الموضوع: تجربتي مع تغيير مراية البيجو 301 بعد حادثة !!

كنت عند بوابة اسكندرية عالصحراوي وطبعا دلوقتي مشغلين للاسف 3 ممرات في البوابه بس فتكدس العربيات مريع وطبعا 9 صفوف بيتخانقوا على 3 ممرات فسواق مقطوره ابن حلال لطش المراية الشمال والحمد لله قدرت افادي بقية العربية .

المراية لفت لفه كامله حوالين نفسها واتكسرت ، اللي اتكسر بالضبط حتة بلاستيك في قاعدة المراية اللي بتثبت المراية في القاعدة بتاعتها وتلف بيها .

رحت التوكيل في اسكندرية اللي في شارع فؤاد ، بصراحه ميزة التوكيل ده عن ابو رواش ان كل اللي فيه شباب صغير مش عواجيز زي ابو رواش فالدنيا سهله وحلوه ، بص عالمراية قالي لازم تتغير كلها بالقاعده بتاعتها ! ليه ياعم مفيش قطع غيار اقل من المراية على بعضها قالك لأ .

طب بكام ؟ قالي اللي عندي دلوقتي المراية كامله من غير الكفر البلاستيك اللي عليها فوق يعني هاغيرلك القلب بالقاعده بتاعتها قلت ماشي بكام بقى ؟ قال ب 800 و 150 تركيب يعني مش 650 زي ما بعض الشباب جايبين من الاهرام وغيره . يعني الاجمالي دخل في 1000 جنيه تغيير مراية ال301 فكل واحد ياخد باله من مرايته عشان بلدنا بتحب تكسير المرايات .. المفاجأة ان انا العربية معايا بيز لاين يعني المرايات مانيوال ، الكهربا بقى أكيد أغلى .

بس اللطيف ان وانا في المخزن بتاع قطع الغيار باستعلم عن القطعه ومتضايق من سعرها دخل واحد بيغير مراية سكودا فانتازيا كهربا طبعا قاله ب3000 جنيه .. هييييييح اللي يشوف مرايات الناس تهون عليه مرايته

المهم كل واحد بس ياخد باله من مرايته .