الموضوع: استفسار : قطع غيار وصيانة جولف 5

المشاركة الأصلية كتبت بواسطة mino2824

يا جماعة محتاج مساعدتكو عشان انا بفكر اجيب جولف 5 موديل 2006 او 2007 بس ديه هتبقى اول عربية اشتريها فا عايز اعرف بالنسبة لاسعار قطع الغيار والصيانة بتاعتها هل اسعار عالية اوي مقارنة مثلا بالسيراتو ولا الاسعار قريبة ياريت مساعدتكو عشان ناس كتير بتقولي بلاش الجولف خليك في السيراتو او اللانسر عشان قطع الغيار والصيانة تقدر عليها.

شكرا مقدما

شوف يا اخ mino العربية الجولف عربية ممتازة وهى رقم 1 فى الهاتشباك فى العالم بس فى حاجات عاوزك تخليها ادام عينك الا وهى
حالة العربية لان العربية دى كل الى بيركبها شباب فا هتكون متبهدلة
العربية مغيرة موتور ولا لا
الصيانات الدورية بتاعتها وهل الفتيس بتاعها فية مشاكل ولا وهل تم تغير زيت الفتيس ولا لا لان لازم تغير زيت الفتيس كل 60 الف كيلو متر بالنسبة للموتور 1600 الى بينزل فيها

بالنسبة لقطع الغيار موجود منها الاصلى والى تحت الاصلى يعنى مثلا التيل انا بغيرة فى عربيتى الجيتا هى هى الجولف ب حوالى 600 جنية كل حوالى 25 او 30 الف كيلو على حسب الاستخدام

المساعدين مثلا فى الجيتا الاصلى ب 2200 انما ممكن تجيب بديل لية وتركبة ب 700 او 800 جنية وهيقضى نفس الغرض وفى كمان قطع غيار استيراد

بالنسبة للصنايعية والميكانيكية بتوع فولكس كتير ومتوفرين برة وموجود الكمبيوتر بتاع العربية برة فا مش هتغلب فى صيانة او تصليح

بالنسبة للصيانة كل 10000 كيلو وفى العادى بتتكلف حوالى 500 او 600 جنية منهاا حوالى 350 جنية زيت ومش متذكر كام بظبط وتربيط عفشة وتدخيلها على الكمبيوتر وغسل الموتور والشغل دا

والصيانة ال 10000 الى بعدها بتخش معايا فى 800 او 900 لانى كل 20000 كم بغير فلاتر وبوجيهات عشان اداء العربية واستهلاك البنزين لان البنزين فى مصر سيئ

ولو محتاج تستفسر عن اى شيئ فى العربية انا تحت امرك وانا برد عليك من واقع استخدامى للجيتا الى هى نفسها الجولف الى بشنطة