ملاك كورولا 93-97

**O.M.S** · 31-07-2014 06:34 AM

السلام عليكم ورحمه الله وبركاته

يا جماعه الموضوع ده انا عاملوا علشان عاوز اجمع اصحاب وملاك كورولا 93-97 الملكه بصراحه كدا العربيه دي معانا من 97 ولغايه دلوقتي وبحبها جدي وفعلا مش عاوز اغيرها رغم كل الضغوط الي وقعت عليا اخرها فلوانس 2013 بتاعت اخويا بس انا عندي امل اني اوصل بالعربيه دي لمستوى اعلى من اي عربيه وبصراحه بديت في الموضوع بس ببطئ بسبب التكلفه الماديه .

بصراحه انا كنت ناوي ابعها باقل سعر لاني عملت بيها حادثه جامده من ظهرها وبعده على طول الماتور رزع ووالدي قعد يزن عليا ابعها واجيب اللنترا وركنتها فتره بس بعد فتره قلت اظبتها وابعها سليمه واول حاجه السمكره لقيت الي بيشدني وبيقولي لا اصبر ضبطها ليك رحت قررت فلحظه انها تبقا معايا وابدا التعديل.

اولا ظبطت السمكره كلها وغيرت لونها مطلعش الي عاوزه بس حسيت بتغير وغيرت الفرش الي جوه والارضيه وظبط الشكل .

ثانيا نطيط على الماتور ورحت لفيت ودورت على النت على الماواتير بتاعتها لغايه ما لقيت ماتور اسمه 4age blacktop 20v وده كان 160 حصان قعدت ادور عليه لغايه ما يئست بس لقيتوا في الاخر وردت الروح فيا وركبتوا وبصراحه كدا ماتور جبااااااار ما شاء الله مفيش عربيه علمت عليا من ساعتها الا الجولف 6 tsi وكنا قريبين من بعض قوي

ثالثا بقا غيرت شويه حجات بسيطه زي الفوانيس ركبتلها عدسات ورينجات ولدات في البيت عندي وعملتلها وش كريستال وغيرت المرايات بمرايات ضم كهربا وغيرت اضاءه التابلوه والعدادات وعملت الشنطه كهربا بردوا وركبتلا جنوط 16 وكمان ديفل جاسما ياباني

وطبعا بعد دا كلوا انا فلست نهائي ووالدي غضبان عليا (ما انا ضحكت عليه ) وقالي مش هصرف عليها ماليم تاني لدرجه ان العفشه بايظه ومش عاوز يساعدني بس انا الحمد لله اتخرجت السنادي وفضيت لها واول ما اشتغل هبدا تاني تظبيط الي هو بلااااوي بجد انا دماغي مبتبطلش تفكر فيها (بحلم بيها كتييير) ولغايه دلوقتي العروض شغاله بس انا قررت اني احتفظ بيها .

انا بقا نفسي نعمل جروب ونتجمع كل مالكي الكورولا 93-97 وندي لبعض افكار عنها وانا جمعت عنها داتا ومعلومات وصور كتييير قوي نفسي افيد بيها كل الي يملكها بجد مش هتندم :) وصعب فعلا احط الداتا دي كلها في يوم واحد .

انا اسف على التطويل معلش انا عارف اني ((ممل جدا )) بس مش بايدي يا جماعه :)

السلام عليكم :)

**hesham fawzy h** · 31-07-2014 07:59 AM

ان برضو معايا كرولا 98 من الزيرو بس عربية بسم الله ما شاء الله موفرة بنزين بطريقة غير عادية ..

وعملت حدثة برضو بيها فى الشنطة

ولسا عاملها عمرة ماتور ، بس لما ادوس بنزين مبتسحبش ذى الاول وساعات مبتزوتش سرعة اصلا.. اعمل اية فى المشكلة دى ؟؟

**O.M.S** · 31-07-2014 04:41 PM

المشاركة الأصلية كتبت بواسطة hesham fawzy h

ان برضو معايا كرولا 98 من الزيرو بس عربية بسم الله ما شاء الله موفرة بنزين بطريقة غير عادية ..

وعملت حدثة برضو بيها فى الشنطة

ولسا عاملها عمرة ماتور ، بس لما ادوس بنزين مبتسحبش ذى الاول وساعات مبتزوتش سرعة اصلا.. اعمل اية فى المشكلة دى ؟؟

هي 1300 صح بص يا باشا مشكله السحب دي ممكن تكون في ميت حاجه وحاجه ممكن كربراتير مش مضبط وممكن من الشكمان وممكن العمره ماتكونش كويسه بصراحه مش عارف ليه انت طيب بتشتكي من حاجه تانيه مع السحب وعاملها الصيانه الدوريه البوجيهات والفلاتر وكدا

**hesham fawzy h** · 31-07-2014 07:20 PM

المشاركة الأصلية كتبت بواسطة o.m.s

هي 1300 صح بص يا باشا مشكله السحب دي ممكن تكون في ميت حاجه وحاجه ممكن كربراتير مش مضبط وممكن من الشكمان وممكن العمره ماتكونش كويسه بصراحه مش عارف ليه انت طيب بتشتكي من حاجه تانيه مع السحب وعاملها الصيانه الدوريه البوجيهات والفلاتر وكدا

