الموضوع: بالصور : طريقة فك فلتر الهواء في لوجان أوتوماتيك

بسم الله الرحمن الرحيم

في الأيام إللي فاتت بعض الناس سألت عن طريقة فك فلتر هواء اللوجان الأوتوماتيك في جروب الوجان على الفيسبوك وهنا في المنتدى، وبما إن الفضول عندي زيادة حبتين قولت أجرب أستكشف طريقة فك الفلتر وفي السطور القادمة خطوات فك فلتر الهواء مصحوبة بفيديو وصور.


في البداية مش هنحتاج أدوات في العملية دي غير إيدينا + مفتاح إلن نجمة (خد بالك نجمة مش سداسي) مقاس ٢٥ أي torx 25 أي T25 ...





بالنسبالي أنا عندي طقم عدة لقم وفيه كذا لقمة نجمة وده إستخدامة أسهل إن كان متاح








نيجي لعملية الفك نفسها، في البداية يمكن معظمنا كان فاكر إن العلبة السوداء على يمين الموتور هي فلتر الهواء، لكن بعد ما بدأت أفك إكتشفت إن الفلتر هو الجزء إللي بعد العلبة السوداء والعلبة السوداء جواها فقط مجري بدون أي فلتر ومش عارف الحجم دة مخبي إيه جواه، وتبقى حيرة هي إيه العلبة السوداء دي وإيه فايدتها، لو حد يعرف ياريت يفيدنا، ودي صورتها ...



الجزء الأول من عملية الفك قدرت أصوره فيديو، وهو فك العلبة السوداء دي عشان نوسع مكان نقدر نفك فيه علبة فلتر الهواء نفسها، وده مجرد فك أجزاء بلاستيك متثبته في بعضها بدون أي مسامير، بس هنشيل الحزام الكاوتش إللي مثبت ماسورة الهواء إللي جاية من الشبكة الأمامية والباقي يتفك من بعضة زي ما موضح في الفيديو ...

[youtube]http://www.youtube.com/watch?v=N21lNPxqQtQ[/youtube]

بعد ما نوصل للمرحلة إللي وصلنالها في الفيديو، هنلاقي قدامنا المنظر ده، ودي هي علبة فلتر الهواء مش إللي فكيناها في الفيديو ...



معلش الخطوات إللي بعد كده صور بس من غير فيديو عشان كنت محتاج أتعامل بالإيدين الإثنين ومكانش فيه حد يمسكلي الكاميرا عشان متتهزش.

دلوقت بقى هنمسك المفتاح أو المفك إلن نجمة مقاس ٢٥ ونبدأ نفك المسمارين الوحيدين إللي مثبتين علبة الفلتر والموضحين في الصورة ...



نفك المسمار الأول



ثم المسمار الثاني



هنلاحظ إن المسامير مش لازم تطلع خالص من العلبة، هتفضل ماسكة في الطرف المتحرك من العلبة، دلوقت هنلاقي العلبة بدأت تسيب من فوق لكن لسه شابكة من تحت، هنميلها شوية لحد منلاقيها بتطلع معانا لفوق من غير مقاومة عشان منكسرش حاجة ...





وهنلاقي إن العلبة ماسكها من تحت مشبكين بس ومن فوق طبعا المسمارين إللي فكيناهم، ودي صورة المشبكين إللي تحت ...



وبعدين نطلع الفلتر نفسه من جوه العلبة بتاعتة بإننا نسحبة من البرواز الأحمر بتاعة إللي يعتبر زي جوان منه فيه عشان يعزل الفرق بين نصفين علبة الفلتر ...





إنت كده دلوقت تقدر تنظف فلتر الهواء بكمبريسور هواء أو تغيره بواحد جديد بنفسك، وتعكس الخطوات عشان تقفل الدنيا وترجع كل حاجة زي ما كانت. الموضوع سهل وبسيط بس عايز حد متعود يتعامل مع الأدوات والفك والتركيب.

بكده يكون موضوعنا إنتهى وأتمنى يكون مفيد ونفع الناس إللي غاوية تشتغل بإديها فعربياتها

ماشاء الله تسلم ايدك
موضوع مفيد جدا
ربنا يباركلك