سؤال لكل أصحاب ياريس 2007 اوتوماتيك

**Amr Abdelaziz** · 09-08-2014 04:38 AM

اولا السلام عليكم ورحمه الله وبركاته..,

عندي سؤال مهم بخصوص معدل استهلاك البنزين في تويوتا ياريس 2007 اوتوماتيك.....

أنا اشتريت عربية ياريس 2007 اوتوماتيك من حوالي شهر وكان من أسباب الرئيسية لإختياري للياريس اللي قريته هنا وفي اماكن تانية عند معدل استهلاك البنزين الممتاز للياريس

اللي حصل معايا خلال الشهر اللي فات إن تفويلة كلها بتعمل معايا 400 كم علما إن مشواري معظمها في أكتوبر مفيش زحمة والبوجيهات لسة متغيرة

لما رحت التوكيل في أبورواش -ملحوظة مكنتش تجربة جيدة خالص - عشان اغير عوامة البنزين مهندس الإستقبال لما سألته حاول يقنعني إن معدل الإستهلاك الطبيعي 10 كم على اللتر
لما قلتله إن موقع تويوتا الرسمي بيقول إن استهلاك ياريس 1300 اوتوماتيك المفروض بيكون 6.7 لتر لكل 100 كم سكت شوية وبعد كده رد بأي كلام إنت أكيد بتقيس غلط عشان العوامة بايظة قلته ملهاش علاقة أنا بفويل العربية وأصفر عدد el-trip وبعد كده بمشي 200 كم مثلا و أرجع أفول تاني وأشوف استهلكت كام لتر

المهم مستفدتش أي حاجة من المهندس ده وقلت أسأل أصحاب نفس العربية خصوصا اللي معاهم نفس الموديل ده من زمان لو ده فعلا المعدل الطبيعي ولو لأ إيه ممكن اصلاحه عشان احسن معدل الإستهلاك.

عذرا للإطالة... وشكرا مقدما

**darkdefender** · 09-08-2014 05:20 AM

ملهاش اي علاقة العوامة بمعدل الاستهلاك لو انت بتقيص بالتفويلة.....
في عوامل كتيير جدا مش بس البوجهات بتاثر علي استهلاك البنزين..
فلتر الهواّ،بوابات متسخة،رشاشات مسدودة،زيت موتور تقيل,حساس الهوا و الاكسجين,الكوتش ....

كل دي عوامل بتاثر مباشر علي استهلاك البنزين..

**darkdefender** · 09-08-2014 07:03 AM

معدل استهلاكي في السفر الاسبوع اللي فات 450 كم بالتكيف في زحمة الساحل و طريق العالمين كان 30 لتر
الي هو 6.7 لتر ل كل 100كم

**Amr Abdelaziz** · 09-08-2014 11:24 AM

في عوامل كتيير جدا مش بس البوجهات بتاثر علي استهلاك البنزين..
فلتر الهواّ،بوابات متسخة،رشاشات مسدودة،زيت موتور تقيل,حساس الهوا و الاكسجين,الكوتش ....

كل دي عوامل بتاثر مباشر علي استهلاك البنزين..[/quote]

أولا شكرا على الرد السريع...,

ثانيا خلينا نتستبعد الحاجات اللي أنا عارفها من الأسباب اللي حضرتك قلتها الكاوتش ماسه مظبوط 14 وجديد وال زيت موبيل 5000 معتقدش إن المشكلة فيهم
ثالثا بنسبة لباقي الأسباب حساس هوا ورشاشات مسدودة أو بوابات متسخه هل المفروض ده يبا على جهاز اعطال التوكيل لان المفروض انهم حطوا العربية على جهاز اعطال أو على الاقل مهندس الاستقبال قال لي كده,

هل من رايك إني أرجع تاني التوكيل رغم إني أشك انهم هيعملوا حاجة زيادة أو ترشح مكان تاني يكون في ناس تعرف تشخص وتحل المشكلة من أول مرة , وشكرا

**Y a r i s** · 09-08-2014 03:00 PM

عزيزي عمر ... هو بخلاف ما ذكر انا حابب اقول لحضرتك حاجة
العربية موديل ٢٠٠٧ يعني بقالها بالتمام. سبع سنين وبعد كام شهر هتكون تمت ٨ سنين فلا يمكن بل مستحيييييييل انك تزبط استهلاك البانزين بتاعها وتزبطوا او تحسبها زي ما بنحسب العربيات الزيروا ... ولو هتمشي ورى الكلام ده هتتعب جداً لان هنبتدي نقلك غير. بوجيهات وغير سلوك البوجيهات. وغير طرومبة البانزين مع الفلتر واغسل التنك وفك الحساس مش عارف ايه وغيروا. ... واخر معلومة وصلت لي من منتدى تويوتا السعودي ان الشباب هناك فكوا دواست البانزين وركبوا دواسة جديدة في حدود ٦٠٠ ريال. وبيقلك فرقت في السرعة جامد فمين عندنا في مصر هيتشري دواسة بانزين ب ١٢٠٠ جنية علشان العربية سحبها يزيد وتوفر في البانزين

