الموضوع: علي وشك اني أشتري C Elysee

و يا ريت لو حد من مالكى أي واحدة من السيارتين أو من لهم تجربة معاها يقولي علي موضوع "نتشة الفتيس" و "تيل الفرامل" اللي بيحتاج يتغير بسرعة دا.. فيه ناس بتقول انهم غيؤوه علي 10.000 كم...!!!

سأنقل لحضرتك تجربة أحد ملاكى السيتروين سى إليزيه وهو الأخ العزيز / إسلام الذى لم يبخل على بأى إستفسار عن السيارة

التقرير التالى من الأستاذ / إسلام

لو هنتكلم عن الستروين فى حد ذاتها وبكل موضوعية هى فيها حاجات رائعة و مثالية و فيها حاجات عادية و حاجات كان ممكن تكون افضل :

من الحاجات المثالية فيها :
1- الوسع الداخلى و وسع الشنطة ( الشنطة 506 لتر)
و الوسع ده ناتج عن الشاسيه الطويل نوعا ما بالمقارنة بنفس فئاتها ( قاعدة العجلات طولها 4652 ) و ده مديها ميزة عن باقى منافسينها فى الثبات
2- ارتفاعها عن الارض المناسب جدا جدا لطرقنا المصرية مع عدم التاثير على الثبات
3- الموتور ممتاز , قوى جدا واستجايته سريعة و اداؤه على الطريق جميل و استهلاكه للبنزين قليل لا يعيبه الا البطئ فى السحب قبل 2000 RPM كعادة كل السيارات الاوروبى و صوته العالى نسبيا
4- الاستايل العام للعربية و تصميمها المميز و الشيك و الفخم و خاصة فى التابلوه و اللى بيديها فئة اعلى من فئتها

الحاجات العادية :
1- التكييف كويس و بيسقع و بيعمل اللى عليه مجربتوش مرة و خذلنى حتى لما كانت درجة الحرارة 45 فى الشارع بس مش بقوة تكييف التويوتا مثلا او اليابانى عموما
2- الخامات الداخلية للابواب ( تحديدا ) و التابلوه كويسة ليست بجودة الفلونس مثلا او الاوبل و لكنها افضل من بعض العربيات الكورى مثل الاكسنت R B
3- الثبات كويس جدا مقارنة بكل عربيات نفس الفئة و افضل من الاكسنت و الريو و الصنى

حاجات كان ممكن تكون افضل :
1- الفتيس كان ممكن يكون افضل هو مش وحش بس فى احسن منه فى الفئة دى و هو محجم الموتور شوية و مش مخلى الموتور يطلع احسن ما عنده لكن الصراحة هو عزمه حلو جدا
2- الجزء الخلفى من الكابينة كان ممكن يكون افضل بوضع اماكن تخزين فى الابواب الخلفية او وضع كونسول ( مسند يد ) وسط الكنبة

على الهامش :
العربية اتحسنت كنير يعد فترة من الاستخدام بعد حوالى 8000 كم احساس النتشة البسيطة اللى كان بيحصل بين الاول و التانى اختفى و مبقاش بيحصل الا نادرا , التكييف اداؤه اتحسن اكتر من الاول اداء العربية بشكل عام افضل بعد فترة من الاستخدام ( تقدر تقول بالبلدى ان العربية طبعت و الفتيس و الكنترول خدو وقتهم فى انهم يسجلو قرءات و بيانات طريقة سواقتك )

توكيل عز العرب مش سئ للدرجة زى ما ناس كتير بتقول من غير تجربة للاسف بالعكس بالتجربة العملية اثبت انه احسن من توكيل بيجو ف التعامل مع العربية
و مع العميل و يكفى ان مفيش عربيات C-Elysee نزلت من غير غطاء الكنترول زى ما حصل فى البيجو

حاجاة كمان اكتشفتها بعد الشراء :
الستروين افضل فى التصميم من البيجو لان الاكصدام الامامى بارز عن العربية و يقدر يحميها من الصدمات عكس البيجو

ان موضوع التيل اللى بيخلص بسرعة ده فعلا مش بيطول و انا عندى المهندس فى التوكيل قالى انه قرب يخلص يعنى هيتغير على 13,000 كم
التيل فى التوكيل بـ 430 جنيه من غير ضريبة و مصنعية
ولكن العربية التيل بتاعها هو تيل الستيروين c4 و البيجو 307 موديلات ما بعد 2007
و ده لاقيته فرنساوى اصلى ماركة فاليو بـ 260 جنيه

العربية فيها مشاكل فردية محدش يقدر ينكر , انا شوفت ناس بتشتكى من حاجات انا اول مرة اسمع عنها و معنديش اى مشاكل لحد الان الحمد لله ( 11,800 كم )
انا كان معايا سيراتو 2010 و بعتها و جبت السيتروين و مبسوط اكتر مع السيتروين
كفاية العفشة و الفرامل لا تقارن نهائى بالكيا


فى ناس اشتكت ان التكييف ضعيف
وفى ناس اشتكت ان عند النزول من غيار اعلى الى غيار اقل العربية بتنط او او كانها خدت غيار اقل على سرعة عالية
( فى حاجات الناس اشتكت منها مش لانها عيب لكن اشتكت عن عدم فهم زى السحب اغلب اللى كان نازل من كوري او يابانى بيحس ان سحبها وحش لكن لو عرف ان الاوروبى طلعته بطية هو تصميمه كده مش هيشتكى مع العلم ان العربية بعد 3,000 RPM بتتحول و بتسحب بسرعة جد

الصيانة عند 2500 كم ان شاء الله
مجرد مراجعة على السوائل بتاعة العربية و تشييك على العفشة و هى صيانة مجانية

مركز الخدمة الرئيسى: ابو رواش _ الكيلو 28 طريق اسكندرية الصحراوى جنب كارفور

استهلاك النزين بيختلف على حسب طريقة سواقتك و على حسب طريق سريع و سفر و لا طرق زحمة و سرعات بطيئة معظم الوقت و بتكييف ولا من غير
عموما انا التانك بيعمل معايا من 500 كم الى 580 كم من غير الاحتياطى
على حسب ظروف القيادة

اتكل علي الله هيا اجمل من ال301 بس انا كنت حجيب البيجو برضه لو مكانك

ان شاء الله عربيه جميله وراقيه ربنا يديك خيرها ويكفيك شرها