ارجو الافادة عن سيارة عليها حظر بنك وتم فكة

**hany_elkashef** · 15-08-2014 01:13 AM

السلام عليكم الموضوع انى اشتريت سيارة بعقد ابتدائى الرخصة مكتوب عليها حظر بنك ولما سألت البائع وهو شخصية تبدومحترمة جدا والسيارة حتى راكنها فى جراش خاص قالى ان العربية كانت قسط وتم تسديد الاقساط بالكامل انه سيتوجة غدا الى البنك والموضوع حياخد حوالى اسبوع لفك الجظر واخذ المخالصة بذلك وتم دفع عربون 5 الاف جنية وعقد ابتدائى ولم اتسلم السيارة علما انى عرضت علية عربون كبير لاستلام السيارة فرفض وهو اللى طلب العربون 5 الاف جنية لحين انهاء الاجراءت اتصل بى بعدها تانى يوم افاد انة ذهب الى البنك وعمل اجراءت فك الحظر والموظف المسئول فى البنك افاد ان الموضوع حياخد من 4 الى 5 ايام عمل حتى يتسلم جواب المخالصة وجواب اخر تقريبا ستوجة للمرور لفك الجظر اليوم الثالت اتصل بة وقالى انا خلاص روحت المرور انجازا للوقت وتم تجديد الرخصة لمدة سنة لان الرخصة كانت فاضل لها 10 ايام وتنتهى على ماهو عليها ومكتوب علية حظر بيع بنك ودفع التامين وتسديد المخالفات الى اتاكدت منها فعلا كان علية مخالفات 400 جنية وكشفت عليها على الانترنت ولما اتصل بى وقالى انى سددت المخالفات لقيت ان المبلغ اتمسح واصبح السيارة خالي من اى مخالفات
دلوقتى هو عارض عليا ان المخالصة من البنك حيستلمها تقريبا كمان يومان اجى استلم السيارة وصورة من المخالصة ونعمل عقد ابتدائى وياخد المبلغ بالكامل ونبقى مبلغ صغير 5 الاف من ثمن بيع السيارة على مايوصل الجواب فك الحظر المرور اللى حياخد مش اقل من اسبوعين ويكمل اجراءت فك الحظر وعمل التوكيل العادى السؤال هل الكلام دة صح وهل ممكن بالمخالصة اللى حياخدها من البنك يعمل بيها توكيل لى ولا لازم الرخصة يتشال منها كلمة حظر
مع الشكر

**svneleven** · 15-08-2014 04:13 AM

اللي متأكد منه أن جواب فك الحظر هياخد فعلا حوالي أسبوعين. أعتقد الشهر العقاري مش هيتعامل الا لما تكون الرخصة مش فيها حظر.

**hany_elkashef** · 15-08-2014 06:18 PM

اشكرك على الرد المشكلة دلوقتى انى عايز استلم السيارة لانى مش معقول اسيبها اسبوعين عند البائع وهو عارض عليا انة حيستلم المخالصة ووصورة جواب البنك للمرور يوم الاحد القادم ويعطينى صورة منهاو نلغى العقد الابتدائى القديم اللى فية عربون 5000 جنية ونعمل عقد جديدابتدائى وياخد مبلغ بيع السيارة ويسلمنى السيارة ويبقى مبلغ بسيط لحين وصول جواب فك الحظر علشان يلغى فك لجظر من الرخصة ويعرف يعمل لى توكيل هل الاجراء دة صح وهل لو عملت كدة لازم اخذ الرخصة وطبعا هى مثبوت علية حظر بيع ولا اسيبها لة علشان يعمل اجراء فك الحظر بعد اسبوعين فى المرور سمعت ان فى حاجة اسمها توكيل ادارة علشان امشى بالعربية الاسبوعين ارجو من السادة الخبراء الرد

