تجربتى فى السفر بفيات سيينا 2007

**AAAH** · 24-06-2014 09:01 AM

السلام عليكم ورحمة الله وبركاته
العربيه بتاعه صديق ليا كنا اشتريناها انا وهو من حوالى 4 شهور وهى فيات سيينا 2007 كانت عامله 80 الف كيلو وفبريكة بره وجوه والحمد لله ماكانش فيها خدش
المهم روحنا بيها اسكندريه امبارح 23-6-2014 علشان نخلص ورق خاص به وسوقتها حوالى 300 كيلو منهم حوالى 80 كيلو جوه اسكندريه
مميزات العربية من وجهة نظرى:
1- واسعه جدا من جوه ما شاء الله
2- تابلوه وعدادات شكلها جميل
3- قعدتها مريحة جدا
4- التكييف مابيأثرش على السحب بشكل ملحوظ
5- ثابته جداااااااااا على الارض ووصلت بيها لسرعه 150 كيلو/ساعه وثباتها ما شاء الله اكتر من رائع
6- الباور اكتر من ممتاز والطارة بتلف لفه كبيره وكل الملفات كنت باخدها على مره واحده
7- حرارة ممتازة مازادتش عن النص طول الطريق رايح جاى حتى مع تشغييل التكييف
8- فرامل تحفه وبتمسك بمجرد الضغط عليها حتى مع السرعات العاليه
9- فتيس ناعم جدا وسلس فى التنقل بين الغيارات
10- استهلاك بنزين ممتاز جدا حتى مع تشغيل التكييف (روحنا ورجعنا بنفس التانك ومشينا بيها اكتر من 550 كيلو)
11- شنطتها كبيره جدا (بحر) ومش مأثره على الكنبه اللى ورا زى الموديلات القديمه من السيينا
عيوب العربية من وجهة نظرى:
1- سحب العربيه فى الاول والتانى ضايع وبداية السحب من التالت يعنى الاول يادوب بيحرك العربيه بالعافيه ولازم تدى التانى بعده مباشره والتانى مافيهوش عزم خالص فلازم تدى التالت علشان العربيه تسحب وكل ده ورا بعضه بطريقه مرهقه وغريبه فى نفس الوقت ماشوفتهاش فى اى عربيه تانيه
يعنى انا لو بعدى مطب اديها الاولانى قبل المطب والتانى وانا على المطب والتالت بعد ما انزل من على المطب على طول (ومش عيب سواقه والله) لانى جربت اكمل على التانى بعد المطب بس العزم والسحب ضعيف جدا وبيخلى اللى ورايا يزهق على ما العربيه تاخد سرعتها
2- تكييفها متوسط يكاد يكون ضعيف حتى على اعلى سرعه فيه
هو شغال واحسن من الحر طبعا بس كفائته لا ترقى لتكييف اليابانى او الالمانى او حتى الكورى

غير كده العربيه ممتازة بالنظر لسعرها والاوبشنز اللى فيها
وربنا يباركله فيها ويديه خيرها ويمنع عنه شرها

**akmm** · 24-06-2014 09:48 AM

شكرا للتقرير ............

**ahmedfor3** · 24-06-2014 10:54 AM

اشترتها على كام

**AAAH** · 24-06-2014 11:44 AM

استاذ akmm
الشكر لله يا باشا
استاذ ahmedfor3
العربيه مش بتاعتى بتاعه واحد صاحبى وكنت معاه وهو بيشريها واشتراها ب 46 الف

**graffittiii** · 25-06-2014 06:46 AM

شكرا علي التقرير ...
أنا العربيات الفيات اللي كنت بسوقها ( نسخ عادية مش سبورت ) الأول فيها عشان تحرك العربية من مكانها بس ومشواره قصير وبيموت بدري جدا .
*_ بس حكاية التاني دي غريبة شوية لان المفروض التاني والتالت في مواتير الفيات الصغيرة هي المنطقة اللي فيها أحسن تسارع تقريبا ..
*_ ومستغرب بردو من موضوع إنها ثابته علي 150 دي .
ومبروك لصاحبك العربية ربنا يديله خيرها وشكرا ليك علي نقل التجربة
.

**AAAH** · 25-06-2014 02:04 PM

المشاركة الأصلية كتبت بواسطة graffittiii

شكرا علي التقرير ...
أنا العربيات الفيات اللي كنت بسوقها ( نسخ عادية مش سبورت ) الأول فيها عشان تحرك العربية من مكانها بس ومشواره قصير وبيموت بدري جدا .

