رقم الشاسيه اللى فى الرخصة غير اللى على القايم

**أيمن كور** · 02-07-2014 03:31 AM

السلام عليكم
الموضوع و ما فيه إنى بالصدفة بطلب من الموزع اللى شارى منه الياريس 1500 الجديدة دفتر الضمان
بالتليفون و بمليه رقم الشاسيه اللى على الرخصة لقيت الموظفة بتقوللى الرقم ده غلط مش اللى موجود عندى المهم نزلت علشان أتأكد لقيت الكلام مظبوط الرقم اللى فى الرخصة فيه غلطة يعنى بدل ما يكتب "0" كتب "1" و بالتالى الرقم مختلف عن الرخصة و متوافق مع اللى المعرض قاله
المهم إيه الإجراء اللى يتم فى الحالة دى طبعا العربية زيرو و المندوب هوة اللى عمل الإجراءات كلها و سلمنى الرخصة ...
و شكرا على الردود مقدما

اه قبل ما أنسى هل الموضوع ده يأثر على التأمين فى حالة لاقدر الله حصل حاجة فى العربية قبل ما يتم التعديل علشان انا مش طايق الموزع و لا المندوب و اصلا كنت رايح بكرة علشان اخد الضمان علشان مش عايز اتعامل معاهم بصراحة انا كنت فاكر انى بشترى زيرو علشان اريح دماغى
مش عارف ليه مافيش حاجة عايزة تمشى بسلاسة من غير خوازيق

يلا اللى ربنا أراده هايكون

**HOSSAM99** · 02-07-2014 03:41 AM

و عليكم السلام و رحمة الله و بركاته
متقلقش الموضوع بسيط هاتطلع علي المرور و تطلب من نفس الموظف اللي أتقدم له الورق أنه يصلح الخطأ و هايجيب الملف و يراجع البصمة و يصلح الرقم
بالنسبه لتأثرها علي التأمين شوف شركة التأمين قبل ما تعدل و قول لهم علي الموقف و أنك رايح تصحح الخطأ و هايقولو لك أجرائهم أيه (هايحتاجو صورة الرخصة الجديدة المعدله)
و ربنا ما يحوجك للتأمين و يبارك لك فيها
بالتوفيق

**darkdefender** · 02-07-2014 03:44 AM

اول مرة الصراحة اشوف الموقف دا ,اصل رقم الشاسيه باين جداا و الغلط ساعات بيبقي في رقم الموتور!!

الحل تاخد اوراق العربية و تطلع بكرة علي المرور و تثبت الموضوع و تطلب منهم تغير الرخصة الموضوع دا محتاج يو من اوله :s

اما التامين فانا معنديش فكرة بس بردوا متهالي نفس الكلام بتروح برخصة الجديدة و محضر الاثبات و تديهم البوليصة القديمة و تطلب تعدلها..

و قدر الله ما شاء فعل,,

**أيمن كور** · 02-07-2014 03:56 AM

أولا طبعا ألف شكر على سرعة الرد
و ربنا يطمنكم و يا رب يكون الموضوع بسيط كده و ربنا يستر لحد ما أخلص الاجراءات
وشكرا مرة تانية

**Mohamed.Hany** · 02-07-2014 11:59 AM

المشاركة الأصلية كتبت بواسطة أيمن كور

أولا طبعا ألف شكر على سرعة الرد
و ربنا يطمنكم و يا رب يكون الموضوع بسيط كده و ربنا يستر لحد ما أخلص الاجراءات
وشكرا مرة تانية

متخافش دي حاجة بسيطة قوي ،،،

الغلطة غلطة اللي قاعد علي الشباك واللي كتب في الدوسيه بتاعك كتب رقم غلط و دي سهلة قوي ، هتروحلهم بالرخصة هيفتحو الملف بس تأكد عليهم يبصو علي الرقم اللي اتجاب من الفحص اللي الراجل بيجيبه بالقلم الرصاص علي ورقة صغيرة و بيلزقه و هتلاقه تمام و هيعدلك الرخصة بدون فحص.
المشكلة الوحيدة ان لو ملاقوش الورقة الصغيرة دي في الملف ساعتها هتضطر تعمل فحص فني مرة تانية و برضو مش مشكلة قوي ،

بالتوفيق

**Mohamed.Hany** · 02-07-2014 08:31 PM

المشاركة الأصلية كتبت بواسطة أيمن كور

شكرا أستاذ محمد بالفعل هوة ده اللى حصل و كانت غلطة اللى سجل البيانات على الكومبيوتر
و الحمد لله الموضوع ما أخدش وقت و التكلفة الفعلية 8 جنيه و تمت و روحت المعرض اللى شارى منه العربية علشان الصيانات هاعملها مع تويوتا ايجيبت فا أخدت دفتر الصيانات من عندهم
و ربنا يستر من تويوتا ايجبت و الكلام اللى بسمعه و فى نفس الوقت من مركز صيانة الوكيل المعتمد
يعنى من الناحيتين
بعد كل ده و اليوم ماشى زى الفل و الدنيا سهلة العربية اتحكت من الاكصدام الخلفى و انا راكنها فى الباركنج بتاع فتح الله ماركت
الحمد لله على كل حال و قدر الله و ما شاء فعل

و ألف شكر تانى لكل الاعضاء المحترمين اللى بيخلونى أطمن انى مش لواحدى فى أى مشكلة
شكرا مرة تانية و كل عام و انتم بخير

لا متركزش مع الكحتات عشان متتعبش هههههه

اما التوكيل حتي الان فهو مقبول مش هنقول سئ و لا هنقول ممتاز و نتمني يفضل كدة او يتحسن