مع الشكر

**Abo_Mazen** · 15-08-2014 07:56 PM

[color="rgb(160, 82, 45)"][color="rgb(160, 82, 45)"]بص يا باشا ..الكلام اللي أنا هقوله لحضرتك ده عن تجارب مع ناس أنا أعرفها شخصيا ..وبعد الكلام اللي أنا هقوله لحضرتك ده تقدر تاخد قرار بنفسك

أولا ..جواب رفع الحظر اللي بيطلع من البنك للمرور لو حضرتك سيبت البنك على راحته خاااااااااالص ومجريتش وراه عشان الجواب ده يخلص ..ممكن يقعد ست شهور ..على البنك ما يخلصه وبعدين يبعته المرور

ثانيا ..المرور مش هيستلم منك الجواب يدا بيد ..لإنه لازم يوصل المرور عن طريق البريد ..وده الروتين في بلدنا

ثالثا..لو حضرتك جريت ورا البنك عشان يخلص الجواب ممكن فعلا يخلص في أسبوعين وإن كنت أشك في المده دي أساسا ..لإن المشكلة عندنا مش بتبقى في البنك ..المشكلة بتبقى في الطريقة اللي البنك بيرسل بيها الجواب ده للمرور وإن كان البنك معذور وبيعمل كده مضطر لإن دي الطريقة اللي بيفرضها المرور على البنوك في التعامل وهي إن الجواب لازم يروح في البريد ويتعمله رقم صادر وبعدين حضرتك تروح تاخد رقم الصادر من البنك وبعدين تروح تسأل عليه في المرور برقم الصادر اللي حضرتك خدته من البنك وبعد ما يوصل المرور بيتعمله رقم وارد ..يعني هنقول مثلا إن البنك هيخلص الجواب في أسبوعين ...ده بإفتراض إنه بنك أجنبي محترم وبينجز ..الجواب كده لسه مخلصش فعليا ..لإن لسه الجواب قدامه رحله تانيه في البوسته لغاية ما يوصل المرور وبعدين يعيش حياته سكرتاريا وإداريا في المرور ..وبعدين المرور يقولك آه ..ده الجواب وصل

رابعا ..ما دامت الرخصه مكتوب عليها كلمة حظر بيع ..أو كلمة السيارة مجهزه طبيا ..أو ما شابه من الكلمات الضمنيه التي تعني حظر بيع..لالالالالالالالالالال الالالالالالالالالا يمكن موظف الشهر العقاري هيرضى يعمل توكيل ..ولو عملت إيه بالذي ..لازم الرخصه مايبقاش مكتوب عليها أي تنويه أو أي إشارة بإن العربيه دي محظور بيعها بسبب رهن أو قسط أو إنها مجهزه طبيا

رابعا ..أي فلوس حضرتك هتدفعها في العربية بدون توكيل بيع رسمي من الشهر العقاري فهي على ضمانتك الشخصيه للبائع ..

رايي الشخصي ..متتعاملش على أي عربيه ورقها في أي مشكلة ..حتى لو كانت فسوه صغيره ..دي فلوس يابا ..والقرش النهارده مش بالساهل ..وخلي عندك مبدأ روش قوي ..لو العربية واقفه قدامك وبترقص وبتقولك إشتريني ..متخلصش فيها غير لما يكون ورقها كله سالك ..تقولي بقى دفع مخالفات ..عليها حظر ..أنا يا سيدي مصدق البائع إنه راجل أمين ومحترم وكويس ..لكن إنت متضمنش الظروف ..متضمنش البنك ممكن يتأخر ..ممكن ينجز ..ممكن الراجل لا قدر الله يحصله حاجه تعطله عن إنهاء الإجراءات ..وإنت فلوسك مش ببلاش ..وبعدين واضح قوييييي إن البائع عنده علم أو إتأكد إن جواب رفع الحظر ده قدامه رحله طويله شوية ..وعشان كده قام مجدد بالوضع اللي العربيه عليه ..اللي هو حظر البيع يعني ..عشان العربيه متسقطش ترخيص ويدخل في غرامه ويضطر يجيب شهاده بيانات لما ييجي يبيع لو الرخصه منتهيه ..وحتى لو جواب البنك وصل المرور ..ده فرضا يعني ..لازم يجدد بإسمه ..عشان الرخصه تكون بدون كلمة حظر بيع ...وبعدين يعملك توكيل ..ما إحنا قلنا لازم ما يكونش على الرخصه أي حاجه تدل على حظر البيع

