الموضوع: محتاج مساعدة فى شراء sym symphony

المشاركة الأصلية كتبت بواسطة ashawkyh

الزملاء الأعزاء ... محتاج بعد أذنكم تساعدونى .... إن شاء الله أنا هشترى symphony .. عايز أعرف هستلم معاه أيه ؟ و كام مفتاح ؟ وهل فى كتالوجات ؟ و أخد بالى من أيه و أنا بستلم ؟ و المفروض يبقى عداد الكم زيرو ؟ و مصاريف الترخيص كام ؟

شكرا مقدما لمساعدتكم

الف مبروك مقدما.

هتستلم:

- 2 مفتاح
- كتالوج
- عده (مفتاح بوجية و مفك)
- العداد المفروص 0 و يركب البطارية قدامك و يدوروا
- بعد تقريبا 21 يوم هتستلم الورق (الافراج و المبايع) و تروح المرور التابع لية للترخيص.
- مصاريف الترخيص مش فاكر معلش


هتستلم منين ان شاء الله؟

اي استفسارات تانية ياريت تشرفنا على الجروب ASRC

https://www.facebook.com/groups/Alexriders/

المشاركة الأصلية كتبت بواسطة ashawkyh

شكرا أستاذ محسن ... الحمد لله أنا أشتريته من السعد و أستلمت كل حاجة حضرتك قولت عليها و أخدته ب 10300 بس عايز أحكى لحضرتك على حاجة صغيرة

المفروض كنت هجيبه من Avengers فى جليم على الترام رحتله يوم الثلاثاء و قالى عندى أتنين واحد معروض و كان محكوك فى الفانوس و الرفرف و الشكمان بسبب النقل و كان هيدهولى على 10000 و التانى فى المخزن مافيهوش حاجة ب 10500 أنا كنت عايز اللى فى المخزن قولتله ممكن بكره أو بعده أشتريه إن شاء الله .... رحت أنهاردة قالى اللى فى المخزن أتباع أمبارح قولت خلاص نصيبى فى ده و مكنش عايز ينزل عن 10000 و كنت أتصلت ب car gate قالولى معندناش خالص قولت خلاص أجيبه عشان أنا نفسى فى ال Symphony فولتله تمام ياباشا و خد الفلوس عدها و لقيته بيدور السكوتر علطول قولتله أنت حاطط البطاريه ليه قالى كل اللى فى المعرض كده قولت ماشى عديها و بقوله طب عايز المبايعة قالى كمان 20 يوم قولتله همشى بيه أزاى قالى عادى لو حد واقفك حتى لو معاك مبايعة ممكن ياخده منك قولتله كده مش هينفع حتى نعمل ورقة بخط الأيد عشان متمسيكش قالى مش هينفع و كمان لما فتح كيس الكتالوج كان واخد ورقة EC certificate of conformity و قالى دى بتعتى ملكش دعوة بيها هطلعلك بيها ورق الترخيص بصراحة قفلنى منه قولتله شكرا مش هينفع أخده غير بورقة المبايعة و أخدت الفلوس و مشيت و نسيت عنده البطاقة نصيبى بقى :)...رحت ل Alex Riders عشان كان عندهم واحد ماشى 150 كم ب 10250 لقيته أتباع أمبارح ... قولت هاروح للمحل اللى فى سبورتنج على الترام أنا مكنتش أعرف أسمه لمحته من أسبوع و أنا معدى بالعربية لما دخليت لاقيت واحد واقف و مش مركب المرايات سالته بكام قالى ب 10300 و رحت جبت بنزين ماكنش فيه بنزين فى المحل و الراجل حط البطارية و أدانى المبايعة الحمد لله و كله كان تمام الحمد لله :)

الف مبروك يا باشا

معلش هو avengers معمله ساعات مبتكنش كويسة بس اللي انت عملتة الصح, انت معاك فلوسك و تشتري براحتك من اي مكان.

اهم حاجة السيفتي على الاقل خوذة و جونتي

تقدر تشرفنا في ASRC بس ترخص و تطلع رخصة قيادة

المشاركة الأصلية كتبت بواسطة ashawkyh

شكرا لحضرتك :) إن شاء الله ناوى أجيب الخوذة و الجونتى ...بس لسه بدور على نوع خوذة كويس شفت على Jumia.com كام واحدة بس غاليين من 1000 و طالع ... أنا معايا رخصة قيادة دراجات نارية بس هستنى لما ورق السكوتر يوصل عشان أعرف أتحرك بيه ... و إن شاء الله أنضم ليكم أنا متابع ASRC و بشوفكم على البحر كل يوم جمعة أنا معجب بفكرة ال club جدا

ممكن أعرف من حضرتك أعمل صيانات السكوتر أزاى ؟

حاجة أخيرة عجبانى صورة ال sharmoofers :)

روح لرامي سعد في سموحة في الشارع بتاع delight عنده تشكيلة helemts حلوة و اسعار كويسة و هو عنده مركز صيانة في سان ستفانو برضو.

انا بسمع شارموفرز من زمان :)

المشاركة الأصلية كتبت بواسطة ashawkyh

أ/ محسن ... لو سمحت سؤال هو زيت ال transmission بيتغيير .. لقيت مكتوب فى الكتالوج أنه بيتفيير بعد أول 300 كم و بعد كده كل 5000 كم أو 5 شهور

و برضه زيت الماتور بعد أول 300 كم و بعد كده كل 1000 كم

بس مكتوب أنواع زيت مخصوصة هل ديه متوافرة ولا أستخدم موبيل..شكرا لحضرتك

ال transmission بيتغير زي ما الكتالوج بيقول و زيت مختلف 85W-140 عن الموتور و اوعى حد يفتي و يقولك هو هو


زيت الموتور كل 1000 -1500 كم