الموضوع: معاناتي في إصلاح عقل الفتيس في الحرفيين

كل عام وأنتم بخير اولا
ثانيا انا كنت كتبت موضوع ان العربيه فيها نتش وساعات لا ومع التكييف تقريبا مفيش ، وبعد الذهاب التوكيل رفضوا يغيروا الزيت وطلعوا العيب عقل فتيس ب١٦ الف غير الضريبة والمصنعية.
طبعا صاحب العربيه باعها ليا وقالي عالعيب وانا عزمت علي إيجاد الحل .
المهم
بعد بحث طويل لقيت ان فيه واحد اسمه الشيخ احمد في الحرفين بيغير طقم البلوف بتاعت الفتيس وبيدي ضمان ٦شهور . طبعا روحتوا لقيت عندوا عربيات كتيييير واتفقت معاه عال تكلفه ١٧٠٠ جنيه غير الزيت الي جبتوا من عند الشهابي .
روحت تاني يوم للشيخ احمد بدري والورشه كانت لسه مفتحتش . المهم روحت لحد مشهور بتاع قطع غيار استيراد أساله عن حاجه وقلت اما اعرض عليه المشكله ، قالي ان الشيخ احمد بيركب طقم بلوف صيني .. !!
طبعا قلقت جامد. قالي انوا عارف واحد عندوا الحل المهم كلمه في التلفون وجالي ، شاب عندوا ورشه هناك قالي أنو بيصلح العقل ب٣٨٠٠ وقالي حل تاني أجيب عقل استيراد ب٦٠٠٠ طبعا لقيت المبلغ بتاع الاستيراد معقول لو نزل وأريح دماغي خصوصا انه قال ان العقل الي عندوا بتاع فانتازيا مبيبوظش زي الي عندي وعليه ضمان سنه وزي الزيرو..
طبعا فاصلت معاه لغايه ٥٢٥٠ .. وكان هياخد العقل بتاعي ويخلص ب٥٠٠٠وانا مرضيتش قلت العقل بتاعي ممكن احتاجوا يوم ..
بدأنا في حل الكارتيره لأجد مفاجأة كبيره الزيت متغيرش خالص وصاحب العربيه قال انه غيروا قبل كده ...
المهم نزل العقل بتاعي وطبعا انا خدتوا علي طول في كيس وشلتوا في الشنطه عشان الصنايعية ميبوظهوش .. وسالتهم أذيعوا بكام بره قالوا مش هييجب ٥٠٠ جنيه لو حالتوا حلوه
المهم ركبنا العقل وحطينا الزيت الجديد والفلتر وطلعنا نجرب .. العربيه بتهبد وترزع جامد جدا بشكل غريب طبعا المهندس قال ان ده طبيعي لغايه اما العقل يحضر نفسه والزيت يتزبط ..
رجعنا وقال سيبها تبرد وننزل تاني ًجربنا مره تانيه المشكله اكبر قالي الزيت ناقص حطينا الكيلو السادس وطلعنا نجرب الزرع خف شويه ورجع تاني .. المهم رجعت مخنوق ًقالي اطلع مشوار ٢٠٠كيلو وهتتزبط طبعا انا لو مشيت وأديتوا الفلوس شكرًا .. وممكن وانا ماشي الفتيس يشيع او يحصل حاجه تانيه لاقدر الله .. روحت للراحل بتاع قطع الغيار بسالوا عن حاجه وقلتلوا العقل بتاعي عايز أبيعوا قاللي هاتوا وانا ابيعهولك وممكن يركب علي عربيه تانيه يزبط ؟؟؟
الفار وش لعب في عبي وحسيت ان انا فقعت في الوخ!!!
رحت للمهندس ًقلتلوا ان مش هروح بالعربية كدة ونزل عقلك ورجع بتاعي
طبعا أتنرفز جدا وخلي الصنايعي يحل العقل طبعا الزيت نزل تاني ولقيت الواد بيقولي علي فكره انت عقلك كان حلو وكان عايز يغير زيت وممكن كان زبط ..
ًقلتلوا مقلتش ليه من الصبح !!
قالي انت جيت تغير وانا عبد المأمور
كرمشتوا عشرون جنيه وقلتلوا زبط العقل بتاعي
الواد غسله بالبنزين كويس وبص عالبلوف لقي بلفين ضغط الزيت مسدودين .. قالي لازم يتغيروا وهيبقي جديد
كرمشتوا تاني راح فكلي اتنين من عقل كان في فتيس مفكوك وركب وحط الزيت ومشيت
الفتيس رجع زي الاول وأحسن
المشكله كانت بسيطه بس الناس هناك معندهاش ضمير وكلوا عايز يشتغل الزبون
الحمد لله