الموضوع: مش عارف أشترى عربيه جديده ! :(

السلام عليكم و رحمة الله و بركاته


أنا نويت ان شاء الله أشترى عربيه و بصراحه أنا محتار ،
قرأت تقارير كتيره عن ماركات و موديلات كتيره هنا فى المنتدى ،
و لما زهقت قررت إنى أنضم للمنتدى علشان حسيت إن الأعضاء هنا متعاونين و ممكن ينصحونى و يخرجونى من الحيره اللى أنا غرقان فيها.

أولا: دى أول مره أمتلك عربيه و خبرتى ضعيفه جدا فى اعطال العربيات و الميكانيكا بتاعتها ، و علشان كده أول شرط يهمنى فى العربيه هو قلة الأعطال و التوكيل الجيد و مراكز الخدمه و الصيانه الجيده.

ثانيا: بعض الخصائص تعتبر مهمه جدا عندى (تكييف قوى ، إستهلاك معتدل للبنزين ، إرتفاع مناسب عن الأرض و المطبات ، ...).

ثالثا: فقر العربيه فى الكماليات و الإكسسوارات مش بيهمنى بالدرجه المبالغ فيها عند بعض الناس (الجنوط ، فتحة السقف ، حساسات ، طاره متعددة الوظائف ، ...).

رابعا:العربيه اللى هشتريها ان شاء الله لا أنوى بيعها على المدى القصير يعنى إحتفاظ العربيه بسعرها عند إعادة البيع يعتبر ميزه و لكن ليس ضروره.


و دلوقتى هحكى لكم عن العربيات اللى فكرت فيها:

ميتسوبيشى لانسر: مفيش فيها أى عيوب غير صوت الموتور العالى و العزل السىء و الشنطه الصغيره و (من وجهة نظرى الخط الجلدى الأسود الممتد فى التابلوه و الذى حل محل الخط الأبانوسى البنى فى الموديلات السابقه).

تويوتا كورولا 2013: هى أكتر عربيه وجدتها مناسبه لمواصفاتى و لا يعيبها إلا جنون الشعب المصرى بالصناعه اليابانيه مما أدى لإرتفاع مذهل فى سعرها (حاليا 180.000 - 185.000 جنيه للفئة الأولى خليجى) ، و للأسف موديل 2014 منها يعيبه إنخفاضه على الأرض و (من وجهة نظرى لون التابلوه الأسود و الذى لا أفضله) و (من وجهة نظر أصحاب المعارض و عامة الشعب المصرى تجميعها فى تركيا أو أى بلد غير اليابان).

مازدا 3: تحفه فنيه و لكن يعيبها للأسف إنخفاضها على الأرض و ضيق بشع فى فتحة الباب الخلفى و الكنبه الخلفيه و الشنطه.

بيجو 2008: عربيه جميله جدا لكن وجدتها معروضه للبيع بعد شهر من نزول أول دفعه منها فسألت صاحبها و عرفت أن سبب البيع هو ضعف التكييف و عدم الثبات على السرعات العاليه.

سوبارو إمبريزا: عربيه محترمه جدا و لا يعيبها إلا كل من يفتى بأن قطع غيارها غاليه أو غير متوفره بدون أن يكلف نفسه عناء التأكد من معلوماته و طبعا سعر إعادة البيع المنخفض.

شيفروليه كروز – هيونداى إلانترا – كيا سيراتو: لا تعليق.

أنا عارف إن مفيش حاجه كامله و كل عربيه لازم هيكون فيها عيب أو بمعنى أصح حاجه مش راضى عنها ، لكن ده كان رأيى فى العربيات دى و أتمنى أسمع رأيكم و تصححونى لو كنت غلطان.


على فكره ، أول مشاركه عملتها هنا فى المنتدى كانت عن عرض بخصوص تويوتا كورولا 2013 (خليجى) ، و أرجو إنكم تدخلوا على الرابط و تقولوا رأيكم فى العرض ده:
http://www.nilemotors.net/Nile/429162-2013.html

شكرا مقدما

المشاركة الأصلية كتبت بواسطة d.ahmed ismail

corolla 2014

aw cruiz 2014

المشاركة الأصلية كتبت بواسطة ashouhdy

corolla

cruze

cerato

المشاركة الأصلية كتبت بواسطة tefafathy1

الاعتمادية و القوة و الثبات و التقفيل و ........ بصراحة كل ده و بلا منافس فى ألسوبارو.
يعيبها بالنسبة لاحتياجاتك الارتفاع (فى حالة التحميل الزائد) و لو بتهتم بالشكل فا هيتفوق عليها فى الشكل الخارجى التويوتا و الداخلى الأسترا، لكن هرجع و أقولك الاعتمادية و الثبات و عوامل الأمان و الدفع الرباعى انفراد للسوبارو.
و ربنا يوفقك للخير :)

شكرا لكل الردود و الآراء ، لكن


شيفروليه كروز: بكرهها و خصوصا إنى مش عارف أحدد لها أصل (ماركة شيفروليه أمريكيه و موتور أوبل ألمانى و تصنيع فى كوريا).
كيا سيراتو: إتصدمت بأن لها حوالى 10 فئات و سعرها يصل إلى 190.000 جنيه فى أعلى فئه ، و آخر معلوماتى عن سيراتو هى إن الشكل اللى قبل الشكل الحالى كان سعره 120.000 فى أعلى فئه ..... مش فاهم إيه سبب الإرتفاع الرهيب فى سعرها.

أنا عارف إن كروز و سيراتو منتشرين و ناجحين لكن أنا بحس عموما إن سعر العربيات الكورى (إلا من رحم ربى) بيكون مقابل الكماليات و الإكسسوارات الغزيره فى العربيه مش مقابل جوده أو قيمه فى البنيه الأساسيه للعربيه.


تويوتا كورولا و سوبارو إمبريزا: أكتر إختيارين (مع ميتسوبيشى لانسر) مناسبين لمواصفاتى لكن أعتقد المقارنه هتكون ظالمه جدا لإمبريزا ، لأنها بصراحه أحسن من كورولا فى كل حاجه كل حاجه (ما عدا سعر إعادة البيع و توافر قطع الغيار).

أنا حاليا بفكر فى سوباروا إمبريزا (هاى لاين) لكن متردد بسبب:
1- إستهلاك مرتفع للبنزين.
2- عدم توافر قطع الغيار.
3- إرتفاع أسعار قطع الغيار.
4- توكيل سىء و عدم توفر خبره عند مهندسين الصيانه.
و طبعا كل الأسباب دى "سمعتها" من ناس كتير و أغلبهم للأسف لم يجرب العربيه و لو مره واحده فى حياته.
أرجو أن اللى يرد على الإدعاءات دى يكون عنده فعلا سوبارو إمبريزا أو على الأقل سبق له إمتلاكها.