تقرير استلام التو 2015 الشكل الجديد

**ibrahimahmed** · 15-08-2014 12:33 PM

السلام عليكم
بحمد الله استلمت العربية سوزوكى التو 2015 الشكل الجديد من معرض الملك فى مصر الجديدة
العربية كاش ب 60750 واللون نبيتى ..
( صور العربية موجودة في الموضوع اللى عامله الاستاذ d.a. /ayman ....عشان كده مارفعتش صور )
بعد تجربة العربية 400 كم اقدر اقول شوية مميزات وعيوب العربية من وجهه نظرى

نبدأ بالمميزات :
1. الشكل الجديد شكله ظريف جدا وانسيابى ومتناسق مع حجم العربية
2. العربية سحبها حلو اوى على الطريق حتى وانا مركب اتنين ورا وواحد قدام ( مجاتش فرصة اركب اكتر من كده عشان احكم )
3. القعدة قدام مريحة جدا وكل حاجة فى متناول السائق
4. العربية عالية عن الارض حتى وانا محمل خدت مطبات رخمة جدا والعربية ماحكتش
5. العفشة بتاعتها كويسة جدا ومافيش اى اصوات غريبة
6. طبعاً انا مشغلتش التكييف غير مرة واحدة عشان التليين بس واضح انه كويس اوى ومكفى العربية لدرجة انى كنت مشغله على 2 وبردت ونزلتو على 1
7. توزيع اماكن التخزين فى التابلوه والابواب جيد جدا وممكن تحط حاجات كتير فى العربية .. ( بس للاسف مفيش درج صغير للفكة )

نيجى بقى للعيوب :
1. اول عيب مضاينى جدا هو ان الاكصدام اسود ايا كان لون العربية ... فى رأيى موحش العربية اوى
2. الفضا اللى فى العربية ده مضاينى ... دول شالو حتى الولاعة ... غير زراير الابواب الخلفية اللى مش موجودة والكاسيت السماعت والكلام ده ... احساس وحش لما تكون جايب زيرو وتروح لحد يعمل لك فيها شغل
3. الشنطة مش بتفتح غير بالمفتاح ... مالهاش زرار داخلى و القفل مافيهوش زرار ... لازم المفتاح ... حاجة رخمة اوى لما تبقى داخل مول ولا سنتر والامن يعوز يفتش الشنطة تقوم مبطل العربية عشان تديلو المفتاح يفتح الشنطة
4. العربية ضيقة من ورا ... اتنين يقعدو كويس لكن تلاتة هايبقو ملزقين فى بعض .. ولو اللى قاعد قدام ريح الكرسى بتاعه شوية اللى ورا هايزعل
5. المرايات سيئة جدا ومش بتتظبط غير بالايد من بره ... ولو قفلتها وانت بتركن لازم وانت بتفتحها تظبطها

فى المجمل العربية كويسة جدا على قد امكانياتها وسعرها مقارنة باسعار باقى السيارات وخصوصا اللى ظروفهم المادية ماتسمحش بحاجة اكتر من 60 الف

شوية اسئلة بقى عالماشى :
1. نور الصالون عندى مش شغال فى الثلاث اوضاع ... فى اى اجراء اعمله ولا استنى صيانة الالف وهما يتعاملو ؟؟؟
2. عاوز اركب الكماليات .. سنتر وانذار وكاسيت وسماعات ... سئلت فى التوكيل على السعر الحرامية قالولى 1700 جنيه ... وطبعا مش عارف نوع السنتر او الانذار والكاسيت نوعه بلاك فوليوم ... ولما سئلت لو ركبت بره هاخرج بره الضمان قالو ان الكهربا بتخرج كلها بره الضمان ... السؤال هنا بقى ... هل فعلا بيخرج بره الضمان ولا بيقولو كده وخلاص عشان يبيعو ... ياريت لو حد ركب بره الضمان وراح يقولنا اللى حصل معاه ؟؟؟
3. كنت عاوز اعرف نوع كاسيت وسماعات كويس للعربية ويكون سعره فى المعقول ؟؟؟

لو فيه اى اسئلة انا تحت امركم.

**Hunting_Eagle** · 15-08-2014 01:26 PM

مبروك عليك العربية و تتمتع بيها ان شاء الله

**aymanshebl** · 15-08-2014 02:24 PM

مبروك بالنسبة لنور الصالون ممكن يكون سويتش الباب اللى مسؤل عن اضاءة الصالون فيه حاجة او فيوز لمبة الصالون او اللمبة محروقة ممكن تستنى صيانة الالف

اى كماليات فىى العربية بتخرجك من الضمان لان العربية حساسة لموضوع الكهربا لان العربيات بتبقى محسوب فيها كل حمل اد ايه و ممكن تركب اى حاجة انت عايزها بره بس يكون واحد فاهم كويس و انت عارفه انه شاطر التوكيل مبيركبش اى حاجة حتى لو ركب على مسئوليتك و بررره الضمان هههههه التوكيل فك و تركيب الموجود فقط لقلة خبرة العمالة المصرية عامة

