسى انهم هايجيبوا العربية النيسان ... قرار مفاجئ منى الغى كل حاجة انا قررت احجز التويوتا ياريس 2015 سيدان 1500 سى سى الاغلى سعرا و اقل اوبشن

مش عارف انا اخترت صح ولا غلط و لا إتسرعت و لا إيه ؟!!

دى القصة و انتم قسم تويوتا و أكيد متحيزين ليها ... بس إيه رأيكم فى اللى أنا عاملته ده ؟!!!

**mohamed hussei** · 04-06-2014 10:34 PM

اية اوبشن تويوتا

**م/محمد صلاح** · 04-06-2014 10:44 PM

انت عملت الصح .. والله الياريس لو مافيهاش اي اوبشن فهى احسن من الكلبه اللى اسمها صنى ... انا لا معايا نيسان ولا تويوتا .. لس ركبت الصنى والله كلها بلاستيك
مبروك مقدما وقرار صائب

**Mohamed.Hany** · 04-06-2014 10:54 PM

انا شايف ان حتي لو الياريس اقل اوبشنز بس احنا مسمعناش مشاكل عنها عكس الصني اللي مليانة مشاكل في التيل و الطنابير و بلي العجل و العفشة و خفة الصاج و نوع الكاوتش.
اه هي اغلي و فاضية بالنسبة للصني بس اقيم و تقفيل انضف و بدون مشاكل حتي الان .
ربنا يوفقك في اختيارك ان شاء الله سواء دي او دي المهم انت تبقي مقتنع بالعربية عشان متقفلش منها.

**abohend** · 04-06-2014 11:30 PM

الياريس لو 1500 أكيييييد أفضل من الصني

بس بدل وصلت ل145000
يبقى حط 5 و هات الكروز
و بعض المعارض ب148000

الكروز أفضل من الأتنين
و تبقى جمعت بين الأبشنز و الفخامة و الثبات و الأعتمادية

أنا لسه راكب الياريس و الشارك و الكروز إمبارح فالمصرية

الياريس كويسة مش وحشة
الشارك فقيرة جداً كصالون
الكروز الأفضل كخامات و تقفيل و فخامة...أظن الكروز الأختيار الأفضل في الفئة دي

**mohamed haggag** · 05-06-2014 01:55 AM

متأكد انها 1500 سي سي ؟؟
ولو كدة مواصفاتو اية الماتور دة من عدد الأحصنة والصمامات والكلام دة ؟؟
وصناعة وتقفيل العربية اية ؟؟

**magdy_c_c** · 05-06-2014 02:56 AM

المشاركة الأصلية كتبت بواسطة skoda1996

ياريس 1500 ؟؟
لو مكنتش جبت كروز كنت هجيبها اكيد
انسي الصني تماما و نهائيا

ليه ؟؟؟؟؟؟؟؟
هو حضرتك شايف الكروز وحشة فى ايه؟؟؟
ولا الياريس أفضل من الكروز فى ايه ، ياريت تحكى لنا على تجربتك مع الكروز علشان ناوى اشتريها ، و لسه دلوقتى حالا ً شايف البوست اللى بيقول ان الياريس بقت 1500 سى سى !!!
فكده ممكن اعاود التفكير تانى
بصراحة كده ايه عيوب الكروز من وجهة نظرك غير ان الكنبة الخلفية ضيقة و المسافة بين الكرسى الأمامى والكنبة الخلفية ضيقة أيضا ً
ياريت تنورنا و لك جزيل الشكر

**zook** · 05-06-2014 03:09 AM

عشان كده ياريس 2014 1300cc هاى لاين 155 بدل 165 10 الاف خصم عشان يخلصو منها
تعرف سعر هاى لاين بتاع 2015 ياريس 1500ccكام ؟

**أيمن كور** · 05-06-2014 03:22 AM

أولا أشكركم على الردود و بالنسبة للكروز انا شفتها عند بلال موتورز ب 155 الف شكلها كويس و خامتها كويسة بس مش جاية معايا ... أذواق و احساسك بالعربية يفرق.

المهم بالنسبة للمواصفات اللى متذكرها دلوقتى ودى للفئة الاولى أوتو :
1- موتور 1500 ودى طبعا متأكد منها و سبب رئيسى لشرائها
2- 107 حصان 4 سليندر
3- ايرباج للسائق و الراكب الامامى - زجاج كهرباء - سنتر لوك - كاسيت mp3 +AUX+USB
4- الفرامل ABS + EBD+BA
5- مفتاح ريموت عادى ( فتح و قفل الابواب فقط) - الشنطة و التانك من الداخل أو الشنطة بالمفتاح زى زمان ...هههههههه...
6- أربع سماعات
7- مافيش جنوط ( فى الفئة الاعلى و ما أعرفش بكام) مافيش فوج لايت بس مكانه واضح انه تركيبه بسيط و اعتقد وصلاته سهلة
8-العربية تقفيل تايلندى التقفيل نضيف جدا و الخامات جيده جدا و جلد على التابلوه و الدريكسيون و الفتيس
9- التكييف بكرة عادى مش اوتوماتيك بس شكله معقول
10- الموتور VVT-I
11- العدادات رجعت الحمد لله مكانها مش فى نص العربية زى الموديلات القديمة و شكلها كويس بس مافيش مؤشر الحرارة
12- الفتيس أربع نقلات و حارات

دى الحاجات اللى فاكرها اعتقد انها كافية علشان اعرف رأيكم و طبعا لو حد من الاخوة شافها ممكن يساعدنى لو نسيت حاجة

و ياريت طبعا نصائحكم الغالية لأنى أول مرة أركب تويوتا و ماعنديش اى فكرة عنها

حاجة تانية و انا بكلم مسئول المبيعات على التليين قاللى حاجة مش عارف صحيحة و لا لأ خاصة بالتليين .. ان ده مفهوم قديم و تاخد العربية تمشى بيها عادى و تشغل التكييف عادى ؟!!!

مش عارف أصدقه و لا ايه؟

و شكرا......