تقرير بسيط واسألة مهمة جدا عن الإليزيه ... ارجو الإفادة

**Ahmed vito** · 23-07-2014 04:10 PM

الحمد لله اشتريت ستروين اليزيه من 3 ايام وكنت قبل كدة سألت عن شوية حاجات قبل الشراء وعلى اساسها اشتريت

العربية زى ماقلت بقالها معايا 3 ايام واللى حصل كالتالى :

بعد الاجراءات والورق والبنك وروح وتعالا والاجراءات الروتينية دى ( عشان شارى بالقسط ) بقيت جاهز على الاستلام

رحت تانى يوم على المعرض اخدت العربية الصبح وطلع معايا مندوب وخلصنا اجراءات الترخيص وفي طريقي للمرور كنت سايق زى ما ناس كتير نصحتني اخرك 80 وماتحرقش ولا تجرب تعمل كيكات ولا اى حاجة

في اليوم التالي قلت اسافر بالعربية اسكندرية اجربها وفى نفس الوقت اعمل ليها تليين مع انى ماكنتش مقتنع اوى بفكرة ان فيه عربية جديدة بتلين بس عادى عملت بنصيحة الناس مع العلم ان برضو كانت النصائح انى طول الطريق مازودش عن سرعة 100 ومن وقت للتانى كدة ممكن احرق بهدوء شوية وارجع تانى على نفس السرعة وياريت لو كمان شوية انزل على سرعة 80 وشوية ازود تانى على 100
بصراحة فضلت كدة طول الطريق مثبت نفسي على سرعة مابين 80 لحد 100 لحد ماوصلت الساعة 7 الا ربع والمغرب هيأذن وكنت طبعا عايز افطر فشديت شوية بالعربية ومشيت على 140

فى طريق العودة من اسكندرية باليل كنت ماشي بالعربية على سرعة 140 ومن باب الفضول زودت مرة او اتنين ومشيت على 160 كنت عايز اجرب تسارع وثبات العربية

انا عارف انى طولت عليكم بالشرح وكنت ممل بس بصراحة الهدف من دة كله انى خرجت بشوية اسألة تهمني اوى الاجابة عليها :

1- هل اللى انا عملته عموما بالعربية دة فيه ضرر على المكنة فى حاجة خصوصا انى ماكنتش مقتنع اوى بموضوع تليين العربية دة ؟

2- الحقيقة انا ماعجبنيش ثبات العربية وبصراحة اكتر انا كنت سايق قلقان لان العربية من بعد ال 120 بحس انها مهزوزة والهوا بيلعب شوية بيها ولما بعدى من جنب مقطورة كنت بحس انى هروح على الجنب التاني ... انا عارف انك لما بتعدى من جنب اى مقطورة بتحس برعشة بس مش عارف ليه حستها مبالغ فيها وانا سايق مع العلم ان العربية وزنها الصافى كويس ومش خفيفة فياريت لو حد يشرحلى السبب وايه اللى ممكن اعمله عشان ازود ثبات العربية شوية واتقل وزنها

3- كنت بفكر اغير مقاس العجل واركب مقاس 16 بدل من 15 خصوصا انى كنت عارف ان الايلزيه اصلا كانت بتنزل بمقاس 16 فهل دة ينفع ولو ينفع عايز اعرف المقاس المناسب بالظبط اللى ممكن اركبه

4- لو حبيت اركب زينون ووحدة رفع هل دة ممكن يأثر علي ضفيرة الكهربا في العربية ولا لأ

بصفة عامة وبغض النظر عن كل اللى فات العربية تستحق فعلا انها تكون مميزة بالنسبة لفئتها ولما تقارنها بعربيات كتير فى السوق كفاية انها اوروبي لانى من عشاق الاوروبي وعمرى ماركبت كورى ولا هركبه لاني مش بحبه ابدااااااااا ...

