تجربة سيئة و انعدام ضمير فى توكيل أبو رواش!!!

**Dr.a.osman** · 23-07-2014 02:12 AM

سلام عليكم
النهارده روحت التوكيل فى أبو رواش أعمل صيانة الألف و أظبط زوايا ﻷنى لاحظت العربية مش ثابتة فى الملفات و فى ناحية اتقل من ناحية فى الدركسيون. المهم روحت التوكيل و بعد 4 ساعات و نص المهندس قاللى خلصت و بالفعل كان فيها زوايا (مش عارف أزاى عربية زيرو تبقى فيها زوايا !!!) و هو طلع جربها بنفسه و قاللي تمام. المهم استلمت العربية الساعة 3 ظهرا و طلعت أجرب لقيت العربية اسوأ من الأول!!!! رجعتله طبعا و قلتله ايه اللى انتوا عملتوه؟ قاللى طيب ثوانى هجيب فنى الزوايا يطلع يجرب معاك. غاب نص ساعة و رجع قاللي بص ياباشا الفنى بالفعل بيقول ان العربية فيها شعرة مش مظبوطة قولتلوه طب مادام الباشا عارف انها مش مظبوطة طب طلعها ليه و بعدين مادام العربية أساستها و العفشة سليمة يبقى متظبطتش ليه؟؟؟! قاللي معلش يبقى سيبهالى النهاردة و تعالى خدها بكره!!!!!! ليه با عم؟ هي كيمياء؟؟ قاللي معلش أصل الوقت اتأخر و الراجل لسه عنده عربيات تانية مخلصهاش لحد دلوقت. طب و أنا مالى؟ المفروض المةضوع ميبقاش كروته و خلاص! من الواضح ان مفيش توكيل كويس فى مصر. مهندس كداب و فنى معندوش ضمير و حاجة تقرف. المهم أنا مارضيتش اسيب العربية لما لقيتهم معندهونش ضمير و كدابيين و من الواضح كمان مش فاهمين! اتصرف ازاي دلوقت؟ خايف اسافر بيها كده عقبال ما أوصل ألاقى الكاوتش باظ! و المشكلة الوقت ضيق بالنسبة لي فى القاهرة. هل حد من حضراتكم يعرف حد كويس و جربه فى عربيته السيراتو الجديدة و عنده برنامجها عشان يظبط عليه عشان الناس اللى بتفتى فى الزوايا كتير قوى.
شكرا

**hugan** · 23-07-2014 02:39 AM

التوكيلات اخرها تغيير زيوت وفلاتر
شوف اي مركز محترم للزوايا واضبط عنده
شغلاته بسيطه ومافيهاش تعقيد
ومش مستاهله تروح التوكيل

**ahmedamgad18** · 23-07-2014 03:25 AM

روح لتوكيل بريدجستون Fit & fix عندهم ظبط زواريا . انا مجربهم عندنا فى اليكس وممتازين

**Land_Cruiser** · 23-07-2014 03:35 AM

المشاركة الأصلية كتبت بواسطة hugan

التوكيلات اخرها تغيير زيوت وفلاتر
شوف اي مركز محترم للزوايا واضبط عنده
شغلاته بسيطه ومافيهاش تعقيد
ومش مستاهله تروح التوكيل

+1
الافضل فعلا حضرتك تشوف مركز لضبط الزوايا غير التوكيل

**kokowasfy** · 23-07-2014 03:38 AM

لو حضرتك معاك عربية سيراتو الشكل القديم روح اى مركز خدمة ضبط زواية و حتتحل بسهولة لكن لو الشكل الجديد هتبقا مطر للتوكيل

**mr.moustafa** · 23-07-2014 04:32 AM

فعلا مش بس التوكيلات .. معظم الناس مابقاش عندها ضمير
ربنا يلطف بينا

**Dr.a.osman** · 23-07-2014 09:38 AM

المشاركة الأصلية كتبت بواسطة kokowasfy

لو حضرتك معاك عربية سيراتو الشكل القديم روح اى مركز خدمة ضبط زواية و حتتحل بسهولة لكن لو الشكل الجديد هتبقا مطر للتوكيل

ماهي دي المشكلة! أنا معايا الشكل الجديد. عشان كده بسأل على حد معاه موديل 2014 و ظبطلها زوايا برة؟ و عند مين؟ ﻷن على حسب معلوماتى برنامج الزوايا بتاعها مش منتشر.

**rafikesmat** · 23-07-2014 11:53 AM

باشا انا حصلت مشكلة الزوايا دية عندى بس بسبب مطب ورحت مركز ظبت زوايا بوظها اكتر عشان فعلا زوايا الشكل الجديد مش ومجودة على الجهاز بس التوكيل بتاع القطامية ظبتها 100/100وواحد من التوكيل هو الى نصحنى بلقطامية بس انل عايزك تتاكد هيا زوايا ولا عيب طريق

**Dr.a.osman** · 23-07-2014 03:51 PM

المشاركة الأصلية كتبت بواسطة rafikesmat

باشا انا حصلت مشكلة الزوايا دية عندى بس بسبب مطب ورحت مركز ظبت زوايا بوظها اكتر عشان فعلا زوايا الشكل الجديد مش ومجودة على الجهاز بس التوكيل بتاع القطامية ظبتها 100/100وواحد من التوكيل هو الى نصحنى بلقطامية بس انل عايزك تتاكد هيا زوايا ولا عيب طريق

شكرا على المساعدة يا باشا
أنا كلمتهم فى القطامية و حاولت أحجز ميعاد قريب قالولى اقرب ميعاد هيبقى يوم 30!!! طبعا الكلام ده مش مناسبنى فاقترحوا عليا انى اروح السبع اللى فى المعادى و حجزولى ميعاد على بكرة ان شاء الله. ربنا يسهل و يعرفوا يظبطوها. عموما قالولى ان الشكوى اللى قدمتها هيترد عليها خلال 48 ساعة و هنشوف هيعملوا ايه. لو بتوع السبع ماظبطوهاش هحجز معاد بعد العيد ان شاء الله فى القطامية.