أظن دلوقتي حضرتك في إيدك القرار ..وتقدر لوحدك تختار[/color][/color]

**hany_elkashef** · 16-08-2014 12:45 AM

اشكرك ياباشا على معلوماتك القيمة وبالفعل انا فى حيرة الراجل محترم جدا هل اكتفى بجواب الصادر للمرور بفك الحظر اللى حيجيب صورتة يوم الاثنين بعد مايستلمة من البنك وهو على فكرة بنك عودة دة لو استلمة اصلا فى موعدة لان حضرتك بتقولى انة ممكن يتاخر كتير ونعمل عقد ابتدائى جديد ويسلمنى السيارة بس برضة محدش ضامن الظروف زى ماحضرتك بتقول
ودلوقتى لو كلمتة وقلت لة ترجعت عن البيع ممكن يخصم فلوس الشرط الجزائى اللى فى العقد وهى 2000 جنية
وممكن الموضوع يتطور ونشد مع بعض ولا حاجة وندخل فى متاهات انا فى غنى عنها

**hany_elkashef** · 16-08-2014 01:07 AM

على فكرة الرخصة مكانتشى منتهية ولا حاجة هى تاريخ انتهائها 23/8.2014 علاوة الى اعرفة ان لة فترة سماح شهر بعد انتهاء مدة الترخيص
واجراء التجديد دة هواللى عملة لوحدة هو قالى انة حيجدد سنة

**Abo_Mazen** · 16-08-2014 11:02 PM

أولا حضرتك ما تشكرنيش على حق ليك عليا ..إحنا هنا كلنا بنفيد بعض
ثانيا ..صورة جواب فك الحظر اللي هو هيجيبها من البنك ولا ليها أي قيمة قدام المرور ..لازم الجواب الأصل يوصل المرور عن طريق البوسته ..يعني صورة جواب فك الحظر ده ممكن يكون معاك لإثبات حسن النيه وصدق الراجل فعلا في الموضوع ..يبقى أول حاجه أنا شايف إنها تتعمل إنك تتمسك بإنه يجيب صورة من جواب فك الحظر وتكون معاك عشان دي اللي هتضمن إن الراجل فعلا جري ورا الجواب وإن البنك طلع الجواب ..يبقى مش باقي غير الإنتظار لغاية الجواب ما يوصل المرور وياخد دورته الروتينيه في المرور ..لكن متنساش ..حضرتك لغاية دلوقتي مشتريتش ..والعقد اللي حضرتك كاتبه باطل..لإن العقد مكتوب على عربيه محظورة البيع ..وما بني على باطل فهو باطل ...عشان كده بقول لحضرتك بارقة الأمل الوحيده لإثبات حسن نيه الراجل هي صورة جواب رفع الحظر أو فك الحظر من البنك

ثالثا ..حكاية شهر سماح دي ..بتبقى في المرور بس ..لكن في الشهر العقاري لو الرخصه منتهيه بقالها يوم ..هيقولك شهادة بيانات ..في الشارع لو الرخصه منتهية بقالها ساعة ..أي كمين هيوقفك هيغرمك غرامة رخصه منتهية ..لكن موضوع الشهر ده بيبقى في المرور على أساس إنك في خلال الشهر ده لما تروح تجدد مش هتتغرم ضريبه وتلت ..دي حتى حكاية الشهر دي في إدارات مر ور مش بتعترف بيها كمان ..يعني لو مدير إدارة المرور غتيت ممكن يقولك لأ ..الرخصه المنتهيه تدفع ضريبة وتلت عادي ..وبعدين هو جدد قبل الرخصه ما تنتهي ..وده اللي أنا قلته ..عشان الرخصه لو إنتهت هيدخل في متاهات شهادة بيانات ..وبعدين حتى لما جواب رفع الحظر يوصل المرور ..لازم برضه يجدد بإسمه عشان ياخد بدون حظر ..ويعرف يعملك التوكيل ..يعني الجواب هيوصل المرور كمان شهر إثنين تلاته ..التجديد ساعتها في المرور مش هيبقى ليك ..لأ ..ده هيبقى لصالحه هو وبإسمه هو عشان ياخده رخصه على بياض ..مفهياش حظر ..ومن خلال الرخصه دي يقدر يعملك توكيل

