الموضوع: تقرير عن اول تجربة للصيانة مع شركة النيل الهندسية

أولا : هذه اول مشاركة لي في المنتدي عايز احكيلكم فيها تفاصيل عمل صيانة لعربيتي في توكيل فيات الجديد (شركة النيل الهندسية)
انا عربيتي فيات لينيا 2013 (هاي لاين)
عرفت من المنتدي ان النيل الهندسية خدت توكيل فيان و انا كنت خلاص عديت ال20000 ولازم اعمل الصيانه ضروري، فرحت مكلمهم عالخط الساخن بتاعهم (19984) ، ردوا بسرعة و خدوا بياناتي وقالولي 48 ساعة و حد هيكلمك،، المهم عدت ال48 ساعة وكمان 48 ساعه وماحدش اتصل ،، المهم اتصلت تاني لقيتهم عملو حاجه جديدة في الانسر ماشين و بقي في اختيار من الأول لفيات و الفا روميو،،، المهم غلست عليهم شوية لحد لما قولتلهم عايز اكلم مدير الصيانة فحولوني علي واحده لقيتها بتقولي اسمها مهندسة / هاميس عرفتها ان هي اللي كانت في اوماترا فراحت اعتذرت وحجزتلي الصيانة على يوم السبت اللي فات و قالتلي حد هياكد عليك الحجز ،، المهم بعديها بيومين لقيتهم بيكلموني و بياكدو الميعاد
رحت السبت اللي فات الساعة 9 الصبح ،، المكان في أول العبور عند مدخل المنطقة الصناعية جنب تويوتا،، المبني جديد كانو لسه بيعلقو اليافطه،، دخلت الاستقبال و اكدت الحجز و انتظرت نص ساعة جاتلي م/هاميس استلمت مني العربية ،، المكان نضيف و شيك و محترم و فيه واي فاي سريع ،،، فضلت منتظر للساعة 1:30 ظهرا لحد لما العربية خلصت ،، بس للاسف السيستم كان واقع فعملولي فاتورة يدوي و دفعت واستلمت العربية

الايجابيات:
فيه التزام بالمواعيد والنظام ، المكان جديد لانج ، فيه دفع بالفيزا ، العربية لما استلمتها كانت مغسولة من جوه وبره (الله يرحم ايام اوماترا والزيت والشحم) ، واي فاي سريع
السلبيات:
نقص قطع الغيار حيث ان فلتر البنزين و التكييف بتوعي مش موجودين وتم تنظيفهم فقط لحين توافرهم ،،
غلو الأسعار حيث دفعت 1100 جنيه في صيانة العشرين الف بدون تغيير فلتر التكييف و البنزين،،

معلومات هامه و مفرحه:
قابلت هناك الأستاذ/ محمد جمال الدين مدير التسويق في شركة النيل الهندسية و استفضنا في الحديث خلاصته الآتي :
1- سياسة شركة النيل هي تامين العملاء الحالين و العمل على راحتهم
2- في النص التاني من اغسطس سوف تصل شحنة السيارات الجديدة ليتم عرضها في الصالات و الموزعين
3- السيارات المتوقع وصولها هي البونتو بجميع فئاتها عدا الكلاسيك ، النيو لينيا ، الفا رمويو موديلان جداد
4- قريبا سوف يتم الاعلان عن فيان فانز كلوب
5- جاري العمل علي صفحة الفيس بوك لفيات
6- جاري البحث واختيار موزعين فيات الجدد و صالات العرض والتي ستكون واحدة منهم في نفس هذا المكان في العبور

انا فرحت جدا بالمعلومات ده لأن كنت ابتديت اتضليق من عربييتي بسبب التوكيل و عدم الانتشار،، فيا رب يصدقو في كلامهم و يرجع اسم فيات احسن مما كان

اسف للاطالة وشكرا