مشكلة كبيرة جدا جدا في العربية.........الرجاء سرعة ارد

**Omar2017** · 29-06-2014 03:01 AM

السلام عليكم
كل عام و انتم بخير و رمضان كريم
انا عندي مشكلة كبيرة في العربية مدوخاني اللي هي المية بتنزل جامد من العربية
الاول كانت من الريداتير غيرتة بريداتير استثماري (صيني) من 4 ايام العربية مشيت زي الفل لمدة يومين اول امبارح مشيت على كورنيش اسكندرية الساعة 3 العصر و كنت مزودها على الاخر لغاية الماكس قولت اقف اجيب جيلاتي من عند عزة روحت جيبت و انا راجع لقيت بركة تحت العربية افتح الكبوت الاقي القربة هتنفجر من المية اللي طالعها منها و انا قافلها على الاخر اية المشكلة؟
دورة المية؟

**NightmarE84** · 29-06-2014 03:25 AM

اكشف على دورة التبريد وشوف هل فى خرير ولا لا ؟

واتاكد من العربية مش واخد هواء

وشوف الحرارة طبيعية معاك ولا لا؟

**عمرولبيب** · 29-06-2014 04:40 AM

شوف الزيت بيعمل طحينه ولا لا من غطا الزيت بتاع المكنه
غالبا جوان وش سليندر ياعمر
كل عام وانت بخير

**a_mohamedsamir** · 29-06-2014 11:19 AM

. أولاً اكبس الدوره فى مكان يكون بيكبس دورة التبريد
علشان تعرف مكان التسريب بالضبط
ثانياً القربه بتتملى لغاية سن سهم الماكس من تحت يعنى تقريباً لغاية الحز اللى فى نص القربه لان اللى انا فهمته من كلامك انك مليتها لحد فوق

**mhopa2440** · 29-06-2014 02:02 PM

دا مستحيل يكون جوان وش سلندر

اولا لازم تراجع مستوى الميه والعريبة باردة ومركونة بيحيث تكون مش معدية علامة الماكس
ثانيا وانت ماشي راجع عداد الحرارة باستمرار ولما تركن العربية تاني وتبرد تماما شوف مستوى الميه ف القربة
ثالثا والعربية لما تكون سخنه شوف غطاء القربة لو بيطلع ميه هات واحد اصلي

**Omar2017** · 29-06-2014 02:23 PM

المشاركة الأصلية كتبت بواسطة a_mohamedsamir

. أولاً اكبس الدوره فى مكان يكون بيكبس دورة التبريد
علشان تعرف مكان التسريب بالضبط
ثانياً القربه بتتملى لغاية سن سهم الماكس من تحت يعنى تقريباً لغاية الحز اللى فى نص القربه لان اللى انا فهمته من كلامك انك مليتها لحد فوق

لأ لحد الاخر بالنسبالي يعني لغاية الماكس و اسيب الباقي علشان اسيب مكان للغليان