*_ بس حكاية التاني دي غريبة شوية لان المفروض التاني والتالت في مواتير الفيات الصغيرة هي المنطقة اللي فيها أحسن تسارع تقريبا ..
*_ ومستغرب بردو من موضوع إنها ثابته علي 150 دي .
ومبروك لصاحبك العربية ربنا يديله خيرها وشكرا ليك علي نقل التجربة

.

الشكر لله يا باشا
هو الاول فعلا ولا ليه اى لازمه والتانى فعلا مشواره صغير جدا ومفيهوش عزم وممكن تنقل منه على التالت على سرعه 20 او 30 علشان العربيه تسحب ودى حاجه غريبه بصراحه
والعربيه فعلا كانت ثابته جدا عند 150 وكنت باخد بيها غرز على السرعه دى واتنقل من حارة لحارة والعربيه ما شاء الله منتهى الثبات والله

**J A G U A R** · 25-06-2014 04:39 PM

مشكور لنقل التجربه

**AAAH** · 25-06-2014 06:22 PM

المشاركة الأصلية كتبت بواسطة ahmedfouad

غريب موضوع الغيارات ده
مكن يكون فى مشكلة فى الفتيس
او محتاجة صيانة او رشاشات ؟
يا ريت لو حد معاه العربية يفيدنا فى الموضوع ده
لانى كنت بفكر فى العربية
و46.000 مش كتيير كسعر ؟
مشكور على التقرير

العربية حالتها ممتازة يا باشا زى الزيرو بالظبط
انا دورتلك شويه لقيت الموضوع ده فعلا حقيقى وده بعض الكلام اللى اتقال من مالكى السيارة

هو المعروف ان النقلات فى فتيس السينا قريبه يعنى انك ماتقرصش على الغيار وتنقل مثلا على rpm 3 ولما توصل للخامس تفتح معاك
بس عن نفسى يعنى وجهة نظرى لو انت فى داخل البلد تعمل اللى فات بالظبط عشان ماتحرقش بنزين كتير وتتعب الماتور معاك
بس لو انا مسافر يعنى طريق طوالى بحب اعمل الاتى:
ادى الغيار التانى على rpm 3
والثالت على 4 او rpm 5
والرابع على 4 او rpm 5
والخامس برده على 4 او rpm 5
تحياتى

اللفات متناغمه مع السرعه و مفهاش مشكله
بس عندي احساس ان الماتور صوته بيخلص النقله بدري
يعني التالت اخره 55 عند النقل علي 3
و الرابع 70 تقريبا
الخامس بيجيب ال90 علي rpm تقريبا ما بين 2.5 لتلاته

ده العادى السيينا روح النقله فيها قصير جدا
بس التجميع و السحب سريع
اللفات على السلانسيه من 8 الى 8.5
دمت بود

وبالنسبه للسعر هو عالى شويه بس الراجل مارضيش ينزل مليم عن كده والعربيه بصراحه كانت حالة نادرة جدا جدا وكان معانا ظابط مهندس ميكانيكى طيران وعفريت فى موضوع العربيات وفحصها وهو اللى شجعنا اننا نشتريها بالسعر ده وقالنا العربيه تستاهل فتوكلنا على الله وجبناها
وعلى فكره موضوع السحب ده بيتغير تماما بعد التالت وفى الرابع والخامس السحب تحفه وصاحبى بيعرف يتعامل مع الفتيس بمهاره وحرفنه بصراحه انما بالنسبه لى علشان مش متعود الموضوع كان صعب لأنى متعود اوصل ل 50 بالتانى فى عربيتى وممكن ابتدى الرابع من 80 والخامس بعد ال 100 واعتقد ده الغالب فى معظم العربيات

**S O P H O S** · 27-06-2014 01:43 PM

مشكورر عالتقرير

-

الموضوع: تجربتى فى السفر بفيات سيينا 2007

LinkBack

أدوات الموضوع

عرض

تجربتى فى السفر بفيات سيينا 2007 - انشر الموضوع فى :

-

-

-

-

-

-

المواضيع المتشابهه

تجربتى فى تغيير جوان مقياس الزيت / كاوتش كوبلن - سيينا 1400 - بالصور و نتائج مهمه

تجربتى باختصار فى تنظيف فلتر طلمبة بنزين سيينا 1400 بالصور..

تجربتى فى السفر الى مرسى مطروح بالستروين Ax

تجربتى فى تغيير كاوتش كوبلن - سيينا 1400 - بالصور و نتائج مهمه

تجربتى مع 620 فى السفر

الكلمات الدلالية لهذا الموضوع

المفضلات

المفضلات

ضوابط المشاركة