انا معايا جيتا ٢٠٠٧ تاني يد من سنتين و نص دلوقتى عاملة ١١٠،٠٠٠ كم
محتاجة صيانات كتير
بعض اصدقائي خوفوني من مشاكل الفتيس و بيقولولي بيعها ارجو النصيحة
و محتاج ورشة صيانة محترمة
قرأت الموضوع عن الورش واعرف ان هاني سمير هو الاشهر بس انا مارتحتلوش
رحتلوا مرتين وفي المرتين قفلت منه
اولا هو غير مسئول عن قطع الغيار من المحلات اللي حوله حتي محل اخوه اللي جنبه و قطع الغيار عندهم غير مضمون انها اصلية، غير كدة زحمة و غالي و مش بيشتغل بايدة طبعا و يعتمد علي صنيعية وانت وبختك
كنت بروح لواحد اسمه شيخ احمد في الحرفيين كان كويس بس اصبح زحمة ولا يهتم واتسببلى في مشكلة كانت يمكن تعمل حادثة موت لولا ستر ربنا
مرة غيرت فلتر بنزين عنده و هو اللي قلي اشتريه منين
بعدها بيومين العربية كانت تقطع كل شوية وانا مش فاهم ليه
رحتله تاني وتخيلوا ان العربية تقطع كل شوية وابطل وادور من الهرم حتي الحرفيين
المهم قللي المشكلة في فلتر البنزين نوعه مش كويس
طبعا اضطريت اجيب واحد تاني في اقل من اسبوع وركبهولي
بعدها بيومين علي الدائري وانا معايا مراتي وابني فجاة لقيت العربية قطعت تاني ومؤشر البنزين بينزل لغاية زيرو
بصيت تحت العربية لقيت البنزين كله علي الارض
طبعا كان موقف صعب بس ربنا ستر وبعد حوالي ربع ساعة لقيت عربية انقاذ وقفتلي واتفقت معاه ونقلني لاقرب ميكانيكي لاكتشف ان كل المشكلة ان البيه مربتش افيز التثبيت كويس!!!
المشاكل في العربية متراكمة لمشغولياتي والكسل غير اني ساكن في الهرم ومتعقد من الصنايعية و مستني الاقي حد محترم يخاف ربنا و مصنعيته بما يرضي الله
المشاكل حاليا:
١- مشاكل في العفشة تقريبا عمرة كاملة
٢- تسريب في مية الرادياتير ودي مشكلة بقالها معايا حوالي شهر . تظهر رسالة check coolant والاقيه ناقص شوية من ١/٢ ل ٣/٤ لتر كل ٤-٥ ايام ازوده بميه حمرة لغاية ما الرسالة تظهر تاني بعد حوالي ٤ ايام بس الحمد لله العربية مبتسخنش
٣- التكييف ضعيف وواحد فني تكييف قالي ان الكومبرسور ضعيف ومحتاج يتغير بس عايز اتاكد ومش عارف تفرق لو حد متخصص فولكس؟؟
٤- مؤشر البنزين بيعلق مع اني لسة مغيره من سنة
٥- فرش السقف سقط ومحتاج تغييره
٦- الفتيس الحمد لله مفيهوش مشاكل احيانا يحصل ناتشة عند التاني، بس اعتقد يجب عمل صيانة و تغيير زيت
اريد نصيحتكم هو المشاكل المتراكمة دى محتاجة تركيز كام يوم و شوية مصاريف و العربية تستحملني كام سنة كمان ولا وجب التغيير
المشكلة ان العربية خليجي و كماليتها جميلة جدا و مش عارف لو هغير اجيب ايه و السوق دلوقتي ملخبط
في كل الاحوال احتاج ورشة جيدة لعمل الاساسيات لغاية ماتساعدوني باقتراحاتكم و اخد القرار المظبوط
سمعت عن امير و جوزيف في مدينة نصر،ايه رايكم ؟؟
الحقيقة انا متفائل لما وصلت للمنتدى الرائع ده وواثق في اراء حضراتكوا
وشكرا واسف على الاطالة
المفضلات