الموضوع: تحذير شديد من غبور الجزء الثاني

بسم الله الرحمن الرحيم
السلام عليكم ورحمه الله وبركاته

في البدايه الموضوع ده تكمله لموضوع سابق بعنوان تحذير شديد من غبور
وياريت اللي مشفش قصتي المأساويه :) يتفضل بقرائه هذا الموضوع
http://www.nilemotors.net/Nile/430087-a.html
المهم
يا شباب انا روحت التوكيل الساعه ٩،٣٠ تقريبا
طبعا بدون حجز او اي شئ لاني عندي مشكله في العربيه ودخلت الصيانه ومتحلتش يبقي من حقي اروح من غير حجز
دخلت علي البوابه سألني في حجز مسبق قولتله طبعا امال هاجي من غير حجز قالي اتفضل اركن علي اليمين وادخل بالرخصه علي الاستقبال
ركنت يمين ودخلت علي الاستقبال لقيت اتنين بنات
قولتلها عايز اقابل مدير الفرع لو سمحتي
قالتلي حضرتك في حجز مسبق
قولتلها لا مفيش انا عربيتي بعيد عنك دخلت الصيانه ٥ او ٦ مرات قبل كده وطالعه بنفس المشاكل
قالتلي لازم يا فندم يكون في حجز
قولتلها انا جاي من غير حجز وهقابل مدير الفرع ممكن تكلميه حالا
اتصلت بواحد قالتلي هو جايلك حالا وقالتلي ده مدير الاستقبال
قولت ماشي اهو اي مدير والسلام :)
اتكلمت معاه شويه وقولتله ان كده ميصحش وقعدت ارغي معاه يمكن ربع ساعه المهم خلاني اخد رقم علشان اقابل مهندس الاستقبال وندهلي مدير الورشه حكاله الحكايه كلها من سبع شهور ومدير الورشه قالي كالعاده العربيه هتطلع تمام التمام يا فندم متقلقش
قعدت مع مهندس الاستقبال قولتله العربيه فيها كذا وكذا راح بص للي جنبه وقاله هو في عندنا رصاص ؟ قاله لا خلصان
قالي مفيش رصاص يا فندم فمش هينفع نرصص قولتله دخل العربيه تظبط الرميه والترصيص امره مقدور عليه
المهم لما عرف مشكلتي اللي اطول من نهر الكنغو قعد يكتب في تقرير المعاينه مهم جدا وارجوا الاهتمام ورفع المساحه ومش فاهم الحركه دي يعني ايه
المهم العربيه اتاخدت من بره حوالي الساعه ١٠،٣٠ ومدخلتش الورشه قبل الساعه حوالي ١٢ تقريبا كانوا بيجربوها لغايه الساحل الشمالي ورجعوا تاني :)
العربيه دخلت الورشه اخيرا وانا قاعد عيني مبتشالش من عليها
الاول عملوا كروس للكاوتشات ( للي مش عارف الكروس يعني ايه شالوا الكاوتش اليمين اللي ورا وحطوه شمال قدام والشمال اللي ورا حطوه يمين قدا )
وطلعوا يجربوا العربيه
رحت صليت الظهر ورجعت لقيت العربيه واقفه جنب الكوريك مستنيه دورها بعد كده رفعوها وفتحوا شنطه العربيه لقوا كوره قعدوا يهرجوا يضربوا بيها شويه ( ما شاء الله الاولاد مبسوطين ) ونزلوا الاستبن وطلعوا فرده من قدام مكان الاستبن واخدوهم علشان يرصصوا الكاوتشات ( طبعا انا كنت هولع ونزلت كلمت المهندس لاني عندي الاستبن بايظ وبينام كل اسبوع لانه واخد خابور عنب جابه سابع ارض ) المهم بعد ما رصصوا مع العلم ان المهندس قالي مفيش رصاص
المهم رجعوا ركبوا العجل وطلعوا جربوا ورجعوا تاني بعد حوالي ربع ساعه طلعوا العربيه علي الكوريك وقعدوا يبصوا علي العفشه من تحت كانت الساعه ساعتها جت اتنين ونص
اخويا نزل للمهندس قاله ايه الاخبار
قاله الورشه طلعت بتقرير ان العربيه محتاجه تغيير الكاوتشات
طيب يا ناس ما ده اللي قولناه من الاول
اخويا قاله طيب خلاص غير الكاوتش
المهندس قال مش انهارده لان المسئول مش موجود ولازم هو اللي يلقي نظره اخيره ويدي امر التغيير
في هذه اللحظه الحاسمه حسينا اننا عايزين نولع في غبور كله
قولتله وساعده البيه هيجي امتي قالي هكلمهولك
كلم الراجل قاله انا مسافر بره القاهره ومش جاي قبل الاحد اللي بعد الجاي
قولتله مش مهم يعني مفيش حد قائم باعماله
قالي لا والله مفيش
قولتله طيب حضرتك بقي تكلمه قبلها وتنسق معاه علشان مجيش يوم الحد وتقولي مش موجود وكده لاني ساعتها هتضايق فعلا
وفي الاخر فهمت ان تقرير الورشه ده ولا ليه لازمه والراجل اللي هيجي يوم الاحد ده هيكشف عليها من جديد وممكن يقول لا مش الكاوتش ونرجع تاني من الاول مع العلم ان هو الراجل ده اللي الورشه كانت قيلاله قبل كده الكاوتش عايز يتغير وهو قال لا الكاوتش سليم وملوش دعوه والجنوط هو اللي لازم يتغير والجنوط طلع برئ برائه الذئب من دم بن يعقوب
ربنا يسهل من هنا ليوم الاحد اللي بعد الجاي لاني جبت اخري مع التوكيل ده
وياجماعه واضح فعلا ان اغلبيه العربيات الفيرنا بتنزل بكاوتش بايظ بسبب التخزين لاني لاحظت الموضوع ده مع كذا حد شاري فيرنا جديده

المشاركة الأصلية كتبت بواسطة a.saad

ههههههه

ساعات بعمل زيك
ويبقى نفسى ادور على حد اتخانق معاه

ش مراد
اللى عند جنينة الحيوان
شوف انت جاى منين وانا اوصف

انا جاي من الحدائق
معليش انا الطرق عندي بايظه شويه لاني بقالي فتره بره مصر
بس انا عارف جنينه الحيوانات
الحمد لله اني عارف حاجه