الموضوع: السيارة المظلومة بيجو 301

السلام عليكم اعضاء المنتدى الكرام

دى اول مرة اكتب موضوع فى المنتدى بس كان نفسى اقول الكلام دة
انا تجولت فى اقسام السيارات والموديلات الاخرى فى المنتدى سواء الاعلى من ال301 او الاقل منها علشان اشوف تعليقات واراء الملاك فى سياراتهم وللاسف لم اجد احد فى اى موديل يسب ويلعن فى سيارتة كما يفعل ملاك ال301 مش عارف لية هل معقول ان جميع الموديلات خالية من العيوب او بها عيوب بسيطة وملاكها متوافقين معها ام ان 301 من اسواء الموديلات الموجودة بالسوق
حتى الستروين الاليزية وهى نفس ال301 ومن نفس المصنع وصورة من ال301 فى كل حاجة من الموتور الى شكل التابلوة الى الشنطة وحتى العجل والكماليات اصحابها طالعين بيها السما والى مش مصدق يدخل على صفحة الستروين ويشوف
هى هى نفس العربية واكيد نفس العيوب والمميزات ولكن التعامل من قبل الملاك مختلف تماما انا مبقلش ندارى على العيوب لكن انا شايف تضخيم فى العيوب ومبالغة فى الهجوم
واحد يقول عربية كويسة ولكن فرامل صفر منين كويسة ومنين صفر
والسحب زبالة ونتشه فى الفتيس وتكييف ضعيف وتوكيل وحش وقطع غيار غاليةوغير كدة كتير
وكل دى مشاكل موجودة بس معظمها فردية كل واحد يظهر معاة مشكلة فى عربيتة الشخصية يخليها عيب عام فى العربيات كلها
طبعا فى عيوب عامة زى اسعار قطع الغيار بس دى مكنتش مفجاة احنا عارفين دة قبل الشراء وكل واحد قبل الشراء سأل وعرف العيوب والمميزات وبعدين اشترى
انا عن نفسى معيا العربية واعترف بوجود عيوب ولكن العربية مزعلتنيش ولا مرة حتى الان مفيش مرة دست على الفرامل العربية مهدتش او موقفتش سواء على سرعم عالية او بطيئة
احنا بنظلم العربية وبنخلى اى حد ناوى يشترى يرجع فى كلامة ويروح لعربيات اقل منها والى اشترى يندم على الشراء ودة من الاخر مش من مصلحة الملاك او العربية
خلينا موضوعيين و المشاكل الى الكل بيتكلم عليها موجودة فى ال301 وفى العربيات الاخرى حتى ال بى ام والمرسيدس بيظهر فيهم مشاكل ( مع الفرق طبعا ) ولكن اسلوب التعامل والتضخيم مختلف
انا اسف لو طولت بس كان نفسى اقول الكلمتين دول
وفى الاخر دة مجرد راى شخصى
مع كامل التقدير لجميع الاعضاء الكرام