جوان وش سلندر والعربية ماكملتش 30000 كيلو ؟؟؟!!

**singary** · 05-07-2014 04:20 PM

انا معايا رينو لوجان 2010 اشترتها من شهر 11 اللي فات هي عمله 26000 كيلو وغيرتلها ميه موبيل الخضرا من اسبوع او اسبوعين
اول امبارح كنت بعمل مشاوير في المعادي بعد تقريبا نص ساعة لقيت لمبة الحرارة نورت ومؤشر الحرارة 4 شرط ! انا قولت اكيد دي تهيسه عشان مؤشر الحرارة مش عالي المهم كملت مشوار وفضلت واقف شوية ودورت العربية عشان اروح لقيت المؤشر نزل ولمبة الحرارة اختفت، قبل ما اوصل بـ 5 دقائق البيت لقيت لمبة الحرارة نورت كملت لغاية البيت وبعدين نزلت فتحت الكبوت ومقدرتش اشوف في ميه في الاربه ولا لأ بس حاولت افتح الاربه طلعت كمية صدا كتير جدا وبلقيت المية بتغلي. كان معايا واحد صاحبي قالي خلي الأربه مهويه شوية ولما تنزل الصبح زود ميه. نزلت بعد الصلاة الجمعة مالقيتش ولا نقطة ميه حطيت المية وقاعدت ابص من تحت العربية في حاجه بتنزل مالقيتش حاجه. شوية ونزلت وللأسف نسيت ابص ع الاربة قبل ماتحرك تقريبا العربية قعدت نص ساعة تمام الحرارة توصل لـ 4 شرط وبعدين تنزل. لكن كانت المفاجأة ان لمبة الحرارة نورت تاني نزلت اشوف المية مالقيتش ولا نقطة ميه! استنيت لحد ما العربية بردت بعد 15 دقيقة تقريبا وزودت ميه وهي مبطله وزودت وانا مدورها دورت العربيه ومشيت بيه مسافة 10 دقائق ببص ع الميه مالقيتش ميه، وقفت 40 دقيقة وزودت اخر شوية كانت معايا وروحت بيها البيت، السؤال هنا ده ممكن يكون عيب ايه؟ هل ممكن يكون جوان وش سلندر فعلاً؟؟ السؤال التاني هل تقدروا تفيدوني بميكانيكي كويس في المعادي او صقر قريش؟ السؤال التالت اتحرك بالعربية واقف كل ما تسخن لغاية لما تبرد؟

**singary** · 05-07-2014 07:17 PM

واحد صاحبي نصحني اغسل الرياديتار وفعلاً غسلته وحاطيت ميه خضرا وكله تمام وكشفنا على الاربه وشكل الوصلات ومفيش حاجه بتنزل ميه، اللي غسلي الريداتير قالي هي طبيعي هتنقص شوية ميه وانت زودها الصبح، روحت البيت لاقيتها تقصت شوية ميه تاني ..... ايه العمل, هل ده طبيبعي ؟؟؟

**aboulojain** · 05-07-2014 09:08 PM

جوان

**singary** · 05-07-2014 10:32 PM

وانا في البنزينة سالت العامل اللي غسلي الريداتير عن هو جوان ولا لأ، وكشف على الزيت وقالي لأ خالص مفيهوش حاجه، الغريبة ان العربية وهي واقفة مش بتنقص مية حتى لو فضلت دايرة 15 دقيقة ولو اتحركت 5 دقائق بتنقص مش عارف ليه ؟

**eng.mohdm** · 06-07-2014 02:03 AM

جوان وش سلندر الموضوع ده حصل معايا شخصيا
طب لو عاوز تتأكد افتح غطاء الردياتير وهيا بارده لو لقيت فقاقيع هواء بيقي اكيد جوان
ماتخدش على كلام عامل البنرينة لان هوا بيبص على الزيت ويشوف عمل طيحينة ولا لأ (اختلاط الماء بالزيت )
لان دة بيحصل لما الجوان يتدمر تماما
متهملش في الموضوع ده عشان نتيجة سيئة جدا على الموتور