ومتأسف جدا جدا جدا على الإطالة وارجو الإفادة من حضراتكم لاني بصراحة محتاج احس انى مطمن من ناحية العربية

**ahmed.Elashy** · 23-07-2014 04:43 PM

بخصوص التليين ف اللي انت عملته دا غلط طبعا عشان اي عربيه كديده لازم تتلين وممكن تفتح المانيوال بتاع العربيه فيه فسم مخصص للتليين ويقولك ازاي تلين الكاوتش والموتور والعربيه بصفه عامه.. انت كده بتهلك الموتور وبتقلل من عمر العربيه.. ومتصدقش الفتوي اللي بتقول العربيه متلينه جاهز او مفيش تليين للعربيات الجديده...صانع العربيه ذات نفسه بيقولك اعملها تليين

بخصوص الثبات العربيه دي زي معظم العربيات اللي في فئتها بتااه مدينه او سفر هادئ مش بتاعه جري وسرعه وشغل رياضي ..العربيات الجديده كلها صاجها خفيف والنقل بيلعب بينا واحنا ماشيين ف متقلقش كل العربيات كده بس اهم حاجه تعرف قدرات عربيتم عشان متفتريش عليها وتقول العربيه وحشه لا هيا مش بتاعه جري وغرز وسرعات عاليه..انت ممكن تعمل بيها كده ..زي الفرنا مثلا بس لما الفرنا بتتقلب محدش يرجع يقول الفرنا ومشه ..فهمت قصدي ؟

بخصوص الكاوتش ممكن تغيره في التوميل عاتقد مفهاش مشكله

بخصوص الزينون.. اوعي تلعب ف كهربا العربيه عشان متخرجهاش من الضمان
كلنا عاوزين نركب بس لما ضمانها يخلص
مبروك ع العربيه وبالتوفيق

**kantofanto** · 23-07-2014 05:18 PM

الف مبروك على العربية و ربنا يبارك لك فيها و يكفيك شرها ، القرص على الماتور و العربية جديدة غلط جداً على العربية خصوصاً انها لسا بتلين ، بخصوص الكاوتش شوف الكتالوج بتاعها كاتب ايه، و بخصوص الزينون متركبوش دولاقتى.

**عبدالله برعى** · 23-07-2014 05:30 PM

1- التليين مش مذكور فى المانول بتاعت كل العربيات

2- وحدات الرفع لوحدها مش حتاثر على الضفيرة لو لوحدها مع بطارية 70 امبير اما الزينون لازم تركب مثبتات جهد (كتاوات)

3- تغيير المقاس للكاوتش ممكن يفيدك ولكن حياثر على السرعه الحقيقة والسرعة اللى فى العداد بنسبة خطأ 3 كم فى 100كم دا لو غيرت لكاوتش والمحيط نفسة بتاع العجلة زاد

اتمنالك التوفيق بس ملوش لزمة موضوع البنك نهائى نهائى لو تقدر تخلص منه اخلص والمقدم اشترة مستعمل دى نصيحة اسلامية من اخوك لانى مريت بموضوع البنك(وعامةانا معرفش ظروفك وظروف شرائك ايه )ولكن وجب التنويه لانك عضو فى منتدى انا اخلص له

**Ahmed vito** · 24-07-2014 03:16 AM

المشاركة الأصلية كتبت بواسطة ahmed.elashy

بخصوص التليين ف اللي انت عملته دا غلط طبعا عشان اي عربيه كديده لازم تتلين وممكن تفتح المانيوال بتاع العربيه فيه فسم مخصص للتليين ويقولك ازاي تلين الكاوتش والموتور والعربيه بصفه عامه.. انت كده بتهلك الموتور وبتقلل من عمر العربيه.. ومتصدقش الفتوي اللي بتقول العربيه متلينه جاهز او مفيش تليين للعربيات الجديده...صانع العربيه ذات نفسه بيقولك اعملها تليين

بخصوص الثبات العربيه دي زي معظم العربيات اللي في فئتها بتااه مدينه او سفر هادئ مش بتاعه جري وسرعه وشغل رياضي ..العربيات الجديده كلها صاجها خفيف والنقل بيلعب بينا واحنا ماشيين ف متقلقش كل العربيات كده بس اهم حاجه تعرف قدرات عربيتم عشان متفتريش عليها وتقول العربيه وحشه لا هيا مش بتاعه جري وغرز وسرعات عاليه..انت ممكن تعمل بيها كده ..زي الفرنا مثلا بس لما الفرنا بتتقلب محدش يرجع يقول الفرنا ومشه ..فهمت قصدي ؟

