الموضوع: حلول مشكلة زجاج الاوكتافيا لباب الراكب (يمين)

السلام عليكم يا باشا
رمضان كريم
بص يا باشا
الكل عايز يحل مشكلة زجاج الباب اليمين بتاع الاوكتافيا
انا بقى عندى الخلاصة فى الموضوع ده بأقل تكلفة ممكنة
بص يا باشا
موتور رفع الزجاج مكون من موتور وترس معدنى وعليه ترس لونة ابيض بيج بلاستك وهو ده سبب المشكلة الرئيسي
لأن الموتور قوى جداً والزجاج تقيل
واضعف جزء فيه هو الترس البلاستك فابيتنحر مكان السن اللى واصل بالحديد

طب الحل
على فكرة انا عملتها فى البيت بس كان عندى عدة تمام جداً
اولاً المطلوب
1-الصبر
2-ترس زجاج
---- وده يا اما 1.تطلع القديم وتوديه مخرطة محترمة ويعملك زيه حديد وناس عملته كده وتمام جداً

---- او 2.تشترى الترس ده وهو بيتباع عند محل فى الوكاله (وكاله البلح) فى القاهره عند راجل اسمه (محمود السهيونى) وتكلفته 150 جنيه فقط ====
(أنا عملت لعربيتى كده) وغالبا بيبقى بتاع الباسات
---- 3.تجيب ترس زجاج بتاع فيات بونتو وتقريباً نفس الترس

---- 4.تشترى موتور زجاج كامل وهتاخد منه الترس بس بتاع عربيه باسات
لو غيرته فى التوكيل هايكلف 2500 جنيه تقريباً واحتمال كبير يكون نفس اللى كان عندك وشويه وهايبوظ
وغالباً هايدفعك تمن الموتور وهيغيرلك بس الترس

لو جبته استيراد هايكلف تقريباً 400 جنيه

الافضل من وجهه نظرى (حديد او ترس من السهيونى)

هانفك فرش الباب

هاتفك الموتور

هتلاقى 3 اعمده تثبيت طالعه من ماكينة الزجاج من جوه لبره لازم خد يمسكهم كويس معاك عشان لو سقطوا لجوه هاتزهقك قوى على ماتحلها
فا انته تخلى معاك حد يمسك الاعمده كويس

هتلاقى ترس هاتشده هايطلع معاك وهتلاقى جوان كده ناشف شويه هاتطلعة بمفك او بنسه بوز

هتلاقى قدامك الترس الابيض وفى قلبيه هتلاقى حاجه زى كاوتشه سوداء جلد هاتطلعها

وهتلاقى الترس متاكل من الجنب

هاتبدل الترس وتقفل
بس
وخلص الحوار
وهديلك لينك طريقة فك فرش الباب بالصور
http://www.nilemotors.net/Nile/331906-a.html

أو
http://simplement.skoda.free.fr/tech...es-octavia.htm


ودى صورة الموتور
وباين من فوق الترس الأول (بنشده لفوق ) وحواليه الجوان الجلد (بنطلعه بمفك) هتلاقى تحتهم الترس اللى فيه المشكلة لونة أبيض بيج هاتشده لفوق وتطلع الكاوتشه السوده وتركب الترس الجديد وتشحم تحتيه الاول وحواليه وتركب الكاوتشه جواه وتركب الجوان والترس الاخير وتركب الموتور وبس

هام
على فكره الاعمده السوده اللى قلتلك تمسكهم كويس هم اللى بيتربط فيها مسامير الموتور يعنى وانته بتركب الموتور حاول تخليهم مايسقطوش لجوه خالص

على فكره الموضوع بسيط وسهل وياخد بالكتير ساعة شغل لوحدك او معاك حد يساعدك

ولو فى اى مشكله حضرتك كلمنى وانا تحت امرك
رقمى 01277555538
د.أحمد اسماعيل
دكتور صيدلى

لسه مغير مكنة الزجاج أمامي يمين في التوكيل
على حسابهم طبعا تبع الضمان