رأيي الشخصي ..لو تقدر تطلع من البيعه دي إطلع ..ولو خسرت جزء من الشرط الجزائي مبلغ بسيط ..مش لازم يعني تسيب الألفين جنيه ..وممكن تعتذر بأي عذر ..يعني ..ممكن تقول حصلك ظروف وصرفت نظر عن شرا العربية اليومين دول ..أهو أي حاجه ..لإن بصراحه البيعة دي شكلها كده مطوله شويه ...لكن ..لو حضرتك غاوي ..والعربية داخله دماغك ..يبقى هتكمل البيعة على مسؤليتك لوحدك ..بإنك تنتظر الجواب يوصل المرور ..وبعدين تنتظر إنه يجدد لنفسه ..وبعدين يعملك توكيل ..كل ده وحضرتك ماشي بعقد إبتدائي ..باطل ..لإنه معمول لعربيه محظور بيعها ..

شوف ..وقلبها ..وإحسبها

**hany_elkashef** · 20-08-2014 02:33 PM

عموما انا حنتظر معاة شوية ومش حاستلم السيارة لغاية مايكمل بقية الاجراءت وفك الحظر من الرخصة اسبوع كمان لو وجدت ان الموضوع فعلا حياخد شهور زى ماحضرتك بتقول حالغى البيعة

**Abo_Mazen** · 20-08-2014 07:32 PM

المشاركة الأصلية كتبت بواسطة hany_elkashef

عموما انا حنتظر معاة شوية ومش حاستلم السيارة لغاية مايكمل بقية الاجراءت وفك الحظر من الرخصة اسبوع كمان لو وجدت ان الموضوع فعلا حياخد شهور زى ماحضرتك بتقول حالغى البيعة

لكن الفلوس اللي هو واخدها عربون هتكون معاه بناء على ثقتك فيه وبس ..لكن قانونا ..حضرتك ملكش حاجه عنده ..يعني الموضوع بناء على ثقتك فيه وبس

**hany_elkashef** · 24-08-2014 06:08 PM

المشاركة الأصلية كتبت بواسطة m_m_sh_a

لكن الفلوس اللي هو واخدها عربون هتكون معاه بناء على ثقتك فيه وبس ..لكن قانونا ..حضرتك ملكش حاجه عنده ..يعني الموضوع بناء على ثقتك فيه وبس

الف شكر ياباشا على الاهتمام وبالفعل انا واثق منة الى ابعد الحدود بصرف النظر عن ان العقد قانوانى او غير قانونى والراجل شغال فى مركز مرموق يعنى لا هو صايع ولا هو شكلة بلطجى علشان اخاف منة وكلامك بيتحقق بالظبط هو كل يوم بيروح بنك عودة ومازال حتى الان مخدشى المخالصة ورقم الصادر او صورة الجواب اللى رايحة المرور علشان يفكوا الحظر ورغم ان الموظف هناك يقولك ان الاجراءت كلها تاخد من 4 الى 5 ايام يوم عمل عدى 15 يوم حتى الان لم يحدث شئ صراحة بنك عودة دة من اسوء البنوك فى التعامل وفى بطئ الاجراءت ودة على لسان الراجل صاحب العربية حتى انة عمل اكتر من شكوى مفيش فايدة ولا انصح بالتعامل معاة نهائى