الموضوع: الحمد لله إستملت نيسان صنى سوبر صالون (إنطباعى عنها)

السلام عليكم ,, أعضاء المنتدى....
- ده تانى موضوع لية فى المنتدى .. الاول (هاستلم صنى سوبر صالون ومتردد .. ‏) طبعاً الردود ناس شجعتنى وناس جننتنى ... لأنى بقالى سنة بالظبط قريت عن عربيات كتير وقولت ميزانيتى أقصاها كذا وبرده ناس تقولى هات فئات أعلى .... طبعاً الشارك تانى فئة إختيار جيد بس لو حسبتها من الناحية السعرية تلاقى نفسك بتدخل فى فئات وإختيارات أخرى...

الحمد لله إستملت نيسان صنى سوبر صالون من سمير ريان ب 125500... لون برونزى (تحفة)
رخصت الحمد لله يوم الخميس فى مرور الوراق ... إتكلفت 770 بالإكراميات و130 مندوب سمير ريان يعنى 900 جنيه كله (الحمد لله) عملت بالعربية 450 كيلو .. ورجعت السعودية علشان أنا كنت فى إجازة ....

- الانطباع الأول ... كويسة , عالية , المساحة الداخلية كبيرة , القيادة مريحة , كرسى السائق بيعلى , الرؤية فى المرايات الجانبية ومراية الصالون جيدة, المرايات بتقل كهرباء.

- طبعاً أنا طبقت تعليمات التليين من موضوع فى المنتدى بحذافيره (ربنا يبارك للى كتبه)

- إستلمت بالليل , وشيكت على العربية الصبح , كانت عاملة 80 كيلو لما إستلمتها .

- الملاحظات :

1- التقفيل كويس بس الفوانيس الأمامية مش مريحانى لأنها المفروض بيكون فى كاوتش حوليها وحاسس أن الفانوس الشمال كويس فى التقفيل مع الكابوت والرفرف والإكصدام إنما الشمال فيه فرق بسيط ..
2- المفروض يكون فيه كاوتشة بين الكابوت والإكصدام ..لأن الفرق بينهم واضح.
3- المرايات بتقفل كهرباء أنما مفيهاش إشارات زيى السعودية والإمارات.
4- مفيش حساسات خلفية وأنا عارف من الأول أنى مفيهاش مع أن المفروض تنزل بيها.
5- التكييف تاتش غير الاستلامات القديمة وده عرفته من المنتدى قبل ما إستلم ...
6- مقابض اليد فوق الأبواب فيه أتنين ورا وواحد فى الكرسى الأمامى مش كرسى السائق وبرده عرفت الكلام ده من المنتدى.

- الإستفسارات: أرجو الرد بالتفصيل من أعضاء المنتدى؟

1- ماذا يتم عمله فى صيانة الألف وماهى التكاليف ؟
أنا قريت عن تفعيل السنتر والإنذار - وهاراجع معاهم موضوع الفوانيس الأمامية - وتغيير الزيت قريت برده انه يفضل 5000 الاف (ياريت النوع أجيبه من برة ولا أعمل أيه) - تربيط العفشة (هما بيعملوه ولا لازم أقولهم عليه - بيشيكوا على أيه تانى فى العربية - الفرامل والتيل والطنابير (المشكلة اللى كله بيتكلم عنها ) هيشيكوا عليها ولا لازم أقولهم برده .(مع العلم أنى معنديش أى مشكلة خلال المسافة البسيطة اللى قطعتها فى الفرامل)

2- تركيب الحساسات ؟ ممكن أنا إشتريهاوهما يركبوا ... ولا لازم كله يكون جوة التوكيل. (شراء وتركيب)

3- تيل الفرامل أجيبه من السعودية (والنوع هيكون أيه)

وشكراً لكل أعضاء المنتدى ... على كل موضوع إستفدت منه ...

مبروووك العربية يا باشا