عايز أعرف الورق اللي بستلم بيه عربية جديدة

**ahmedmedhat86** · 08-07-2014 09:17 AM

إن شاء الله النهاردة هستلم عربية جديدة من معرض، و أنا أول مرة أشتري عربية زيرو فمن فضلكوا عايز حد يدلني على الورق اللي أستلم بيه. شكرا.

**ahmedshafei777** · 08-07-2014 11:25 AM

اقرار استلام هياخدوا منك الأصل وتاخد صورة منه وتاخد العربية وتروح

بعد كده هيقابلك مندوب بالورق كله او انت تروح تستلمه من المعرض وترخص لوحدك

وربنا يوفقك ويديك خيرها ويكفيك شرها

والسلام عليكم

**ahmedmedhat86** · 08-07-2014 11:48 AM

المشاركة الأصلية كتبت بواسطة ahmedshafei777

اقرار استلام هياخدوا منك الأصل وتاخد صورة منه وتاخد العربية وتروح

بعد كده هيقابلك مندوب بالورق كله او انت تروح تستلمه من المعرض وترخص لوحدك

وربنا يوفقك ويديك خيرها ويكفيك شرها

والسلام عليكم

ألف شكر لحضرتك بس معلش أنا بسأل أصلا إيه هو "الورق كله" اللي حضرتك قايل عليه؟ و إيه لازمة إقرار الإستلام ده ليه مايدونيش الورق من اﻷول؟

**akmm** · 08-07-2014 01:55 PM

اقرار الاستلام وانك اصبحت من تاريخه وساعته مسؤل عن تللك السياره وعن كل مايحدث منها من حوادث لاقدر الله ويثبت نوعها واللون ورقم الشاسيه والموتور وبكده يخلى المعرض مسؤليته الجنائيه عن السياره ....... اهم مافى الاوراق اللى بتتقدم للمرور جواب الافراج الجمركى وفيه الرقم المسلسل للشاسيه والموتور وكذلك المبايعه لانها تثبت ملكيتك للسياره ....والف الف مبروك .

**م.أحمد الدسوقي** · 08-07-2014 02:13 PM

شويه ورق كتير كدا بتوديهم المرور يتحطوا في الملف بتاع العربيه وتاخد انت الرخصه بدلهم

اول حاجه صور الحاجات دي الاول قبل ما توديها المرور محدش عارف تقوم ثوره وتتحرق الملفات دي ولا ايه

ثانيا الورق ده عباره عن المبايعه والمسلسل بتاع الشاسيه والافراج الجمركي

وكمان تأمين الرخصه لو عملته في المعرض

وسهله استلم العربيه 10 صباحا ورخصها في نفس اليوم

في الترخيص حتروح تشتري المثلث العاكس والطفايه وصندوق الاسعافات

وتروح تاخد رقم الشاسيه من واحد بيعمله بقلم رصاص ويطبع الكتابه المحفوره علي الموتور علي ورقه صغيره ويختمها

وبعدين تروح الفحص الفني وتاخد موافقه المهندس

وتاخد كل ده موافقه المهندس ورقم الشاسيه المحفور وايصال المثلث والطفايه والاسعافات وتحطه علي الورق القديم

وتدخل علي التراخيص وربنا يعينك

**Ahmed abdkarim** · 08-07-2014 02:18 PM

المفروض فى حد من المعرض بيروح معاك المرور و بيخلص الاجراءت

**م.أحمد الدسوقي** · 08-07-2014 02:27 PM

المشاركة الأصلية كتبت بواسطة ahmed abdkarim

المفروض فى حد من المعرض بيروح معاك المرور و بيخلص الاجراءت

نصيحتي عن تجربه بلاش لانه بياخد اكراميه وكمان بيقولك ادفع اكراميات للناس في المرور ودي مجاملات في وشه هو علي حسابك ومن جيبك

وبعدين الموضوع مش فتاكه ادخل اسأل وحتتعامل عاااااااااادي جدا

حتوفرلك 150 الي 200 جنيه كانوا حيروحوا في الهوا

كلامي عن تجربه