مرسى مطروح

**homos_loz** · 16-07-2014 07:49 PM

رمضان كريم عليكم يا جماعة انا مسافر مطروح ان شاء الله وانا عربيتى نوبىرا 98 الحمد لله حالتها كويسة موتور استراد ماشاء الله عفشة لسة مغيرليها جلب مقصات اصلى و بارات دركيسيون كوري ومغير ليها فلتر هواء وغيار زيت وفلتر اصلى (زيت موبيل3000) وماشى علية 200كيلو بس فيا جماعة انا خايف من العربية لتعملها معايا وانا مسافر رايكم اية اﻻحتياطيات اللى اعملها واخد بالى منها وانا مسافر ولكم جزيل الشكر

**mhemoo_sale** · 16-07-2014 08:25 PM

بص على سير الكاتبنة وسير الدينامو والكاوتشات وزيوت ومية البطارية واتكل على الله

**Sameh samy** · 16-07-2014 08:33 PM

يا جماعة سير الكاتينة في النوبيرا مالوش دعوة المشكلة دايما في البلية لانها بلاستيك وبتسيح مع الحرارة وتدقر وتقف وبالتالي السير هايقطع ودة اسلم حل التغيير في المواعيد لو بتسافر وتغير الطقم بدري لو بتمشي في الزحمة
النوبيرا عربية اصيلة وثابتة وبتاعة سفر ومريحة جدا
معايا من الزيرو 2008 عربية بتاعة شغل فعلا
اتطمن علي حالة الكاوتش تمام ومستوي المية واوع المية البيضا في النوبيرا واتكل علي اللة وخد بالك العربية دي فيها حاجة واحدة بس وحشة الفرامل بتمسك في المفاجئ والعربية بتزحف ولازم دايما ترجلش علي العجل ورا وكاوتي قدام يكون نضيف

**AِAbdelmonem** · 16-07-2014 10:02 PM

احب ازود على كلام الناس
1- ضغط الكوتش وخصوصا الاستبن واتأكد ان الكوريك والمفتاح موجودين فى الشنطه
2- لو هتسافر بليل او هترجع بليل اتأكد ان النور شغال عالى وواطى وخلفى لأنها حصلت معايا وكنت ماشى مش شايف اى حاجه واكتشفتها وانا على الطريق وطلع كتاوت النور اتحرقت وانا بغسل العربيه قبل السفر
3- مون العربيه من بليل متعتمدش على البنزينات الى على البوبات علشان فى ناش اشتكت انهم بيغشوا فى النزين
4- اتأكد ان معاك العده الى ممكن تحتاجها ( شوية مفكات - سلك - فيوزات دى مهمه اوى -.......)
5- وريح العربيه كل شويه على الطريق بلاش تهلك نفسك وتهلك العربيه
6- اياك تسوق وانت مش نايم كويس وخصوصا لو الناس الى معاك كانو مجهدين هتلاقيهم ناموا وانت غصب عنك ممكن تغفل

**modyegypt** · 16-07-2014 10:22 PM

المشاركة الأصلية كتبت بواسطة سامح سامي

يا جماعة سير الكاتينة في النوبيرا مالوش دعوة المشكلة دايما في البلية لانها بلاستيك وبتسيح مع الحرارة وتدقر وتقف وبالتالي السير هايقطع ودة اسلم حل التغيير في المواعيد لو بتسافر وتغير الطقم بدري لو بتمشي في الزحمة
النوبيرا عربية اصيلة وثابتة وبتاعة سفر ومريحة جدا
معايا من الزيرو 2008 عربية بتاعة شغل فعلا
اتطمن علي حالة الكاوتش تمام ومستوي المية واوع المية البيضا في النوبيرا واتكل علي الله وخد بالك العربية دي فيها حاجة واحدة بس وحشة الفرامل بتمسك في المفاجئ والعربية بتزحف ولازم دايما ترجلش علي العجل ورا وكاوتي قدام يكون نضيف

تصدق انت برنس