بالنسبة للكاسيت و السماعات ممكن حد يفيدك عنى فى الموضوع ده او تعمل سوال فى قسم الكماليات قسم الصوتيات

**khaled_yassin** · 15-08-2014 02:30 PM

مبروك عليك

**Mecha** · 15-08-2014 02:54 PM

الياباني لوز

**El Prince** · 15-08-2014 03:28 PM

1000 mabrooooooooooook :)

**amz040** · 15-08-2014 04:42 PM

مبروك عليك وربنا يكفيك شرها

**D . a .\ AYMAN** · 16-08-2014 01:19 AM

الف مبروك على العربية ..

ربنا يحفظهالك ويرزقك خيرها ويكفيك شرها

أنا رأيي ركب سنتر وإنذار وكاسيت خارج التوكيل وطظ فيهم

كان معايا الألتو فل أوبشن وكانت جاية فيها السنتر الأصلي والكاسيت بتوعها ... وركبت عندهم إنذار عشان خايف برضه على الضمان

ولو عاد الزمن جنت هاركب برة لعدة أسباب

1- الإنذار بتاعهم نوع كدة صيني مالوش ملة وسعره كان في حدود 500 جنيه سنة 2008 وكان مضايقني طول ما هو شغال ... خصوصا لما أعرف إن الإنذار الوولف المصري سعره كان 200 جنيه وفيه أوبشن أكثر بكثير (للأمانة طول ست سنوات لغاية ما العربية اتباعت ما عطلش ولا مرة)

2- الكاسيت بتاعهم حاجة مالهاش أي لازمة وصوتها وحش (اللى عندي كان مكتوب عليه سوزوكي بطريقة تحسسك إنهم كاتبينها عنج واحد في العتبة) ... وعموما أنا شيلنه وركبت واحد بيونيير صوت محترم جدا وسماعتين على الرف الخلفي بتاع الشنطة

3- بالنسبة للضمان .. مش عارف أقولك إيه ... مش عايز أثر فيك ... بس أنا لو مكانك هاطظ فيهم بس على الأقل بعد ما العربية تعمل 10 آلاف كيلو ولا أكثر بشوية أكون اطمنت إن مافيهاش حاجة استثنائية بإذن الله طبعا

وعموما القرار ليك في الآخر ...

**ibrahimahmed** · 16-08-2014 04:01 AM

ماهى فعلا المشكلة ان العربية لسه جديدة ومجربتهاش .. خايف اعمل الحاجات برة وبعدين لا قدر الله يبان عطل فى العربية ليه علاقة بالكهرباء يتتلككو ويقولو انت برة الضمان ... وفنفس الوقت مش هاينفع استنى على الانذار اما اجرب العربية عشان احوال البلد
موضوع محير ولازم يتاخد فيه قرار سريع

**D . a .\ AYMAN** · 16-08-2014 04:18 AM

لما تروح الصيانة إسأل الأول ماركة الإنذار إيه وشكل الريموت بتاعه ومواصفاته (يعني بيقفل الموتور أو بيشغله وممكن تركب معاه وحدات رفع ولا لأ ... إلخ) ... برضه من 2008 لغاية دلوقتي أكيد حاجات كتير إتغيرت ... وممكن الإنذار اللى عندهم دلوقتي كويس ... ولو عجبك ركبه عندهم وخلاص ...

الكاسيت لو ركبت كاسيت بره بعد كدة ما حدش هاياخد باله إنت مركب الكاسيت فين وممكت تفكه قبل ما تروحلهم لو حصل حاجة لا قدر الله ... لأن فكه أو تركيبه مش صعب .. وكمان ممكن تسأل هل ممكن تجيب إنت الكاسيت اللى يعجبك وهم يركبوه .. وبكدة تبقى في الضمان برضه

السنتر أكيد من عندهم لأن العربية أصلا ليها سنتر أصلي بتاعها بيركب عليها برة في بلدها .. وأكيد الوكيل جايب حاجتها الأصلية .. فده مافيش منه قلق والأفضل تركبه عندهم أصلا

الموضوع: تقرير استلام التو 2015 الشكل الجديد

LinkBack

أدوات الموضوع

عرض

-

-

-

-

المواضيع المتشابهه

التو 2015 الشكل الجديد ولا جيلى باندينو

تقرير عن مميزات وعيوب اللوجان الشكل الجديد 2015

تقرير بيجو 508 موديل 2015 الشكل الجديد

تقرير استلام صنى الشكل الجديد ex

تقرير: استلام نيسان صني 2013 الشكل الجديد من أوتو إيجيبت

الكلمات الدلالية لهذا الموضوع

المفضلات

المفضلات

ضوابط المشاركة