طب اقولك حاجة تانية هل العربية مع حضرتك من الزيرو ... هل انتا متأكد ان كل القطع الغيار الي في العربية قطع غيار اصلية ... نقطه كمان حضرتك بتقول. العربية فيها كوتشات ١٤ والكوتش ال ١٤ كان بينزل في الخليج. على موديلات ١٣٠٠ او في الهند. على موديلات ال ١٠٠٠ سي سي حتى مغيرين اسمها بدل يارس في الهند مسمينها فايوس او ڤيتااا حاجة زي كده مش متذكر بالزبط

بس حتى لو قلت لحضرتك غير مقاسها ل ١٥. لايمكن انك تقدر تقيس استهلاك العربية او حتى تقارنها بعربية اختها في نفس موديلها ... وتحياتي

**kar!m** · 09-08-2014 04:15 PM

اسلوب القيادة بيفرق كتير برضه .. يعني لو محرقتش على الغيارات و مزودتش عن 100 كم/ساعة .. و ممشيتش في زحمة كتير .. هتلاقي فرق ملحوظ جدا في استهلاك البنزين.

**Y a r i s** · 09-08-2014 04:32 PM

المشاركة الأصلية كتبت بواسطة amr abdelaziz

شكرا على الرد.... يعني أفهم من كلام حضرتك إن استهلاك 400 كم في التفويلة ده مستحيل اصلاحه رغم إن في اعضاء هنا معاهم نفس موديل العربية واستهلاك أفضل بكتير؟؟
الاستهلاك 10 كم في اللتر

هو مش مش مستحيل اصلاحوا
بس هيكلفك مبالغ كتيرررر انتا في غنى عنها ولو نويت تصرفها ابقى هاتلك عربية جديدة. افضل وارخص من انك تبتدي تغير قطعة قطعة في العربية لحد ما تزبط استهلاكها .

نقطة كمان صحيح زي ما قال استاذ كريم احب اضيف على كلاموا انتا ازاي. حسبتها انت لو في اكتوبر معايا مبتتحسيبش بالكيلو. احنا. يومياً اول ما نخرج من البيت بنعدي على ٢٢ مطب ده غير المطبات الفرعية. غير اشارات الميادين ... كل ده وانا محسبتيش زحمة ميدان لبنان. او زحمة الرماية ماهو كل دي عوامل بتخلي العربية مش تسحب بانزين لا دي تقصر عمر العربية. صحيح ان المطبات مريحة لكن تصور كل ما العربية تقول يا هادي وتجمع سرعة يجي مطب يخليها توقف تاني على فكرة انا مع المطبات مش ضددها ده انا نفسي في حتت مطب يتيم كمان قدام بيتنا لان الناس مبقاش عندها زوق خلاص مبقاش عندهم صبر وبقوو قلالات الزوق جداً . فالقصد ان لايمكن حساب معدل حرق. البانزين نهائي لا في شوارع بلدنا ولا عربية مش حديثة .... وتحياتي

**darkdefender** · 09-08-2014 04:40 PM

أولا شكرا على الرد السريع...,

ثانيا خلينا نتستبعد الحاجات اللي أنا عارفها من الأسباب اللي حضرتك قلتها الكاوتش ماسه مظبوط 14 وجديد وال زيت موبيل 5000 معتقدش إن المشكلة فيهم
ثالثا بنسبة لباقي الأسباب حساس هوا ورشاشات مسدودة أو بوابات متسخه هل المفروض ده يبا على جهاز اعطال التوكيل لان المفروض انهم حطوا العربية على جهاز اعطال أو على الاقل مهندس الاستقبال قال لي كده,

هل من رايك إني أرجع تاني التوكيل رغم إني أشك انهم هيعملوا حاجة زيادة أو ترشح مكان تاني يكون في ناس تعرف تشخص وتحل المشكلة من أول مرة , وشكرا[/QUOTE]

بص حضرتك
1)زيت موبيل 5000 الي هو اسمه متهالي سوبر 1000 دا زيت معدني 20w-50 دا اتقل زيت موجود (زيت التقيل بيزود استهلاك الوقود جامد)انصحك نغيروا بزيت مووبيل 1 0w-40 او زيت كاسترول ادج 5w-40

2) كمبيوتر التوكيل بشوف الاعطال اتساخ الحساسات و الرشاشات و البوبات مش هيقراء عطل لانهم شغالين ,هما بس بيدوا قراية غلط لكمبيوتر العربية بيتسبب في عدم الاستخدام الاصلح للوقود..

3) الحجات دي مش محتاجة توكيل و وجع دماغ اي مكانيكي محترم يعملها بصباع رجلو..

4)طالما العربية بدور كويس و مش مخنوقة يبقي مفيش مشكلة في طرمبة ولا فلتر البنزين

مطلوب من حضرتك:
1)غير زيت و فلتر في اقرب فرصة اهم حاجةيكون مفيش رقم 50 دا فالزيت يعني 0w-40 5w-40 10w-40 كدا يعني
1)نظف او غير فلتر الهواء دي مش محتاجة مكانيكي.
2) اضف منظف الرشاشات من شركة STP لونه اسود علي التفويلة اللي جاية سعره حوالي 40 جم في اي محطة بنزين موبيل او توتال.
3) اشتري سبراي تنظيف البوابات من اي محطة بنزيت اسمه CARB CLEANER و اطلع عند اي مكانيكي قله ينظفلك سنسور الهواء بالسبراي هو و البوابات (ملحوظة البوبات بتاعت اليارس كهراباء يعني لزم حد يدوس علي دواسة البنزين و كهرباء العربية شغالة عشان تفتح).