الموضوع: عملت اختبار كبس الموتور النهاردة

توكلت على الله وقلت اشوف بقي حالة الباشا اللى قاعد في صدر العربية ده اية ؟؟

دايو جوليت موديل 2001 عاملة 131000 كيلو ... الزيت بقاله 4 شهور عمل 2500 كم نوعه فيسكو 3000

المكان: بنزينة كالتكس تقاطع عباس العقاد مع مكرم عبيد
التكلفة :50 جنيه

دخلت البنزينة جالي العامل قالي عاوز تعمل الاختبار ازاي ... بالكمبيوتر ولا بمقياس الضغط ؟؟؟
قلتله لا بمقياس الضغط ... قالي هو ده موتور عربيتك الاصلي ولا موتور استراد ؟؟ قلتله لا موتور عربيتي ... قالي طب بتشتكي من حاجة معينة ؟؟؟ قلتله العزم عندي في المطالع ضعيف ... وانا شاكك ياما الموتور خفيف ياما طقم الدبرياج فعاوز اطمن ... قالي طيب هنشوف

فك سلوك البوجيهات ... وفك فبشة من ورا الموبينة ... وفك البوجيهات واحد واحد ملقاش عليهم زيت ولا حاجة
وبعدين حط مقاس الضغط في اول بستم وقالي دور مارش ... شوية وقالي بطل ... وراح ناقل على البستم الثاني ... وهكذا الى الاربع بساتم وقالي الاتي

كبس بستم 1 و 3 تمام ... و 2 و 4 اقل منهم شوية لكن في الحدود المسموح بيها والمتوسط العام للمكنة كلها 70% ... قلتله يعني المكنة كبسها كويس كده .. قالي اه كده المكنة حالتها كويسة مش ضايعة ومش محتاج تعمل فيها صيانة دلوقتى ولا طقم شمبر ولا حاجة من دي .... لسة شوية على الكلام ده ... وبعدين رجع كل حاجة زي مكانت وقالي دور بقي واكبس بنزين اوي .... ورجع بص على الشكمان ... فضلت اكبس على ار بي ام 3 قالي زود وصلت ل 4 قالي زود وصلت ل 5 ... عند الخمسة قالي ظهرت دخنة بيضا خفيفة جدا جدا .. يعني مش مقلقة اوي .... وبعدين بص على مقاس الزيت قالي الزيت مقاسه مظبوط ولونة كويس .... فقالي كده المكنة كويسة ومفيهاش حاجة .. هي البوجيهات اللى حالتها تعبانة هي بقالها قد ايه قلتله 10 الاف كيلو قالى لازم تتغير

قلتله يبقي كده العيب من الدسك والاسطوانة ؟؟؟ راح راكب العربية ودور وحط الرابع وحاول يطلع وهو حاطط فرامل اليد ومش عارف قعد يعمل كام حركة كده ونزل قالى لا الاسطوانة بتمسك كويس ... وطقم الدبرياش كويس ...

قلتله امال عزم المطالع تعبان عندي ليه ؟؟؟ قالي يعني ايه عزم المطالع تعبان اشرحلي ؟؟؟ قلتله بيحصل الاتي

في مطالع الكباري او الشوارع اللى طالعة لفوق مفيش مشاكل ... خصوصا لو انا جاي بسرعتي ... لكن المشكلة دايما لو انا واقف على مطلع وبتحرك من الثبات ... بتبان اوي في منحدرات المولات ونوادى القوات المسلحة والجراجات اللى تحت الارض والحاجات اللى زي دي ... لما اكون واقف على المطلع ومستني دورى في الخروج مثلا عشان الحساب او التفتيش واجي اتحرك لازم اكبس بنزين جامد اوى عشان العربية تطلع لفوق .. خصوصا لما اكون محمل 4 افراد ..... قالي ده ممكن يكون عيب البوجيهات والفلاتر عشان بقالها متغيرتش كتير فخانقة العربية ... وكمان البوابة عندك محتاجة تنظيف ... لو عملت الحاجات دي ولسة المشكلة دي يبقى نبص على الرشاشات ممكن تكون هي المشكلة ....

قلتله طيب بعد العيد بقي نبقي نعمل الصيانة ونشوف ... على فكرة في البنزنة دي بيعملوا الصيانات دي كلها وعندهم كمان صيانة عفشة وضبط زوايا وترصيص ... بس معرفش حد جربهم في الحاجات دي قبل كدة

وبعدين مشيت بقي :) :) :)

وشكرا