الموضوع: مساعدة في شراء رينو ميجان للاهمية....عااااااجل

انا كنت من فترة سالت عن امكانية اني الاقي رينو ميجان بحالة كويسة اليومين دول وسالت السادة الافاضل ملاك السيارة والمشرفين علي قسم رينو وافادوا ان احسن موديلات من 2007 وطالع,المهم انا اخدت قرار الشراء من حوالي شهر تقريباً وكنت بدور علي كونتكت ودوبيزل عن عربيات في اسكندرية ومعظمهم كان ماشي كيلو مترات كتيرة فوق ال 100000 وانا كنت عايز حاجة تعيش شوية بردو لاني مش من هواة التغيير الكتير,المهم لقيت اعلان عن واحدة موديل 2007 ماشية 75000 كيلو متير صورها علي دوبيزل كانت حلوة ومع ذلك عربية زي دي ميغرنيش صورها لان اهم حاجة الحالة,المهم رحت شفتها وبخبرتي المتواضعة في عالم السيارات حسيت انها مش متهانة يعني فتحت البيبان كلها وسمعت صوت قفلتها قعدت فيها من جوه وجربت الدوران من زرار Start Engine وسمعت صوت الموتور لقيت العربية هادية والشاشة مفيش فيها Error ولا حاجة,اتفقت مع صاحبها اللي كانت معاه فواتير الصيانة في التوكيل وكتالوجات العربية واخر فاتورة من شهرين في التوكيل صيانة ال 60000 متكلفة حوالي 7000 جنيه,المهم اخدت العربية وحطيتها علي الكمبيوتر عند سامح الهواري عندنا في اسكندرية مفيش اي مشكلة في حاجة العربية معططش اي Error علي الجهاز واترفعت وفيها بارات قدام في العفشة تتغير بحوالي 350 جنيه وفيها فردتين كاوتش ورا تعبانين ورشة اكصدامين وعتبتين وجربوا الجير بوكس وطلع حد من المركز جربها وكان رايهم ان العربية مش متهانة وقالولي توكل علي الله وخلص لانها نضيفة,طلعت سوقتها بقي بعد كده هي ما شاء الله ثبات وركوبة غير اللانوس اللي معايا خالص وجريت وجربت الفرامل ولقيتها بتجمع حلو اوي الحمد لله علي قدر خبرتي المتواضعة المتمثلة في 11 سنة سواقة,المهم هو كان طالب 78000 جنيه نزلت منهم 2000 جنيه تمن حوار العفشة وتمن فردتين بريدج ستون جداد ووصلت لغاية 76000 جنيه واتفقت علي كده لاني حسيت ان العربية فعلا نضيفة وواقفة زي م بيقولوا وحالتها حلوة وليا استفسارين مهمين ومعذرة للاطالة بس ارجو رد سريع لاني حستلمها بكرة ان شاء الله:

1- هل السعر ده عادل ولا مبالغ فيه لاني حاولت اخلص علي 73000 ومعرفتش وبعد كده حاولت علي 75000 وبردو معرفتش واللي عرفت اوصله هو 76000 جنيه فهل السعر ده كويس ولا لاء؟

2- انا لاحظت ان في خربوشين بطول 5 او 6 سم موازيين لبعض في التابلوه قدام الكرسي اللي جنب السواق (الراكب الامامي) ويمكن الحاجة الوحيدة اللي نسيت اسال عليها هل الايرباجات زي مهي فابريكة ولا لاء والشيطان عمال يوسوس لي ان ممكن تكون فاتحة ايرباج قدام...فهل ده ممكن ولو فاتحة حيبقي في خربوشين موازيين لبعض زي م انا شفت كده بينهم مسافة حوالي 10 سم ولا بيبقي شق طولي في الوسط؟ واعمل ايه عشان اطمن لاني خلاص حستلمها بكرة؟ هل اساله الخرابيش دي من ايه واطلب منه الناس تبص عليها بصة تانية ولا اتوكل علي الله والموضوع مش مقلق اصلاً وانا اللي مكبر الموضوع؟ وهل لو العربية فاتحة ايرباج المفروض يظهر الكلام ده علي الجهاز ولا لاء؟ واعرف منين انه مش موقف عمل الايرباج بتاعة الراكب الامامي؟

