ايطالى ولا الماني

**zico_momo** · 03-08-2014 05:28 PM

السلام عليكم

انا بقالى فتره عامل دوشه فى المنتدي بس عشان مش عارف استقر على عربيه كويسه

متحار بين اربع عربيات 2 منهم ايطالى و2 منهم المانى

بونتو ولا ابيزا 2002
سيينا ولا كوردوبا 2002

وبعدين ناس قالتلى طالما هاتجيب ابيزا هات كوردوبا احسن بشنطه واوسع من الابيزا
فا باقيت كمان بقارن بين الابيزا والكوردوبا

محتار كل حاجه ليها ميزه وليها عيب
انا عاوز حاجه مش ضيقه
تكون عمليه وقطع غيارها تكون متوفره ومش متعبه فى صيانتها
تكون ثابته وكويسه
وتكون شكلها خارجيا وداخليا كويس
تكييف وباور
يفضل يكون فيها امان ABS - EBD - Airbag
system encryption عشان مايبقاش سهل سرقه العربيه حد يدورها بسلكتين ويمشي
عربيه ماتكونش ضعيفه لا صاج ولا موتور

ياريت تساعدوني لانى حاسس انى من كتر المقارنات مش هاجيب عربيات فى الاخر :(

**waleed acc** · 03-08-2014 08:15 PM

أظن في سيارات الركوب الالماني الافضل
بينما في سيارات السباق فالايطالي لها باع طويل
و شكرا

**pioneerahmed** · 03-08-2014 08:39 PM

انا بستبعد السيينا طبعا
الابيزا منتشرة اكتر بكتير عن الكوردوبا
البونتو معرفش عنها حاجة

ابيزا

**zico_momo** · 04-08-2014 10:50 AM

فى انتظار رأي باقى الشباب

**mr_sese** · 04-08-2014 04:55 PM

الكورى ماله بس

**Ahmed Saad** · 04-08-2014 05:07 PM

بص ياباشا وعن تجربه أي عربيه تبع فولكس فاجن جروب يعني فولكس - أودي - اسكودا - سيات اكتر عربيات ألمانيه متوفره ليها قطع غيار جديد واستيراد وبسعر رخيص مقارنه بعمرها الافتراضي الكبير يعني انا معايا باسات موديل 2000 وقطع غيارها والله أرخص من قطع غيار الياباني فنصيحتي خليك في السيات عندك الكوردوبا والتوليدو محترمين ورايي شوف التوليدو لأنها نسخه من البورا والاوكتافيا a4 وعندك الابيزا مشتركه في قطع الغيار مع البولو والجولف 4 بس لو فكرت في الفيات هتحتاس مع قطع غيارها لأنها مضروبة كتير وغاليه عن السيات ومش نفس جوده السيات وربنا يكرمك بحاجه محترمة

**zico_momo** · 04-08-2014 05:09 PM

الكورى انا ركبت منه عربيات كتير مارتحتش فى سواقته عربيه خفيفه ومش ماسكه نفسها لا صاج
ولا فرامل ولا اى حاجه قطع غيار موجوده اه موتور كويس على العربيه وتكييف قوى
لكن مابحسش انها امان فى السواقه ومافيهاش انظمه امان ضد السرقه الحاجات الى فى الالمانى والفرنساوى والايطالى

**zico_momo** · 04-08-2014 05:12 PM

المشاركة الأصلية كتبت بواسطة hitmangate

بص ياباشا وعن تجربه أي عربيه تبع فولكس فاجن جروب يعني فولكس - أودي - اسكودا - سيات اكتر عربيات ألمانيه متوفره ليها قطع غيار جديد واستيراد وبسعر رخيص مقارنه بعمرها الافتراضي الكبير يعني انا معايا باسات موديل 2000 وقطع غيارها والله أرخص من قطع غيار الياباني فنصيحتي خليك في السيات عندك الكوردوبا والتوليدو محترمين ورايي شوف التوليدو لأنها نسخه من البورا والاوكتافيا a4 وعندك الابيزا مشتركه في قطع الغيار مع البولو والجولف 4 بس لو فكرت في الفيات هتحتاس مع قطع غيارها لأنها مضروبة كتير وغاليه عن السيات ومش نفس جوده السيات وربنا يكرمك بحاجه محترمة

انا فعلا تفكيري رايح اكتر ناحيه السيات بس كنت خايف من موضوع قطع الغيار دي
يعنى مثلا الكوردوبا بخاف مالاقيش قطعت غيار او الاقيها غاليه اوى لان العربيه مش منتشره
اما التوليدو فا اظن انها هاتبقى صعبه لانها فعلا مش موجوده قطع غيارها نادره جدا هدوخ على الفوانيس بتاعتها طبعا هى عربيه محترمه جدا من حيث الحداثه والقوه والثبات والوسع بس للاسف هتعب مع قطع غيارها شويه وهتبقى اكيد اغلى شويه

**2CODE** · 04-08-2014 05:19 PM

الماني !!!! حسستني انك بتتكلم عن bmw او مرسيدس او فولكس نفسها !!!!!!

سيات من امتى الماني ؟؟؟؟؟ علشان اشتريتها فولكس يعني ؟؟؟؟؟؟ سيات اسباني ومعروفه كده !!!!!

قولناها مليون مره في المنتدى هنا مش معنى ان شركة اشترت عربية يبقى العربية بقيت بنفس بلد التصنيع !!!!!

يعني اقرب مثال فولفو اشتريتها شركة جيلي الصينية يبقى كده فولفو صيني !!!!!!!!!

ارحمونا يا جماعة علشان الموضوع ده بيخلي ناس كتير يتضحك عليها في الشراء ويقولك اصلها الماني زي ما يقولك سكودا الماني ياعم هو بالعافية سكودا الماني مين بس !!!!!!!!!!

مش علشان فولكس اشترت سكودا وسيات يبقى سكودا وسيات في يوم وليلة الماني !!!!! سبحان الله !!!!

**zico_momo** · 04-08-2014 05:37 PM

المشاركة الأصلية كتبت بواسطة 2code

الماني !!!! حسستني انك بتتكلم عن bmw او مرسيدس او فولكس نفسها !!!!!!

سيات من امتى الماني ؟؟؟؟؟ علشان اشتريتها فولكس يعني ؟؟؟؟؟؟ سيات اسباني ومعروفه كده !!!!!

قولناها مليون مره في المنتدى هنا مش معنى ان شركة اشترت عربية يبقى العربية بقيت بنفس بلد التصنيع !!!!!

يعني اقرب مثال فولفو اشتريتها شركة جيلي الصينية يبقى كده فولفو صيني !!!!!!!!!

ارحمونا يا جماعة علشان الموضوع ده بيخلي ناس كتير يتضحك عليها في الشراء ويقولك اصلها الماني زي ما يقولك سكودا الماني ياعم هو بالعافية سكودا الماني مين بس !!!!!!!!!!

مش علشان فولكس اشترت سكودا وسيات يبقى سكودا وسيات في يوم وليلة الماني !!!!! سبحان الله !!!!

بغض النظر عن العصبيه الى بتتكلم بيها .!!!!!
العربيه فيها قطع غيار الماني .... سبحان الله
موتورها المانى .......... سبحان الله
اما عن تقفيل السياره وبلدها فا مقدرش افتيلك فيه بس كل الى معاه العربيه بيقولك العربيه بتتمتع بنفس الرتم الالمانى .....
زى البريليانس كده ... البفاريه هى الى واخداها العربيه فيها اناقه الbmw