الموضوع: احترت و محتاجة مساعدتكم إذا سمحتم

السلام عليكم و رحمة الله و بركاته

في البداية أحب أقول لكم كل سنة و انتم طيبين بمناسبة عيد الفطر ، يا رب يعوده علينا كلنا دايما بالخير ..

أنا متابعة المنتدى هنا بقالي فترة كبيرة .. و لما جه الوقت اني أجدد ان شاء الله قلت أدخل أستشيركم ..

أنا كما في بياناتي معايا سوزوكي ماروتي 2009 .. جبتها عشان صغننة أتعلم فيها و بصراحة شيلاني و عمرها ما قلت بأصلها معايا أبدا .. لكن ناقصها شوية حاجات خليتني أفكر في التجديد ..

بصراحة كنت ناوية على صنى السوبر صالون ، و كنت هستحمل شكلها مقابل انها عربية محترمة .. لكن لما دخلت هنا لقيت انها فيها مشاكل كتير لدرجة قفلتني منها ..

الريو بالنسبة لي عربية شكلها رجالي .. مش بأحب شكلها خالص .. و لا الأكسنت بصراحة .. الشارك كنت ناوية عليها فئة أولى لكن ما لقيتش فيها وسائل أمان ..

بالنسبة لمتابعة الصيانات .. التوكيلات اللي عندنا هي تويوتا - ميتسوبيشي - هيونداي - كيا - شيفروليه ، فأنا بأفضل أجيب حاجة توكيلها عندنا .. عشان المواقف الطارئة ..

بالنسبة للفلوس .. في حدود 135000 لأني ان شاء الله هجيبها كاش و مش ناوية أقسط ..

و اختصارا للكلام الكتير عشان مالكوش ذنب فيه :) ، أنا محتاجة عربية تكييفها تلاجة ، سيدان ( للأسرة ) ، تستحمل شوارع الإسماعيلية ( و تحديدا أرض الجمعيات للي يعرفها ) ، و بما اني سيدة فمحتاجة عربية أدورها و أمشي .. يعني مش كل شوية ألف بيها على حد .. ما عنديش مشكلة في المانيوال أو الأوتوماتيك .. العربية مش هغيرها ( بأمر الله ) لمدة لا تقل عن 10 سنين .. يكون فيها وسائل أمان .. انا سواقتي معظمها جوا البلد .. و ممكن سفر مرة او مرتين شهريا لمحافظات قريبة و سفر مرتين سنويا للمصيف ..

هل أحاول أدبر الـ 10 التانيين عشان أجيب شارك فئة تانية ؟ و لا فيه اختيارات مناسبة أنا مش واخدة بالي منها ؟

و ألف شكر ليكم مقدما و آسفة جدا إني طولت عليكم :)

المشاركة الأصلية كتبت بواسطة skoda1996

شارك كويسة جدا جدh
اوبترا الشكل القديم نزلت تاني و فيها 2 ايرباجز و abs.. ميزتها ان صياناتها ارخص

طيب حضرتك تعرف نزلت بكام ؟