الموضوع: صيانة 15000 معاناة في مودرن الهايكستب .. ولا يوم من أيامك يا مركز السبع

إخوتي الأحباء .. بقالي فترة مش بادخل لانشغالي في المواقع ولكن اليوم قررت أدخل أحكي سريعا عن قصة يوم من المعاناة في توكيل مودرن موتورز الهايكستب- طريق المطار.

لأني متعود علي توكيل السبع زهراء المعادي ولأني مالقيتش ميعاد صيانة 15000 قبل رمضان هناك فكنت مضطر إني أروح السبت (قبل رمضان بيوم) توكيل مودرن موتورز -طريق المطار لأنه أقرب حاجة ليا كواحد من سكان الشروق.

البداية غير مبشرة وهقول العيوب علي هيئة نقاط:

1- المدخل والاستقبال للسيارات ضيق ولا يستوعب العدد المطلوب وعربيتك معرضة تتخبط في أي لحظة.
2- التكييف في المركز كان مش شغال غير واحد بس وهو عبارة عن مبرد هواء عمودي.. أما مكان الإنتظار فكان ساونا بمعني الكلمة (ويومها أساسا كانت موجة حارة) واشتكي كل الناس لدرجة إنهم نزلوا الكراسي للناس تقعد تحت قدام المبردة دي !!!
3- مهندس الاستقبال ماحسيتوش خبرة ومافيش أكياس أحط فيها متعلقاتي وقالولي كده ..إحنا غير مسئولين عن إللي جوة العربية "هو عندكم حرامية وللا إيه؟؟"
4- المفاجأة كانت إنهم كمان بيسألوني هل هاغسل العربية وللا لأ !!! طبعا قلتلهم من بره بس.
5- العربية استلموها 11:5 وقدامي يادوب دخلت الصيانة الساعة 1:17 "وأنا قاعد في الحر جوة".
6- بعد ساعة بالظبط طلعت!!! ورحت آخدها لقيت عليها تراب والزجاج عليه رشة مية كده وورق شجر .. إتنرفزت جدا وجيبت المهندس ووريته المنظر .. كل إللي قاله لو تحب ندخلهلك تاني تتغسل؟
7- واحد إتخانق وعمل فضيحة وأنا في الانتظار (الساونا) وكان بيقول "العربية خارجالي مفشووخة" أنا هكلم المسئولين وهو مافيش حماية المستهلك؟
8- أقسم بالله واحد خرج معايا وقال إن فيه دواسة ناقصة في عربيته وعمل مشكلة.
9- إللي بينضفوا وبينشفوا العربية إتلموا عليا في وضعية كل سنة وإنت طيب "هات بقشيش" وطبعا لأن العربية أصلا ماتغسلتش فانا كشمت للكل.
10- أول وآخر مرة أروح هناك تاني ... يا حبيبي يا توكيل السبع زهراء المعادي والله واحشني.
11- لا فيه حد كلمني يؤكد الحجز أو يبعتلي رسالة.. ولا فيه حد كلمني تاني يوم يعرف رأيي وتقييمي.

أكتر حاجة أخجلتني من نفسي إن يومها بالليل السبع بعتولي رسالة تهنئة برمضان.. حسيت إني ياريتني كنت رحت في رمضان وخلاص وماهينتش نفسي كده.

أخيرا باسأل نفسي: يعني في السبع كل شيء مظبوط والكواليتي هايل والناس بروفيشيونال ومودرن بالشكل ده بيسيئوا لنيسان.
ليه مايتسحبش منهم الرخصة؟

انا كانت عربيتي مخبوطه من وراء وكنت عاوز اصلحها تبع التامين وانا من عين شمس قولت اروح اتو ايجيبت ابو رواش لقيته بعيد قولت اروح مودرن موتورز الهايكستيب معامله زباله عشان يغير الاكصدام ويرش الشنطه قعدت شهر وتكلمهم في التيلفون محدش بيرد واما رحت استلم العربيه الحاجه اتعملت كويس بس لاقيت الاقصدام الامامي محكوك والكبوت فيه نقرتين ورتهم للمهندس دحك وقلي يابختك كنت عاوز اديه بالجزمه خت العربيه وحلفت اني ما اروح هناك تاني مركز فعلا زباله ومش بيهتم بعربيه الزبون