بخصوص الكاوتش ممكن تغيره في التوميل عاتقد مفهاش مشكله

بخصوص الزينون.. اوعي تلعب ف كهربا العربيه عشان متخرجهاش من الضمان
كلنا عاوزين نركب بس لما ضمانها يخلص
مبروك ع العربيه وبالتوفيق

بخصوص التليين انا فضلت ماشي بتاع يومين مابزودش عن ال 80 وحتى وانا مسافر نفس الكلام يمكن وانا راجع بس اللى زودت شوية لحد 120 وبعد كدة مشيت شوية 140 بس مش كتير لكن اغلب طريقى في الرجوع مازودش عن ال 120 فماعتقدش انى حرقت على الموتور وغير كدة كنت بسيب الموتور يوصل لأى سرعة براحته خالص مش بحرق عليه ولا بعمل كيكات
بخصوص الثبات انا عارف كويس انى مختار عربية مش بتاعت حرق ولا شد ولا جرى انا بتكلم فى نقطة تانية خالص وهى انى عايز احس ان العربية نفسها مش خفيفة عايز احس انها بتسحب من غير ما اقلق ان حاجة عدت جنبي انما مش بقولك هجرى وهحرق واعمل غرز ولعلمك انا كان معايا قبل العربية دى رينو ميجان وكنت بجيب بيها 210 وانا مش قلقان خااااااااااااااااااالص ومش بقارن بين دى وبين الستروين لان فيه فرق كبير طبعا بس اللى انا عايز اقوله انى على الاقل احس ان العربية مش مقلقة على ال 150 فهمتني ؟

**Ahmed vito** · 24-07-2014 03:19 AM

المشاركة الأصلية كتبت بواسطة عبدالله برعى

1- التليين مش مذكور فى المانول بتاعت كل العربيات

2- وحدات الرفع لوحدها مش حتاثر على الضفيرة لو لوحدها مع بطارية 70 امبير اما الزينون لازم تركب مثبتات جهد (كتاوات)

3- تغيير المقاس للكاوتش ممكن يفيدك ولكن حياثر على السرعه الحقيقة والسرعة اللى فى العداد بنسبة خطأ 3 كم فى 100كم دا لو غيرت لكاوتش والمحيط نفسة بتاع العجلة زاد

اتمنالك التوفيق بس ملوش لزمة موضوع البنك نهائى نهائى لو تقدر تخلص منه اخلص والمقدم اشترة مستعمل دى نصيحة اسلامية من اخوك لانى مريت بموضوع البنك(وعامةانا معرفش ظروفك وظروف شرائك ايه )ولكن وجب التنويه لانك عضو فى منتدى انا اخلص له

بالنسبة لوحدات الرفع وانا بصين هسأل تانى فى التوكيل واشوف لو ينفع يركب عندهم يبقي ياريت
اما بخصوص البنك فصدقني اخر حاجة كنت احب اعملها انى الجأ لشرا عربية بالقسط وانى اتعامل مع البنك فى حاجة زى دى بس ظروفي الخاصة اللى عملت كدة ولعلمك انا ناوى والنية خالصة انى خلال سنة اخلص القسط كله وادفع المبلغ بتاع العربية المتبقي كله ومش هستنا ال 5 سنين بس ربنا يكرم بمبلغ كدة وساعتها هخلص ان شاء الله

**Raef Sobh Azab** · 27-07-2014 12:03 AM

1. إن شاء الله مفيش قلق. من الأفضل عدم تعدى سرعة 80 فى الألف كيلو الأولى. على العموم مفيش مشكلة خالص. من هنا ورايح خد بالك
2. ثبات العربية ليس سيئا ولكن مشكلتك إنك بتقارن بالميجان
3. لا أفضل تغيير الجنط لأن على حد علمى إن جنط 16 بيتعب العفشة وبتشعر بكل المطبات والنقر على المدى الطويل
4. لا أعلم شيئا عن هذه النقطة

بالتوفيق ومبروك على العربية
بارك الله لك فيها وصرف عنك شرها وررزقك خيرها

https://www.facebook.com/groups/345916432229306/