هى المفروض متغيرلها كل حاجة من فلاتر لسيووور الخ... بس فى مشكلة تانية مع السحب هى ان العربية ساعات بتبطل بس قليل جدا و هى واقفة بس

**shnouda** · 31-07-2014 11:57 PM

انا شارى العربية جديد وهى عربية جميلة موديل 94 بس المشكلة اتها وطية شوية غير كدة ممتازة بس انا عايز اعرف العربية دى مش بططلع على السلانسية ولا اية وانا طالع بدوس سنة بنذين مش بتتطلع سلانسية غير كدة تترج جامد هل دى اسطوانة ولا اية على الرغم ان سحبها ممتاز وهل التوكيل بيشتغل فى العربية دى ولا لا عشان موديل قديم

**O.M.S** · 01-08-2014 05:39 AM

المشاركة الأصلية كتبت بواسطة hesham fawzy h

هى المفروض متغيرلها كل حاجة من فلاتر لسيووور الخ... بس فى مشكلة تانية مع السحب هى ان العربية ساعات بتبطل بس قليل جدا و هى واقفة بس

هو كده يا باشا يا اما الكربراتير عاوز يتضبط يا اما الكهربا عاوزه تتظبط مفروض ان مع العمره يضبط الاسبراتير مع البساتم علشان تبقى مضبوطه بالملي راجع على الاتنين دول وشوف في واحد مشهور جدا في شبرا اسموا الحج ابراهيم بتاع كاربراتير وريلوا الكربارتير والعربيه وهو هيقولك محتاجه حاجه ولا لا وبالنسبه للكهربا اي كهربائي او ميكانيكي نظيف يشفلك الحوار ده وان شاء الله تتضبط :)

**O.M.S** · 01-08-2014 05:49 AM

المشاركة الأصلية كتبت بواسطة shnouda

انا شارى العربية جديد وهى عربية جميلة موديل 94 بس المشكلة اتها وطية شوية غير كدة ممتازة بس انا عايز اعرف العربية دى مش بططلع على السلانسية ولا اية وانا طالع بدوس سنة بنذين مش بتتطلع سلانسية غير كدة تترج جامد هل دى اسطوانة ولا اية على الرغم ان سحبها ممتاز وهل التوكيل بيشتغل فى العربية دى ولا لا عشان موديل قديم

السلام عليكم
بصراحه الحاجه الوحيده الي كنت بشتكي منها قبل الحادئه هي انها واطيه جدا بس دلوقتي انا مركب جنوط 16 ومن بعده ماحكتش في اي مطب وطبعا منفخ الرفارف قدام وورا علشان ماتحكش فيهم وثانيا بالنسبه للتوكيل هو بطل يشتغل فيها بس بيبيع قطع غيارها الاصليه وفي امكان تانيه بتبعها وفي اماكن موثوقه بتصلح التويوتا زي العالميه في الحرفيين وبالنسبه للموضوع الطلعه على السلانسيه والرجه ممكن تكون ديسك واسطوانه وغالبا حتى لو جداد مبيبقوش قد كدا لان مش هيبقوا زي الاصلي وممكن بردوا كهربا :)

**Ahmed Galal** · 01-08-2014 04:15 PM

انا عربيت مودل 92 1300 و معايا من سنه 2009 و انا باعشق الموديل ده جدا و مش عايز ابيعها و ليا خبره متواضعه مع الموتور ال 1300 و العربيه عموما و مبسوط ان فيه حد هايجمعنا تانى بس بالنسبه للتعديلات اللى حضرتك عاملها فيه واحد بقا على النت على منتدى اجنبى اسمه toyota nation و اسمه kiwi corolla لو كتبت بس اسمه فى جوجل هاتشوف احلى تويوتا كورولا ملكه فى العالم و حاطط عليها كميه تجهيزات و اوبشنز غريبه و نادره و اصليه من المصنع ده بقا اللى نفسى اوصلله فى عربيتى

**karim0000** · 02-08-2014 03:36 AM

يا ريت يا جماعة حد يعرف ازاي اعلي سخان الكربراتير عشان السخان بيشتغل بس واطي اوي و العربية بتترجرج من ساعة لما عملت الكربراتير فعايز اعرف الرجلاش بتاعه فين

**karim0000** · 02-08-2014 03:48 AM

و بالمرة كمان انا كان عندي الدركسيون تقيل شوية و العربية مش باور فا جبت علبة دركسيون جديدة تايواني بعد ما لفيت علي الاستيراد و ملقتش حاجة نضيفة بس الدركسيون خف شوية صغيرة بس يعتبر تقيل برده و روحت للعفشجي بيقولي القطمة عندك فيها بوش و شوف كهربائي يفكها و بيقولي ممكن يكون ليها بلي بيتغير و ممكن تجيبها كلها استيراد و انا بصراحة مش عاوز افك و انا مش عارف الدنيا فيها ايه انتوا ايه رايكم و هل فعلا القطمة لو فيها بوش ده يتقل الدركسيون ....ملحوظة العربية تويوتا عيون موديل 98 و ركبت الملكة و دركسيونها كان اخف بكتير مع العلم ان العربيتين علي كلام الناس نفس الميكانيكا و العفشة