سيراتو موديل 2009 الشكل القديم..افادة من الملاك وخبراء الكيا

**Mohamed Nassef** · 08-08-2014 08:43 PM

انا من فترة وانا بدور علي عربية اوتوماتيك وتكييف لاني عزيزتي عشرة العمر لانوس فاضية بدون كماليات واصيلة وبقالها معايا 12 سنة واتجهت بتفكيري في الاول ناحية معشوقتي الرينو ميجان موديل 2006-2009 لاني فعلاً وحفضل اقول ده نفسي اركب العربية دي لانها حلم حياتي بس انا حاطط شروط صعبة شوية في سوق المستعمل لاكن الهدف الهرب من التجار وللاسف الشديد العربية الميجان صعب اووووووووي اني الاقي فيها شروطي (كم قليل-اشتري من اول مالك-صيانات توكيل طول فترة الامتلاك) شروط صعبة لاكن دي خلاصة تجارب وافادات ناس انا بحترمها هنا في المنتدي من غير م اعرفهم ولا اشوفهم وهما ا/ تامر محمد منسق مساعد قسم رينو و ا/ احمد مقصود مشرف القسم وهما ناس افاضل لم يبخلوا بالمشورة وشروطي هي خلاصة نصائحهم الغالية..المهم ومعذرة عن الاطالة وانا بدور لقيت كيار سيراتو موديل 2009 الشكل القديم اوتوماتيك ماشية 90000 كم صيانتها كلها في التوكيل بالفواتير والكتالوجات ومن اول يد واخر صيانة صيانة 85000 مطلوب فيها 88000 جنيه فانا حابب استشير حضراتكم في الآتي:

1- هل السعر ده عادل في الموديل ده والحالة دي اللي واضح ان صاحبها بيتكلم بثقة؟؟..انا لسه مشوفتهاش لكن اخدت ميعاد بكرة 10 صباحاً عشان اشوفها ولما سالت صاحبها قالي انا المالك الاول وحضرتك بكرة حتشوف الافراج الجمركي وفواتير ودفتر الصيانات وقالي انه عامل 12 صيانة في التوكيل في 90000 كم والعربية علي كلامه مش رشه ولا جرام بويه

2- ايه ظروف موتور العربية دي والفتيس الاوتوماتيك واسعار قطع الغيار وتوافرها خصوصاً اني ان شاء الله العلي القدير ناوي اكمل علي نفس النهج واعمل الصيانات في التوكيل..هي حتستني ان شاء الله معايا لفترة لاني مش من هواة التغيير المستمر ولكن العربيات الزيرو غالية جدا جدا فانا عايز حاجة نضيفة لفترة 3 او 4 سنين ان شاء الله الي ان يشاء الله امراً كان مفعولاً

معلش انا صدعت حضراتكم وطولت عليكم بقصتي ولكن اصحاب الرينو واصحاب الكيا ولاد عم وجيران في نفس الوكيل فانا مرحتش بعيد عن الميجان..في انتظار الردود وربنا يجازيكم عن نصيحتي خيراً ان شاء الله

**ahmed_su** · 08-08-2014 08:54 PM

العربية فى حد ذاتها ممتازة مافيش منها مشاكل تذكر

الموتور و الفتيس ادائهم جيد جدا وخاصة اذا كانت بتعمل الصيانة الدورية

قطع الغيار متوفرة بس مش منتشرة اوى يعنى - العربية مريحة و التعليق ناعم

بالنسبة للسعر مش هقدر افيديك لانى مش متابع السوق بس عموما السعر مرتبط بالحالة

**mr.moustafa** · 09-08-2014 12:05 AM

هو الفئة بتاعتها ايه ؟؟؟؟؟؟؟؟؟؟؟؟؟

**eslamhamdy** · 09-08-2014 12:29 AM

مبروك مقدما
معلش السعر مقدرش افيدك بس اشرط انك هاتكشف عليها فى التوكيل و ياريت لو فرع غير الى متعود يعمل صيانتها فية

**Mohamed Nassef** · 09-08-2014 01:17 AM

المشاركة الأصلية كتبت بواسطة safsaf43

هو الفئة بتاعتها ايه ؟؟؟؟؟؟؟؟؟؟؟؟؟

والله يا باشا معرفش هي كاملة اوتوماتيك وده اللي اعرفه لغاية دلوقتي

**Mohamed Nassef** · 09-08-2014 01:20 AM

المشاركة الأصلية كتبت بواسطة eslamhamdy

مبروك مقدما
معلش السعر مقدرش افيدك بس اشرط انك هاتكشف عليها فى التوكيل و ياريت لو فرع غير الى متعود يعمل صيانتها فية

والله يا باشا انا الحاجة الوحيدة اللي شاغلاني الكيلو متر الكتير خايف تكون متهانة عموماً بكة ان شاء الله كل حاجة تبان
هنا في اسكندرية مفيش غير فرعين للتوكيل العامرية وسموحة وعموماً بتهيالي هما علي منظومة واحدة واي تاريخ للعربية في اي فرع ممكن تستعلم عنه من اي فرع تاني علي ما اعتقد والله اعلم وكده كده لو موضوع الفواتير صح بيبقي مكتوب فيها كل حاجة اتعملت وهو ميقدرش يمسح اي item مهما حاول لانها بتبقي كمبيوتر وصعب يعدل فيها
خير ان شاء الله

**AHMED12345678** · 09-08-2014 09:45 AM

هو حضرتك تقصد اى شكل
لان فى 2009 كان فى شكلين

شكل قديم وده عفشته كويسة وناعمة لكن منتشرش وقطع غياره مش متوافرة فى كل مكان لكن موجودة بس مش هتلاقيها فى كل محلات قطع الغيار وخصوصا فى الاقاليم ف حاجات ممكن متلاقيهاش وتضطر تنزل تجبها من التوفيقية او من الحرفيين

وشكل كان نازل جديد وعفشته ناشفة واستمر من 2009 حتى 2013 وده قطع غياره منتشرة ومتوافره فى كل حلات قطع الغيار