الموضوع: حل مشكله انقطاع الكهرباء وتجربتى مع الانفيرتر

السلام عليكم ورحمه الله

من كثره الرسائل من الاخوه في المنتدى للاستفسار عن الانفيرتر وتشغيله ومواصفاته حبيت اعمل الموضوع ده للافاده
في البدايه انا عرفت الانفيرتر من هنا من المنتدى نايل موتورز وشبه اقتنعت به وبعد تجربته اقتناعى كان اكبر واكبر لانه بالبلدى حل لى مشكله الانقطاع المتكرر للكهرباء

لانى كنت مستبعد المولد الكهربائى نهائيا للاسبا ب التاليه

مزعج بطريقه بشعه --- عادم خطير حتى لو في البلكونه لازم يدخل العادم عندى وازعاج للجيران وانا بهتم جدا بعدم مضايقه من يعرفنى --- مضطر يكون عندى 2 جركن بنزين واشترى بنزين واشيله في العربيه واخزنه في البيت ودى لوحدها كارثه ومستبعد ده نهائيا بسبب انفجار سياره صديق لى بسبب انه كان حاطط فيها جركن بنزين وربنا ستير -- والسبب الاكثر والاشد انى مش هكون في المنزل في كل وقت انقطع فيه الكهرباء واقوم اشغل المولد وافصل السكينه وبعدين اطفى المولد -- ده مش مولد ده كده بقى مولد وصاحب غايب

فالحل كان الانفيرتر وبالصدفه البحته صديق لى مشفتوش من سنين وسمعت انه بيسافر الهند كتير قابلته بالصدفه قال لى انه شغال في الانفيرتر بقوله لو كويس عايز اجربه في ثوانى عمل مكالمه لمهندس عنده وبعدها مفيش نص ساعه لقيت البيت عندى بيتصلوا وبيقولوا واحد جاى بيقول هيركب حاجه للكهرباء واستأذنت علشان اروح البيت والحقه لقيته بيشتغل في مفاتيح الاوفر لوك بيقولى بصفى الاحمال -- يعنى جمع الاحمال المناسبه للانفيرتر وفصل الباقى خلاه يقطع عادى مع الكهرباء بالبلدى كده الشقه كلها عدا المطبخ
الجهاز اسمه.... 900va....luminous
بيسموه كيلو لكن هو اقل من الكيلو طبعا ودى صوره له من النت


وبيجى معاه ترابيزه مناسبه له بيوضع داخلها بطاريه جافه 150 امبير كورى الصنع

دى صوره من النت مشابهه لدرجه كبير للجهاز بالترابيزه







وصل الجهاز بسلك كهرباء طوله متر تقريبا ووصله داخل لوحه مفاتيح الشقه

وبكده الموضوع انتهى ومفيش اى تدخل منى بعد كده بمجرد انقطاع الكهرباء كل حاجه محمله على الانفيرتر تنور لدرجه ان لو فيه تلفزيون او كمبيوتر مش بينطفى العمليه لحظيا

عملنا تجربه للتحميل عليه شغلنا انوار الشقه منها 12 لمبه موفره منهم لمبات صغيره ولمبات -- عدد 2 لمبه 60 لكن لازم بالترانس الجديد -- عدد 2 مروحه منهم مروحه 30 بوصه فريش لوحده 150 وات.. عدد 2 شاشه led و2 ريسيفر.. اكسيس بوينت .. 2 حوض سمك.. وشغال عادى

بعد كده الكهرباء كل يوم تقريبا 4 مرات متقطعه كل مره من ساعه لساعه ونصف وبعض المرات ساعتين متواصلين والدنيا زى الفل ... الجهاز بيشحن في وجود الكهرباء وبيظهر في شاشته انه فصل شحن وامتلىء بجد ماشاء الله ولا قوه الابالله

رائع ونسانى انقطاع الكهرباء واى استفسار انا تحت امركم ان شاء الله في حدود معلومات
ملحوظه محدش يسئلنى على السعر اقسم بالله ما اعرف وهو لسه مش راضى يحاسبنى لدلوقتى
بس هعرف من صديق لى عايز يركبه وبمجرد ما اعرف هقول لكم

تقديرى للجميع