ارجو الرد السريع من حضراتكم زي م تعودت منكم لاني خلاص ان شاء الله حستلمها بكرة انا عارف انه حقي اخدها تاني اخلي الناس تبص عليها بس هل الشك ده له داعي ولا انا مكبر الموضوع؟ اتمني الرد وكل سنة وانتم طيبين وربنا ما يحرمنا من استشاراتكم دايماً

المشاركة الأصلية كتبت بواسطة mohammedaladel

الإيرباج لما بتفتح ( اليمنى الأمامية ) بتكسر التابلوه مش بتعمل خربوش ولو التابلوه اتلحم هيبان عليه قوى ولما تفتح يعنى العربية عاملة حادثة شديدة على أقل تقدير تكون خبطت الديفيندر الأمامى وعوجته
وال 2 إيرباج الأمامى بيفتحوا مع بعض فى حالة التصادم الأمامى

إلا فى حالتين ... لوكنت طافى الإيرباج اليمنى الأمامية عن طريق الزر الموجود يمين التابلوه وفى الحالة دى الإيرباج اللى فى الدركسيون بس اللى هتفتح أو لو شريط الإيرباج مقطوع فى الحالة دى إيرباج الدركسيون مش هتفتح
يعنى لو واحد عنده شريط ايرباج مقطوع وطافى الإيرباج التانية اليمنى فى حالة التصادم الأمامى مفيش ولا إيرباج هتفتح

خلاصة الكلام أن فتح الإيرباج اليمنى الأمامية لازم تغير التابلوه بإيرباجه ... وتغيير كمبيوتر الإيرباج وحساس التصادم

والكلام دا معناه إن وارد جدا عربية تعمل حادثة ومتفتحش إيرباج للسببين اللى ذكرتهم
دا غير أن العربية فيها 4 إيرباج تانيين 2 فى الكراسى و2 فى القوايم للتصادم الجانبى
وبيفتحوا مع بعض
وفيه 2 فيشة تحت الكرسيين الأماميين لو فصلتهم ال 2 إيرباج مش هيفتحوا اللى فى الكراسى
وكذلك لو شلت فيش ال 2 إيرباج اللى فى القوايم مش هيفتحوا

خد بالك إن الكراسى الامامية فيها 4 مدافع أحزمة أمان كل كرسى 2 بيفتحوا فى حالة التصادم الأمامى مع الإيرباج

طبعا غير أنك ممكن تعطل الإيرباج كلهم بالجهاز

ووارد جدا عربية تعمل حادثة وصاحبها يغيرلها كل حاجة باظت و ترجع تانى زى الاول ومش هتدى أعطال

القول الفصل هنا هيبقى لكشف السمكرة اختبار الحوادث فى التوكيل

اعلي فكرة انا كنت مستني مشاركة حضرتك بالذات لان انا من زمان بحب الميجان وكان نفسي اشتريها زيرو بس للاسف هي نزلت وانا في الكلية وانتاجها وقف وانا في الجيش,كلام حضرتك ومشاركاتك في كل المواضيع بيقنعني بيها اكتر وبيخليني افكر فيها لو بشتري مستعمل بالرغم من اني عارف ان في بلدنا قليل اووووي لما حد يكون نازل من عربية وهو محافظ عليها لان الناس هنا لا في ثقافة توكيل ولا في اعتناء بالعربية هو بس يادوب كل ما تبوظ يروحوا يصلحوها...ربنا يجازيك عني خير ان شاء الله هي طلع فيها مشكلة في ضفيرة الكهربا وصاحبها الاولاني ملصمها والاتنين اللي بعد منه مصلحوهاش وانا قفلت من الكلام الغير صحيح الكتير اوي اللي صاحبها اللي كت بشتري منه كان بيحور عليا فيه

الحمد لله ربنا عالم بالحال اني عايز اشتري عربية تطول معايا واريح بيها نفسي واسرتي,ربنا يهدي الناس ويبطلوا كدب بقي,انا ابتديت افكر جدياً في الزيرو من اللي انا بشوفه

شاكر لاهتمام حضراتكم جداً وجزاكم الله كل خير